މި އަހަރުގެ މިހާތަނަށް އައިއިރުގައި ބޮލީވުޑްގެ މަޝްހޫރު ގިނަ ފަންނާނުންނެއް ވަނީ ޗުއްޓީ ހޭދަކޮށްލުމަށް ރާއްޖެ އައިސްފަ އެވެ. ބައެއް ފަންނާނުން އެކި ފަހަރު މަތިން ރާއްޖެ އައިސްފައިވެ އެވެ. އެމީހުންގެ މެދުގައި ރާއްޖެއަކީ މަގުބޫލު މަންޒިލަކަށް މިހާރު ވަނީ ވެފަ އެވެ.
ބޮލީވުޑްގެ ބަތަލާ ސޮނާކްޝީ ސިންހުވެސް ރާއްޖެ މިއައީ ދެ ވަނަ ފަހަރަށެވެ. މިފަހަރު ސޮނާކްޝީ ރާއްޖެއައީ އޭނާގެ ގާތް ދެ ރަހުމަތްތެރިންނާއެކު އެވެ. އެމީހުން ރާއްޖެ އައީ އިއްޔެ މެންދުރުފަހު އެވެ.
އެމީހުން ޗުއްޓީ ހޭދަކުރަމުން އަންނަނީ ސިއްރު ފެންފުށި ރިސޯޓުގަ އެވެ. އެ ރިސޯޓުގެ ހިތްގައިމު މަންޒަރުތައް ސޯޝަލް މީޑިއާ މެދުވެރިކޮށް ސޮނާކްޝީ އަންނަނީ ފޭނުންނާއި ހިއްސާކުރަމުންނެވެ. މިދިޔަ އަހަރު އޭނާ ޗުއްޓީ ހޭދަކުރީ ކޮކޯ ބޮޑު ހިތި ރިސޯޓުގަ އެވެ.
ސޮނާކްޝީ އެންމެފަހުން ފެނިގެންދިޔައީ މިދިޔަ މަހު 24 ގައި ނިކުތް ކޮމެޑީ ފިލްމު "ހެޕީ ބާގް ޖައެގީ ރިޓާންސް" އިންނެވެ. ދެން އެންމެ އަވަހަށް އަންނަ އަހަރު ނިކުންނަ ސަލްމާން ޚާންގެ ފިލްމު "ދަބަންގް 3" އިންނެވެ.