މާލޭގައި މިހާރު ހިންގަމުން އަންނަ މާރަމާރީތައް މަދު ކުރުމަށްޓަކައި ހާއްސަ އޮޕަރޭޝަންތަކެއް ހިންގަމުން އަންނަ ކަމަށް ފުލުހުން މިއަދު ބުނެފި އެވެ.
އެމްއެމްއޭ ކައިރީ މާރަމާރީއެއް ހިންގާ އުމުރުން 18 އަހަރުގެ ކުއްޖަކު މިރޭ މަރާލި ހާދިސާއާ ގުޅިގެން ފުލުހުން ނެރުނު ބަޔާނުގައި ބުނެފައި ވަނީ އެކަން ސީރިޔަސް މައްސަލައެއް ގޮތުގައި ތަހުގީގު ކުރަމުންދާ ކަމަށެވެ. މާރަމާރީތައް ހުއްޓުވައި އެފަދަ އަމަލުތައް ހިންގަން ހިތްވަރުދޭ ފަރާތްތަކުން ހޯދާ މިފަދަ ކުށްތައް މަދު ކުރުމަށް ހާއްސަ މަސައްކަތްތަކެއް ފުލުހުން ކުރަމުންދާ ކަމަށާއި އެފަދަ އަމަލުތައް ހިންގާ ފަރާތްތަކަށް ފިޔަވަޅު އަޅާނެ ކަމަށް ވެސް އެ ބަޔާނުގައި ބުނެފައިވެ އެވެ.
ފުލުހުން އިތުރަށް ބުނީ ރާއްޖޭގެ ވެރިރަށް މާލެ ނުރައްކާތެރި ތަނެއްގެ ގޮތުގައި ސިފަކުރުމަށް ކުށުގެ ރޫހު ހަރުލެއްވުމަށް އެއްވެސް ފަރާތަކަށް ފުރުސަތެއް ނުދޭނެ ކަމަށެވެ.
މިރޭ ކުއްޖަކު މަރާލާފައިވާ އިރު މި ހަފްތާގެ ތެރޭގައި ވެސް މާލޭގައި ގިނަ މާރަމާރީތަކެއް ހިނގި އެވެ. ނަމަވެސް އެ މައްސަލަތަކާ ގުޅިގެން މިހާތަނަށް މީހަކު ހައްޔަރު ކުރިކަމެއް އެނގިފައެއް ނުވެ އެވެ.