ބޮލީވުޑް އެކްޓަރުންގެ ތެރެއިން ސުޝާންތު ސިންހު ރާޖްޕުތުއަކީ އިންސްޓަގުރާމްގައި ވަރަށް އެކްޓީވް އެކްޓަރެކެވެ. އިންސްޓަގުރާމްގައި ޕޯސްޓުކުރާ ފޮޓޯތަކަށް ކޮމެންޓުކުރާ ފޭނުންނަށް ވެސް އާންމުކޮށް އޭނާ ޖަވާބުދެ އެވެ. އެކަމަކު ސުޝާންތު މިހާރު ހުރީ ރުޅިގަދަވެފަ އެވެ.
މާ ގިނަ ފޭނުންގެ މެސެޖުތަކަށް ޖަވާބުދޭއިރަށް އިންސްޓަގުރާމުން އިރުއިރުކޮޅާއި އޭނާ ބްލޮކް ކުރަނީ އެވެ.
އިންސްޓަގުރާމުގައި ކޮމެންޓް ނުކުރެވޭ ގޮތަށް ބްލޮކް ކުރުމާއި ގުޅިގެން އެކަމާއި ހިތްހަމަނުޖެހި ސުޝާންތު ވަނީ ޕޯސްޓެއްކޮށްފަ އެވެ. އަދި އެ ޕޯސްޓުގައި "އަބަދު އަހަރެން ބްލޮކް ކުރަނީ ކީއްވެ؟" ލިޔެފައިވެ އެވެ.
ސުޝާންތު މިހާރު އަންނަނީ ތިން ފިލްމެއްގެ މަސައްކަތް ކުރަމުންނެވެ. އެއީ އަބީޝޭކް ކަޕޫރްގެ ފިލްމު "ކެދަރުނާތު" އާއި އަބީޝޭކް ޗައުބޭގެ ފިލްމު "ސޮންޗިރިޔާ" އަދި "ދި ފޯލްޓް އިން އަވާ ސްޓާސް" ގެ ހިންދީ ރީމޭކް ފިލްމެވެ.