ރާއްޖޭގެ ވެރިކަން ހިންގުމުގެ ނިޒާމް ބަރުލަމާނީ ނިޒާމަކަށް ބަދަލު ކުރާ ވާހަކަތަކާ ކުރީގެ ރައީސް މައުމޫން އަބްދުލް ގައްޔޫމް ދެކޮޅު ހަދާކަން ހާމަވެއްޖެ އެވެ.
އިދިކޮޅު އިއްތިހާދުގެ ފަރާތުން މިހާތަނަށް އަދާލަތު ޕާޓީ އާއި އެމްޑީޕީ އިން މެނިފެސްޓީއެއް ނެރެފައިވާ އިރު އިދިކޮޅު އިއްތިހާދުގެ ކެންޑިޑޭޓު އިބްރާހިމް މުހައްމަދު ސޯލިހު (އިބޫ) ނިސްބަތްވާ ޕާޓީ އެމްޑީޕީގެ މެނިފެސްޓޯގައި ބަރުލަަމާނީ ނިޒާމެއްގެ ތެރެއިން ވެރިކަން ހިންގާ ގޮތަށް ގާނޫން އަސާސީ ބަދަލު ކުރުން ހިމެނެ އެވެ. އެ މެނިފެސްޓޯގައި "ވަގުތީ ސަރުކާރެއް ހިންގާނެ ގޮތް"، އެ ބައިގެ ބުނެފައިވަނީ ރާއްޖޭގެ ވެރިކަން ހިންގުމުގެ ނިޒާމުގެ ތެރޭގައި ވަކި ޕާޓީއަކަށް ވެރިކަން ހިންގަން ބޭނުންވާ މެޖޯރިޓީ ނުލިބިއްޖެ ނަމަ ސިޔާސީ ޕާޓީތައް ގުޅިގެން އެކުލެވޭ ކޯލިޝަންތަކަށް ގާނޫނީ ހައިސިއްޔަތު ލިބެން ޖެހޭނެ ކަމަށެވެ. އަދި ވެރިކަމުގެ ބާރުތައް މިހާރަށް ވުރެ ބޮޑަށް ބަހާލެވޭނެ ނިޒާމެއް ގާއިމް ކުރަން ޖެހޭ ކަމަށް ބުނެފައިވެ އެވެ.
އެގޮތުން ގާނޫން އަސާސީ އިސްލާހު ކުރުމަށް ފަހު އެކުލެވޭ ސަރުކާރެއްގައި ބޮޑު ވަޒީރާއި އޭނާގެ ކެބިނެޓު އެކުލަވާލެވޭނީ މަޖިލިސްގެ ތެރެއިން ކަމަށާއި އެ ބަދަލު ގެނައުމުން ސަރުކާރުގެ މަތިބަރުކަން މާބޮޑަށް ކުޑަވެގެން ދާނެ ކަމަށް އެމްޑީޕީގެ މެނިފެސްޓޯގައި ބުނެފައިވެ އެވެ.
ނަމަވެސް ރައީސް މައުމޫން ހިންގަވާ، "މައުމޫން ރީފޯމް މޫވްމަންޓު"ގެ މެނިފެސްޓޯ ރޭގެ ވަގުތެއްގައި ވަނީ ނެރެ އާންމުކޮށްފަ އެވެ. އެ މެނިފެސްޓޯގައިވާ ގޮތުން ވެރިކަމާއި ދައުލަތް ބައްޓަން ކުރަން ޖެހޭނީ ރިޔާސީ ނިޒާމެއްގެ ތެރެއިން ކަމަށް ބުނެފައިވެ އެވެ. އަދި އެ ނިޒާމުގެ ތެރެއިން ޖުޑިޝިއަރީ އާއި ރައްޔިތުންގެ މަޖިލީހާއި އެގްޒެކެޓިވް ބާރުތައް ހަރުދަނާ ކުރެވޭނެ ގޮތްތައް އެ މެނިފެސްޓޯގައި ވަނީ ހިމަނައިފަ އެވެ.
އެމްއާރްއެމްގެ މެނިފެސްޓޯގައި ރިޔާސީ ނިޒާމުގެ ތެރެއިން ޖުޑިޝަރީ ރީފޯމް ކުރުމަށް ކަނޑައަޅާފައިވަނީ ޖުޑިޝިއަލް ސާވިސް ކޮމިޝަން އެކުލެވޭ ގޮތާއި ލިބިދީފައިވާ ބާރުތަކަށް ބަދާލު ގެނައުމާއި ޖުޑިޝިއަރީގެ ބަޖެޓު ފާސް ކުރުމުގައި ސަރުކާރުގެ ދައުރު ކުޑަ ކުރުމާއި ރީފޯމް ކުރުމަށް ބެރުގެ މާރިހުންގެ އެހީ ހޯދުން ހިމެނެ އެވެ. އަދި މަޖިލީހުގެ ބާރު ހަރުދަނާ ކުރުމަށް މަޖިލިސް ބައިކެމަރަލް (ދެ ގެ އެކުލެވޭ) ނިޒާމަކަށް ބަދަލުކޮށް ދިގު މުއްދަތަކަށް ގައުމީ ހިދުމަތުގައި ދެމިތިބެ ތަޖުރިބާ ލިބިފައިވާ ފަންނީ މާހިރުން އިންތިހާބު ކުރެވޭ ސެންޓަރެއް ގާއިމް ކުރާން ވަނީ ނިންމައިފަ އެވެ. އެގްޒެކެޓިވް ހަރުދަނާ ކުރުމަށް ނިންމާފައި ވަނީ މަޝްރޫއުތައް އެކުލަވާލާނެ އެންމެ ރަނގަަޅު ގޮތް ދެނެގަތުމަށް "ނޭޝަނަލް ޕްލޭނިން ކައުންސިލް"އެއް އުފެއްދުމަށާއި ސިޔާސީ މަގާމްތައް މަދު ކުރުމާއި ސަލާމަތީ ބާރުތައް ސިޔާސީ ނުފޫޒުން އެއްކިބާ ކުރުމެވެ.
ބަރުލަމާނީ ނިޒާމަކަށް ރައީސް މައުމޫން ތާއީދު ނުކުރާއިރު ޖުމްހޫރީ ޕާޓީގެ ލީޑަރު ގާސިމް އިބްރާހިމް މީގެ ކުރިން ނެރުނު ބަޔާނެއްގައި ވެސް ބަރުލަމާނީ ނިޒާމަށް ތާއީދު ނުކުރާ ކަމަށް ވަނީ ވިދާޅުވެފަ އެވެ.
އިބޫ ވިދާޅުވެފައި ވަނީ އިދިކޮޅު އިއްތިހާދުގެ މެނިފެސްޓޯއެއް ވަރަށް އަވަހަށް ނެރޭނެ ކަމަށެވެ. އެ މެނިފެސްޓޯއަކީ އެމްޑީޕީ އެމްއާރްއެމް އޭޕީ އަދި ޖޭޕީގެ މެނިފެސްޓޯގައި ހިމެނޭ ކަންކަމަށް މަޝްވަރާ ކުރުމަށް ފަހު އެއްބަސްވެވޭ އެއް މެނިފެސްޓޯއަކަށް ވެގެންދާނެ ކަމަށެވެ.