ޓޫރިޒަމަކީ އަހަރުމެންނަށް ލިބުނު ރަންގަނޑެއް ކަމަށް ބުނަނީ ސަބަބުތަކެއް ހުރީމަ އެވެ. ރާއްޖޭގެ އުފެއްދުންތެރުކަން، ޖީޑީޕީގެ 80 ޕަސެންޓް ހިއްސާކުރަނީ ސީދާ ގޮތެއްގައި ޓޫރިޒަމުން އެވެ. އެ ސިނާއަތުން ރާއްޖެއަށް މިހާރު ނުލިބޭ ކާމިޔާބެއް ނެތެވެ. ރާއްޖޭގެ އިގްތިސާދާއި އެތައް ބައެއްގެ ދިރިއުޅުން ބިނާކޮށްފައި ވަނީ ޓޫރިޒަމްގެ ބިންގަލުގެ މަތީގަ އެވެ. ޓްއަރިޒަމް އެމްޕްލޯއީސް އެސޯޝިއޭޝަން ގެ ތަފާސްހިސާބުތަކުން ދައްކާ ގޮތުގައި، ރާއްޖޭގެ ޓޫރިޒަމްގައި، 25،000 މުވައްޒަފުން މަސައްކަތް ކުރެ އެވެ. އޭގެ ބޮޑު ބަޔަކީ، ދިވެހި ޒުވާނުންނެވެ.
ރައީސް އަބްދުﷲ ޔާމީންގެ ފަސް އަހަރުގެ ދައުރުގެ ނިމުމަކަށް ދާއިރު، ޓޫރިޒަމްގެ ސައިޒް މި ވަނީ ފުޅާވެ، ބޮޑުވެފަ އެވެ. މި ސަރުކާރު ވެރިކަމާ ހަވާލުވި އިރު، ރާއްޖެގައި އޮތީ 77 ރިޒޯޓެވެ. ނަމަވެސް މިފަސް އަހަރު ނިމުމަކަށް އަންނައިރު މުޅިން އަލަށް ހަދައި މާކެޓްގެ ތެރެއަށް ނިކުތް އާ ރިސޯޓާ އެކު މިއަދަދު މި ވަނީ 102 އަށް އަރައިފަ އެވެ. މިއަދަދު އަދިވެސް އިތުރުވާނެ ކަމަށް ބަލަން ޖެހެނީ އާ ރިސޯޓްތައް އަދިވެސް ހަދައި ހުޅުވުމުގެ މަގުމަތީގައި ހުރީމަ އެވެ. ޔަގީނުން ވެސް ސާބިތުވާ އެއްކަމަކީ ރައީސް ޔާމީންގެ ބޮޑު ވިޝަންއެއް ޓޫރިޒަމްގެ ސިނާއަތަށް އޮތް ކަމެވެ.
ރިޔާސީ ކެންޑިޑޭޓުންގެ ތެރެއިން ޓޫރިޒަމްގެ ދާއިރާއަށް ހާއްސަކޮށް އެންމެ ބޮޑު ސިޔާސަތެއް މީހާތަނަށް އިއުލާން ކުރެއްވީ ރައީސް ޔާމީން އެވެ. ފަތުރުވެރިކަމުގެ ދާއިރާގައި މަސައްކަތް ކުރާ ޒުވާނުންނަށް، އެމްޕްލޯއިމަންޓް ބެނެފިޓް ސްކީމެއް ތައާރަފް ކޮށްދެއްވާނެ ކަމަށް ރައީސް ޔާމީން މިފަހުން ވަނީ ވައުދުވެ ވަޑައިގެންފަ އެވެ. އެ ވައުދުގެ ތަފްސީލްތަކަށް ދަމާ ހިނގާށެވެ.
އެމްޕްލޯއިމަންޓް ބެނެފިޓް ސްކީމް ކުރުކޮށް
- ސްކީމް ފަށަން ސަރުކާރުން 100 މިލިއަން ރުފިޔާ
- އަމާޒަކީ 500 މިލިއަން ރުފިޔާގެ ފަންޑެއް އުފެއްދުން
- ފްލެޓް ގަންނަން ޑައުން ޕޭމަންޓް ދެއްކޭނެ
- ތައުލީމާއި ސިއްހީ ކަންކަމަށް ފައިސާ ހަރަދުކުރާނެ
- ޓޫރިޒަމްގެ ކުދި އަދި މެދުފަންތީގެ ވިޔަފާރިތަކަށް ގެރެންޓީ
ޖުމްލަ، 50 ފުޓްސަލް ދަނޑު ހުޅުވުމަށް، އޮގަސްޓް އެއް ވަނަ ދުވަހު، ދަރުބާރުގޭގައި، ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، ސަރުކާރުންދޭ 100 މިލިއަން ރުފިޔާގެ ރައުސުލްމާލަކުން ޓޫރިޒަމް ދާއިރާގެ މުވައްޒަފުންނަށް ހާއްސަ ސްކީމެއް ކުރިއަށް އޮތް ފަސްއަހަރުގެ ދައުރުގައި ފައްޓަވާނެ ކަމަށެވެ. މި ސްކީމް ފެއްޓުމަށްފަހު ތަރުހީބު ލިބޭނަމަ، 500 މިލިއަން ރުފިޔާ އާ ހަމައަށް މިއަދަދު އިތުރު ކުރައްވާނެ ކަމަށް ވިދާޅުވި އެވެ. މުވައްޒަފުންގެ މުސާރައިން، ތަކުލީފް އުފުލަން ނުޖެހޭ ވަރުގެ އަދަދެއް މި ސްކީމަށް ޖަމާކުރެވޭނެ ސިޔާސަތެއް ކަނޑައަޅުއްވާނެ ކަމަށް ވެސް ރައީސް ވިދާޅުވިއެވެ. މި ސްކީމްގެ މަގުސަދަކީ ރައީސް ވިދާޅުވި ގޮތުގައި، މުވައްޒަފުންގެ އާންމު ދިރިއުޅުމުގެ ފެންވަރަށް ލުއިތަކެއް އަދި ފަސޭހަތަކެއް ހޯދައިދެއްވުމެވެ.
