ޕީޕީއެމްގެ މެންބަރު ކަމުން ވަކި ކުރިޔަސް ޖެހިލުމެއް ނުވާ ކަމަށާއި ތާއީދު ކުރައްވާނީ އިދިކޮޅު އިއްތިހާދުގެ ކެންޑިޑޭޓު އިބްރާހިމް މުހައްމަދު ސޯލިހު (އީބޫ)އަށް ކަމަށް ފުވަމުލަކު މެދު ދާއިރާގެ މެންބަރު އަލީ ފަޒާދު ވިދާޅުވެއްޖެ އެވެ.
އިދިކޮޅު އިއްތިހާދުން ހއ. ހޯރަފުށީގައި މިރޭ ބޭއްވި ޖަލްސާގައި ބައިވެރިވެވަޑައިގެން ވާހަކަދައްކަވަމުން ފަޒާދު ވިދާޅުވީ އޭނާ ސަރުކާރަށް ކުރާ ތާއީދު ދޫކޮށްލާފައި އިދިކޮޅު ފަރާތްތަކާ ގުޅިވަޑައިގަންނަން ޖެހުނު އެންމެ ބޮޑު ސަބަބަކީ ސަރުކާރުން ގާނޫނީ އިމުގެ ބޭރުން ކަންތައްތަކެއް ކުރަމުންދާތީ އާއި ޒުވާނުންނަށް އޮޅުވާލާ ދޮގު ހަދަމުންދާތީ ކަމަށެވެ.
މިސާލެއް ކަމަށް ފަޒާދު ވިދާޅުވީ ޕީޕީއެމްގެ މެނިފެސްޓޯގައި ހިމަނާފައިވާ ގޮތަށް ހުރިހާ ރަށެއްގައި ސްޕޯޓްސް އެރީނާ ގާއިމްކޮށްދިން ކަމަށް ސަރުކާރުން ބުނި ނަމަވެސް މެނިފެސްޓޯގައި ވަނީ ހަމައެކަނި ފުޓްސަލް ދަނޑެއް އެޅުން ނޫން ކަމަށް ފަޒާދު ވިދާޅުވި އެވެ. ނަމަވެސް ސަރުކާރުން އަންނަނީ ޒުވާނުންނަށް އޮޅުވާލާ ދޮގުތައް ހަދަމުން ކަމަށް އޭނާ ވިދާޅުވި އެވެ.
ދެވަނަ މައްސަލައަކަށް ފަޒާދު ފާހަގަ ކުރީ ރައްޔިތުން ސިޔާސީ މީހުން "ފަހަތުން ދުވެގެން" އާދޭސްކޮށްގެން ސަރުކަރުން ކަންކަން ކުރުވަމުންދާ މައްސަލަ އެވެ. އޭނާ ވިދާޅުވީ ގެޓް ސެޓް ލޯނާއި އެހެނިހެން ކަންކަމުގައި ވެސް ހުށަހެޅުމަށް ފަހު އެ ލިބޭނީ މަޖިލީސް މެންބަރެއް ނުވަތަ މުލިޔާގެއަށް އަދި ތީމު ގެއަށް ގޮސް ސިޔާސީ ފަރާތްތައް މެދުވެރިވާ ބަޔަކަށް ކަމަށް ފަޒާދު ވިދާޅުވި އެވެ.
އޭގެ އިތުރުން ކައުންސިލަރުންނަށް ފިޔަވަޅު އެޅުމާއި މަަޖިލީހުގެ ތެރެއިން ގާނޫންތައް ހެދުމުގައި ސަރުކާރުން އަމަލު ކުރަމުން ގެންދަވާ ގޮތާއި ގާނޫން އަސާސީ އާއި ގާނޫންތަކުގެ ބޭނުން ނަހަމަ ގޮތުގައި ހިފަމުންދާ ކަމަށް ވެސް ފަޒާދު ވިދާޅުވި އެވެ.
