ރާއްޖޭގެ އެކި ރަށްރަށަށް ދިމާވެފައިވާ ކަރަންޓުގެ މައްސަލަ ހައްލުކުރުމުގެ ގޮތުން ސަރުކާރުން ފައްޓަާފައިވާ "24 ގަޑިއިރު ކަރަންޓު ޔަގީން" މަޝްރޫއަށް ޗައިނާ ސަރުކާރުން ރާއްޖެއަށް 35 ޖެނަރޭޓަރު ހަދިޔާކޮށްފި އެވެ.
މި ޖެނަރޭޓަރުތައް ޗައިނާއިން ދިވެހި ސަރުކާރާ ރަސްމީކޮށް ހަވާލުކޮށްފައިވަނީ މިރޭ ޖުމްހޫރީ މައިދާނުގައި ކުރިއަށްދާ ހާއްސަ ޖަލްސާއެއްގަ އެވެ. އަލަށް ލިބުނު 35 ޖެނަރޭޓަރު ބައްލަވައިގަނެ، އެ ޖެނަރޭޓަރުތައް ރަށްތަކަށް ފޮނުވުމުގެ މަސައްކަތް އިފްތިތާހުކޮސްދެއްވީ ރައީސް ޔާމީންގެ އަނބިކަނބަލުން ފާތިމަތު އިބްރާހިމް އެވެ.
މީހުން ދިރިއުޅޭ ހުރިހާ ރަށަކަށް 24 ގަޑިއިރު ކަރަންޓު ކަށަވަރުކޮށްދިނުމަކީ ރައީސް ޔާމީންގެ ރިޔާސީ ވައުދުފުޅެކެވެ. އެހެންކަމުން ޗައިނާއިން މިރޭ ހަދިޔާކުރި 35 ޖެނަރޭޓަރު ވެގެންދާނީ ސަރުކާރުގެ ކަރަންޓު ދިނުމުގެ މަޝްރޫއަށް ލިބޭނެ ވަރަށް ބޮޑު ކުރިއެރުމެކެވެ.
މިރޭގެ ޖަލްސާގައި ސަރުކާރުގެ ހަކަތައާއި ބެހޭ މިނިސްޓަރު ތޯރިގް އިބްރާހިމް ވިދާޅުވީ، ޗައިނާއިން މިރޭ ހަދިޔާކުރި ޖެނަރޭޓަރުތައް އެކި ރަށްތަކަށް ފޮނުވައި އެލޮކޭޓްކުރުމުގެ މަސައްކަތް މި ހަފްތާގެ ތެރޭގައި ފަށާނެ ކަމަށެވެ. އަދި ކަރަންޓު ލިބުން ދަތިވެފައިވާ ރަށްތަކަށް ދިމާވެފައިވާ މައްސަލަތައް ހައްލުކޮށްދެއްވާނެ ކަމަށް މިނިސްޓަރު ވިދާޅުވި އެވެ.
ސަރުކާރުގެ 24 ގަޑިއިރު ޔަގީން ކަރަންޓު މަޝްރޫއުގެ ކާމިޔާބީ ފާހަގަކުރުމަށް ޖުމްހޫރީ މައިދާނުގައި މިރޭ ވަނީ ހަވާގެ ކުޅިވަރުތައް ވެސް ދައްކާލާފަ އެވެ.