ކުޅަދާނަ އެކްޓަރު ރާޖްކުމާރް ރާއޯ އަނެއްކާވެސް، ޑައިރެކްޓަރު ހަންސަލް މެހެތާގެ ފިލްމަކަށް ސޮއިކޮށްފި އެވެ. ފިލްމުގެ ނަމަކީ "ތުރަމް ޚާން" އެވެ. މިއީ ހަންސަލްގެ ފިލްމަކުން ރާޖްކުމާރް ފެނިގެންދާނެ ހަ ވަނަ ފަހަރެވެ.
ރާޖްކުމާރްއާއެކު މި ފިލްމުގައި ލީޑުން ފެނިގެންދާނީ މިއަހަރު ނިކުތް ކޮމެޑީ ފިލްމު "ސޯނޫ ކޭ ޓިއްޓޫ ކީ ސްވްޓީން" މަޝްހޫރުކަން ހޯދި ބަތަލާ، ނުޝްރަތު ބަރޫޗާ އެވެ. މި ދެމީހުން އެކުގައި ފިލްމަކުން ފެނިގެންދާނެ މިއީ ދެ ވަނަ ފަހަރެވެ. މީގެ ކުރިން ފެނިގެންދިޔައީ، ކްރައިމް ޑްރާމާ ފިލްމު "ލަވް ސެކްސް އޯރް ދޯކާ" އިންނެވެ.
ޑައިރެކްޓަރު ހަންސަލް ވަނީ މި ހަބަރު ޓުވިޓާ މެދުވެރިކޮށް ކަށަވަރުކޮށްދީފަ އެވެ.
މި ފިލްމު ޕްރޮޑިއުސްކުރަނީ ލަވް ރަޖަން އާއި އަޖޭ ދޭވްގަން އެވެ. ސޯޝިއަލް ކޮމެޑީއެއްގެ ގޮތުގައި ގެނެސްދޭ މި ފިލްމު ޝޫޓުކުރަނީ އުއްތުރަ ޕްރަދޭޝްގަ އެވެ. ފިލްމުގެ މަސައްކަތްތައް ފަށާނީ މި އަހަރު ފަހުކޮޅުގަ އެވެ.