"އަޅުގަނޑުމެން ބޭނުން ވަނީ ކޮންމެ ކަމެއް ވިޔަސް ދިވެހި ރައްޔިތަކަށް ވީތީވެ އެ އޮންނަ އުސޫލުގެ ތެރެއިން ލިބޭނެ އިންތިޒާމު ހަމަޖެހުން، އަޅުގަނޑު ދަންނަވާނީ އެއީއޭ އެންމެ ބޮޑު ތަރައްގީއަކީ، ސިންގަޕޫރު ސިންގަޕޫރަށް ވެގެން އުޅެނީ އުސް އިމާރާތްތަކާއި ބްރިޖުތަކުގެ ސަބަބަކުން ނޫން، ހަރުދަނާ މި ދެންނެވި ކަހަލަ އުސޫލުތަކެއް ހުރެގެން، އަޅުގަނޑުމެންގެ މި ގައުމުގައި އުސޫލުތަކެއް ނެތް،" ފަޒާދު ވިދާޅުވި އެވެ.
ފަޒާދު ވިދާޅުވީ ގައުމަށް ދިމާވެފައި ހުރި އެފަދަ ހުރިހާ މައްސަލަތަކެއް ހައްލު ކުރައްވާނެ ހަމައެކަނި ލީޑަރަކަށް މިވަަގުތު ހުންނެވީ އިބޫ ކަމަށާއި އޭނާއަށް ތާއީދު ކުރައްވަނީ އެ ސަބަބާ ހެދި ކަމަށެވެ. އަދި ޕީޕީއެމް އިން ވަކި ކުރާނެ ކަމަށް އެ ޕާޓީ އިން ދައްކާ ވާހަކަތަކަށް ބިރެއް ނުގަންނަ ކަމަށާއި ޖެހިލުމެއް ނުވެ އިބޫއާ އެކުގައި މަސައްކަތް ކުރައްވާނެ ކަމަށް ފަޒާދު ވިދާޅުވި އެވެ.
ގާނޫން އަސާސީގައި ބަޔާން ކުރާ ގޮތުން ރައްޔިތުންގެ މަޖިލީސް މެންބަރުން އަމަލު ކުރަން ޖެހޭނީ ވަކި މީހެއް ނުވަތަ ވަކި ޕާޓީއެއްގެ ލާބަޔާ މަންފާއަށް ނޫން ކަމަށާއި މުޅި ގައުމާއި ހުރިހާ ރައްޔިތުންގެ ލާބަޔާއި މަންފާއަށްޓަކައި ކަމަށް ފަޒާދު ވިދާޅުވި އެވެ. އަދި އޭނާ މިއަދު ގެންދަވަނީ އެ މަސައްކަތް ކުރައްވަމުން ކަމަށް ވެސް ފަޒާދު ވިދާޅުވި އެވެ.
ހަމަހަމަ އުސޫލުތަކެއް އޮންނަ ރައްޔިތުންގެ ފައިދާއަށް މަސައްކަތް ކުރާނެ ސަރުކާރެއް ރައްޔިތުން ބޭނުން ނަމަ 23 ސެޕްޓެމްބަރުގައި އޮންނަ ރިޔާސީ އިންތިހާބުގައި އިބޫއަށް ވޯޓު ދެއްވުމަށް އެދޭ ކަމަށް ފަޒާދު ވިދާޅުވި އެވެ.
ފަޒާދު އިދިކޮޅު ފަރާތްތަކާ ގުޅުނު މައްސަލަ ޕީޕީއެމްގެ ޕީޖީ ގްރޫޕުން ވަނީ އެ ޕާޓީގެ ސުލޫކު ކޮމިޓީއަށް ހުށަހަޅައިފަ އެވެ. އެންޓި ޑިފެކްޝަން ގާނޫން އޮންނަ ގޮތުން ޕާޓީ އިން މެންބަރަކު ވަކި ކޮށްފި ނަމަ އެ މެންބަރެއް މަޖިލީހުގައި ތަމްސީލު ކުރާ ގޮނޑި ގެއްލޭނެ އެވެ.