އެނބޫދޫ ފަޅުގައި ހިލްޓަން ކަލެކްޝަންގެ ސައި ލެގޫން މޯލްޑިވްސް

އެނބޫދޫ ފަޅުގައި ހިލްޓަން ކަލެކްޝަންއިން ސައި ލެގޫން މޯލްޑިވްސްގެ ނަމުގައި ހަދާ ރިސޯޓު އަންނަ އަހަރު ހުޅުވާނެ ކަމަށް އެ ކުންފުނިން ބުނެފި އެވެ.

ޓޫރިޒަމް ހަބަރުތައް ގެނެސްދޭ ސައިޓުތަކުގައިވާ ގޮތުން އެނބޫދޫ ފަޅުގައި ސައި ލެގޫން މޯލްޑިވްސް ހުޅުވުމުގެ ގޮތުން، ތައިލެންޑުގެ ދެވަނަ އަށް އެންމެ ބޮޑު ކުންފުނި ކަމަށްވާ ސިންހަ އެސްޓޭޓާއި ސިއުރޯ ކަލެކްޝަން ބައި ހިލްޓާއާ ދެމެދު ވަނީ ފްރެންޗައިޒް އެގްރީމެންޓެއްގައި ސޮއިކޮށްފަ އެވެ.

އެ ކުންފުނިން ބުނެފައިވާ ގޮތުގައި ޑުލެކްސް ރޫމް އާއި ބީޗް ވިލާ އަދި އޯވަ ވޯޓާ ވިލާ ހިމެނޭ ގޮތަށް 198 ކޮޓަރި ހިމެނޭ ކަމަށެވެ.

ރާއްޖޭގެ ޓޫރިޒަމް 45 އަހަރުވީ ތާރީހުގައި ހިންގާ އެންމެ ބިޔަ މަޝްރޫއުގެ ދަށުން، ވަކިވަކި ލައިފްސްޓައިލް ކޮންސެޕްޓްތަކަށް ނުވަ ރަށެއް ތަރައްގީކުރާނެ އެވެ. މި މަޝްރޫއުގެ ދަށުން ފުރަތަމަ ފިޔަވަހީގައި ތިން ރަށެއް ތަރައްގީކުރާއިރު މި ތަންތަނަށް 311.5 މިލިއަން އެމެރިކާ ޑޮލަރު (ގާތްގަނޑަކަށް 4.8 ބިލިއަން ރުފިޔާ) އިންވެސްޓް ކުރާނެ އެވެ.

މި މަޝްރޫއުގެ ދަށުން ހިންގާ ރިސޯޓުތަކުގައި ޖުމުލަ 1،300 ކޮޓަރި ހުންނާނެ އެވެ. އަދި މި މަޝްރޫއާއެކު 7،000 ވަޒީފާގެ ފުރުސަތު އުފެދޭނެ ކަމަށް އެ ކުންފުނިން ބުނެފައިވެ އެވެ. ވެލާނާ އިންޓަނޭޝަނަލް އެއާޕޯޓުން ފުރައިގެން ސްޕީޑް ލޯންޗުގައި 10 މިނެޓުން ދެވޭ ރާސްތާގައި ތަރައްގީ ކޮށްފައިވާ އެނބޫދޫ ލެގޫން މަޝްރޫއު ތަރައްގީކުރަނީ 3،000 ކޮޓަރި ހުންނާނެ ގޮތަށެވެ.