ބެސްޓް ބައި މޯލްޑިވްސް (ބީބީއެމް) އާއި މެރާކީ ގުޅިގެން އަންނަ މަހު ބާއްވާ ހޮޓެލް އޭޝިއާ ފެއާގައި ފުރަތަމަ ބަރިސްތާ ޗެލެންޖު ބާއްވަން ނިންމައިފި އެވެ.
ހޮޓެލް އޭޝިއާ ފެއާގެ މެއިން ސްޕޮންސަރު ބީބީއެމްއިން ބުނީ އަންނަ މަހުގެ ނުވަ ވަނަ ދުވަހު ދަރުބާރުގޭގައިފަށާ، ހޮޓެލް އޭޝިއާ އެގްޒިބިޝަން އެންޑް ކަލިނަރީ ޗެލެންޖު 2018 ގައި އޮންނަ ރާއްޖޭގެ ފުރަތަމަ ބަރިސްތާ ޗެލެންޖުގެ ބޭނުމަކީ ސްޕެޝާލިޓީ ކޮފީ އިންޑަސްޓްރީ ތަރައްގީވެ ކުރިއަރަމުން އަންނައިރު، މި ދާއިރާގައި މަސައްކަތް ކުރާ މީހުންނަށް ފުރުސަތުތައް ހުޅުވައިދޭ އިތުރަށް ވަޒީފާގެ ފުރުސަތުތައް ތަނަވަސްކޮށްދިނުން ކަމަށެވެ.
ބަރިސްތާ ޗެލެންޖުގައި ޖަޖުންގެ ގޮތުގައި ބައިވެރިވަނީ ދުނިޔޭގައި މި ދާއިރާގައި މަގުބޫލު ނަން ތަކެވެ. މިގޮތުން ވޯލްޑް ބަރިސްތާ ޗެމްޕިއަންޝިންގެ އެއް ޖަޖު ކަމަށްވާ މާރިއާ ޔުދަވަތީ އާއި ދެކުނު އިރުމަތީ އޭޝިއާގެ ފުރަތަމަ ކިއު ގްރޭޑް އިންސްޓްރަކްޝަރު ކަމަށްވާ އެޑި ތަރޮއެޕްރެތިޖިކާ އާއި އިންޑޮނޭޝިއާގައި 2014 ވަނަ އަހަރު ބޭއްވި ބަރިސްތާ ޗެމްޕިއަންޝިޕް ޖަޖު ރޮނާލްޑް ޕްރަސަންތޯ ހިމެނެ އެވެ.
މޯލްޑިވްސް އެގްޒިބިޝަން އެންޑް ކޮންފަރެންސް ސާވިސަސް (މެކްސް) އިން އިންތިޒާމުކޮށްގެން ބާއްވާ ހޮޓެލް އޭޝިއާ ފެއާގައި 46 ގައުމަކުން 250 ކުންފުނި ބައިވެރިވެފައިވެ އެވެ.