އިދިކޮޅު ކޯލިޝަންގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު، އިބޫގެ މައި ކެމްޕެއިން އޮފީސް ފުލުހުން ހިސޯރުކޮށްފައިވާ ކަމަށާއި އެކަން ކޮށްފައިވަނީ ކޯޓް އަމުރެއްނެތި ކަމަށް އިބޫގެ ރަސްމީ ކެމްޕޭން އެޖެންޓް އަދި ގާނޫނީ ވަކީލް ހިސާން ހުސެއިން ވިދާޅުވެއްޖެ އެވެ.
ފުލުހުން ބުނީ، އިބޫގެ ކެމްޕެއިން އޮފީސް ހުންނަ ސޯލްޓް ކެފޭއަށް ވަނީ އެތަނުގައި ގަވާއިދާ ހިލާފު ކަންތައްތަކެއް ކުރަމުންދާތީ އެކަން ހުއްޓުވުމަށް ކަމަށެވެ.
މިރޭ އެ އިމާރާތުގެ ކުރިމަތީ މީޑިއާއާ ބައްދަލުކުރައްވައި ހިސާން ވިދާޅުވީ، މިއަދު އިރުއޮއްސި 6:00 ގައި ވަނީ އިދިކޮޅު ކެމްޕެއިންތައް ނިންމާލާފައި ކަމަށާއި ނަމަވެސް މިއަދު ހަވީރު 4:00 އިން ފެށިގެން ފުލުހުން ވަނީ އިދިކޮޅު މައި ކެމްޕޭން އޮފީސް "ހިސޯރުކޮށްފައި" ކަމަށެވެ. ނަމަވެސް ފުލުހުން އަތުގައި ކޯޓް އަމުރެއްނެތް ކަމަށް އެބޭފުޅުން ވިދާޅެފައިވާ ކަމަށް ހިސާން ވިދާޅުވި އެވެ.
"ނަމަވެސް ފުލުހުން ބޭރުގަ [ސޯލްޓް ކެފޭ] އާއި ކެމްޕޭނު އޮފީސް ދޮރުމަތީގައިވެސް ހަރަކާތްތެރިވަމުން ވަޑައިގަންނަވާ،" ހިސާން ވިދާޅުވި އެވެ.
ހިސާން ވިދާޅުވީ، ކޯޓް އަމުރެއްނެތި އެގޮތަށް އަމަލު ނުކުރެވޭނެ ކަމަށް ތަކުރާރުކޮށް ދަންނަވާފައިވާ ކަމަށެވެ. ހިސާން ވަނީ ފުލުހުންނާއި ސފައިންނަށް ގާނޫނީ އިމުން ބޭރުން ގާނޫނުގައި ނެތް ގޮތަކަށް އަމަލު ނުކުރުމަށް އިލްތިމާސްކޮށްފަ
އެވެ.
"އަޅުގަނޑުމެން މިތިބީ ސުލްހަވެރި ސިޔާސީ ހަރަކާތްތަކަށް ނުކުމެ އެހެންވީމަ، ތިބޭފުޅުން އެ މަސައްކަތްތަކަށް އެއްވެސް ގޮތަކަށް ގާނޫނީ އިމުން ބޭރުން ހުރަސް ނާޅުއްވާ،" ހިސާން ވިދާޅުވި އެވެ.
ހިސާން ވިދާޅުވީ، އެ އޮފީހަކީ އިދާރީ ހުރިހާ މަސައްކަތްތަކެއް ހިންގަމުން އަންނަ މައި އޮފީސް ކަމަށާއި އެކަމުގެ ސަބަބުން ދަތިތަކާއި ކުރިމަތިވާނެ ކަމަށެވެ. އަދި ވިދާޅުވީ، އެތަން ބަންދުކޮށްފައިވަނީ ކޮން ސަބަބަކާ ގުޅިގެންކަން އެއްވެސް ފަރާތަކުން ރަސްމީ ހައިސިއްޔަތަކުން އަންގާފައިނުވާ ކަމަށެވެ. އަދި މުޅި ކެމްޕޭން ހިންގާފައިވާނީ ގާނޫނީ އިމުގެ ތެރެއިން ކަމަށާއި ގާނޫނާ ހިލާފު އެއްވެސް އަމަލެއް ހިންގާފައިނުވާނެ ކަމަށްވެސް ހިސާން ވިދާޅުވި އެވެ.
ހިސާންގެ ތުހުމަތުތަކާ ގުޅިގެން ފުލުހުންގެ ބަހެއް ހޯދުމަށް ފުލުހުންގެ މީޑިއާ ސެކްޝަނަށާއި ޗީފް ސްޕޯކްސްޕާސަން އަހުމަދު ޝިފާންއަށް ގުޅައި މެސެޖް ކުރުމުން ވެސް އެކަމަށް ޖަވާބެއް ނުދެއްވި އެވެ. ފުލުހުން ގޮސް އިބޫގެ ކެމްޕޭން ހެޑްކުއާޓަރު މިއަދު ހަވީރު 4:00 އިން ފެށިގެން ބަންދުކޮށްގެން އުޅޭ މައްސަލަ މީހާރު ވަނީ ބައިނަލްއަގުވާމީ މީޑިއާތަކުގެ ސަމާލުކަމަށް ވެސް އައިސްފަ އެވެ. އަލްޖަޒީރާއިން ރިޕޯޓް ކުރި ގޮތުގައި މާދަމާގެ ވޯޓަށް ކުޑަތަން ވެފައި ވަނިކޮށް ފުލުހުން ގޮސް، އިދިކޮޅު ކެންޑިޑޭޓްގެ ކެމްޕޭން ހެޑް ކުއާޓަރު ވަނީ ހިފައިފަ އެވެ.