މި އަހަރުގެ ފުރަތަމަ ހަ މަސް ދުވަހުގެ ތެރޭގައި އެންޓި ކޮރޮޕްޝަން ކޮމިޝަން (އޭސީސީ) އިން ތަހުގީގު ކުރުމަށް ފަހު ޕީޖީ އޮފީހަށް ދައުވާ ކުރަން ފޮނުވި މައްސަލަތަކުން 108 މިލިއަން ރުފިޔާ ދައުލަތަށް އަނބުރާ ލިބެން ޖެހޭ ކަމަށް އެ
ކޮމިޝަން އިން ބުނެފި އެވެ.
އޭސީސީ އިން މިއަދު ހާމަ ކުރި މި އަހަރުގެ ފުރަތަމަ ހަ މަހުގެ ތަފަސް ހިސާބުތަކުން ދައްކާ ގޮތުން، އެ މުއްދަތުގައި ނާޖާއިޒް ފައިދާ ހޯދައިދިނުމުގެ ފަސް މައްސަލައެއްގައި ނުވަ ދައުވާއެއް ކުރުމަށް ވަނީ ފޮނުވައިފަ އެވެ. އެ މައްސަލާގައި ދައުވާ އުފުލާފައި ވަނީ ތިން މީހަކަށް ކަމަށާއި އޭގެ ތެރޭގައި ދެ އަންހެނުންނާއި އެއް ފިރިހެން މުއައްޒަފަކު ހިމެނޭ ކަމަށް
އޭސީސީ އިން ބުންޏެވެ.
އޭސީސީ އިން ބުނީ މި އަހަރު ޕީޖީ އޮފީހަށް ފޮނުވާފައިވާ މައްސަލަތަކުގެ ތެރޭގައި ޖުމްލަ 130,280,223 ރުފިޔާ ހިމެނޭ ކަމަށާއި އޭގެ ތެރެއިން 108,749,100 ރުފިޔާ ދައުލަތަށް އަނބުރާ ލިބެން ޖެހޭ ކަމަށެވެ.
މިދިޔަ އަހަރުގެ ފުރަތަމަ ހަ މަސް ދުވަހާ އަޅާބަލާއިރު މި އަހަރު އޭސީސީ އިން ފޮނުވާފައިވާ މައްސަލަތައް ވަނީ އިތުރުވެފަ އެވެ. އެގޮތުން މިދިޔަ އަހަރުގެ އެ މުއްދަތުގެ ތެރޭގައި ފޮނުވާފައި ވަނީ ދެ މައްސަލައެއްގައި ފަސް ބާވަތެއްގެ ދައުވާ ކުރުމަށެވެ. އެ މައްސަލަތަކުގައި ޝާމިލުވާ ހަތް ފަރާތަކަށް ވަނީ ދައުވާކޮށްފަ އެވެ.