އެމްޕްލޯއިމަންޓް ބެނެފިޓް ސްކީމްގެ ސަބަބުން ލިބޭނެ މަންފާތަކުގެ ތަފްސީލަށް ވަޑައިގަންނަވަމުން ރައީސް ޔާމީން ވިދާޅުވީ، ޒުވާނުންނަށް އެންމެ ބޮޑަށް ބޭނުންވެފައިވަނީ، ރަނގަޅު އާމްދަނީއެއް ލިބޭނެ ވަޒީފާ ކަމަށާއި މި ސްކީމްގެ ތެރެއިން ޒުވާނުންނަށް ބޭނުންވާ ގިނަ ކަންކަން ފުރިހަމަ ވެގެން ދާނެކަމަށެވެ. މިގޮތުން، ރަށުން ނުވަތަ މާލެ ސަރަހައްދުން ގެދޮރު ހޯދުމަށް، މި ސްކީމްގެ ތެރެއިން ޑިޕޮޒިޓް ފައިސާ ދެއްކޭނެ ކަމަށް ވިދާޅުވި އެވެ. މި ސްކީމަށް ތަރުހީބު ބޮޑު ނަމަ، ހިޔާ މަޝްރޫއުގެ ދަށުން، ރިސޯޓް މުވައްޒަފުންނަށް ހާއްސަ ފްލެޓްތަކެއް ގާއިމްކުރުމަށް އިންވެސްޓް ކުރެވިދާނެ ކަމަށް ވެސް ރައީސް ވިދާޅުވި އެވެ. އަމިއްލަ އާއިލާއަށް، ނުވަތަ ދަރިންނަށް ތައުލީމު ދޭން ނުވަތަ ބޭސްފަރުވާއަށް ދާން ބޭނުންވާނަމަ، އެކަންވެސް، މި ސްކީމްގެ ތެރެއިން ކުރެވޭނެކަމަށް އެމަނިކުފާނު ވިދާޅުވި އެވެ.
މި ސްކީމްގެ މަންފާތައް އަދި ނިމުނީ އެވެ ނޫނެވެ. މި ސްކީމްގެ ތެރެއިން، އިންވެސްޓް ކުރުމަށް ފުރުސަތުތައް ހޯދައިދެއްވާނެ ކަމަށް ރައީސް ވިދާޅުވި އެވެ. އެގޮތުން، ދިރާގު ކަހަލަ ބޮޑެތ ކުންފުނި ތަކުގައި ނުވަތަ އަމިއްލަ މީހުންގެ ކުންފުނި ތަކުގަ، އިންވެސްޓް ކުރުމުގެ ފުރުސަތު ހޯއްދަވާ ދެއްވާނެ ކަމަށް ރައީސް ޔާމީން ވިދާޅުވި އެވެ.
އެމްޕްލޯއިމަންޓް ބެނެފިޓް ސްކީމްގެ އެންމެ ހާއްސަ މަގުސަދަކީ ޓްއަރިޒަމްގެ ނަފާ އެންމެންނަށް ބެހިގެންދާނެ ގޮތްތަކެއް ހޯއްދަވައިދެއްވުމެވެ. މި ސްކީމްގެ ތެރެއިން، މެދުފަންތީގެ ވިޔަފާރިތަކަށް ވެސް ސަރުކާރުގެ ހިއްސާއަކާ އެކު ވިޔަފާރީގެ ގެރެންޓީތައް ވެސް ދެވޭނެ ކަމަށް ރައީސް ވިދާޅުވި އެވެ. އޭގެ ސަބަބުން، ވިޔަފާރި ހުއްޓާލަން ނުޖެހި ކުރިއަށް ގެންދެވޭނެ އެވެ. އަނެއް ބޭނުމަކީ، ރިޒޯޓްތަކުގައި މުވައްޒަފުންނަށް އެ މީހުން މަސައްކަތް ކުރާ ރިޒޯޓްތަކުގެ ހިއްސާ ގަތުމުގެ ފުރުސަތުވެސް ހޯއްދަވާ ދެއްވުން ކަމަށް ރައީސް ޔާމީން ވިދާޅުވި އެވެ.
ރައީސް ޔާމީންގެ މިވައުދުގެ ސަބަބުން، ޒުވާނުންނަށް، ޙާއްސަކޮށް ޓޫރިޒަމް ދާއިރާގައި މަސައްކަތްކުރާ ޒުވާނުންނަށް މި ގެނެސްދެވެނީ އަނެއްކާ ވެސް ބޮޑު އުންމީދެކެވެ. މި ފޮނި އުއްމީދާ އެކު ރިސޯޓް މުވައްޒަފުންނަށް ވެސް ފަސޭހައިން ބޯހިޔާވަހިކަން ހޯދުމާއި ވިޔަފާރިތައް ފަށައި އާމްދަނީ އިތުރުކުރުމަށް މިއީ ހުޅުވޭ ރަނުގެ ފުރުސަތެކެވެ.