ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވަރަށް އަވަހަށް ރާއްޖެ ވަޑައިގަންނަވާނެ ކަމަށް އެމްޑީޕީއިން ބުނެފި އެވެ.
އެމްޑީޕީގެ ނައިބު ރައީސް މުހައްމަދު ޝިފާޒު މިއަދު ވިދާޅުވީ ރައީސް ނަޝީދު ވަރަށް އަވަހަށް މާލެ ވަޑައިގެން ސަޕޯޓަރުންނާ ބައްދަލު ކުރައްވާނެ ކަމަށެވެ.
ރައީސް ނަޝީދު ރާއްޖެ ވަޑައިގަންނަވާނެކަން އެމްޑީޕީއިން ހާމަކޮށްފައިމިވަނީ ރިޔާސީ އިންތިހާބުގައި އެ ޕާޓީ ހިމެނޭ ކޯލިޝަނަށް ބޮޑު ކާމިޔާބީއެއް ލިބިފައިވަނިކޮށެވެ. އިންތިހާބަށްފަހު އެމްޑީޕީއިން ބޭއްވި ފުރަތަމަ ނޫސްވެރިންގެ ބައްދަލުވުމުގައި އެ ޕާޓީއަށް ލިބުނު ކާމިޔާބީއާ ގުޅިގެން ސަޕޯޓަރުންނަށް ވަނީ މަރުހަބާ ކިޔާފަ އެވެ.
އިއްޔެގެ އިންތިހާބު އިދިކޮޅު ކޯލިޝަންގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު، އިބޫ ކާމިޔާބުކޮށްފައިވަނީ، މި އަހަރުގެ އިންތިހާބުގައި ވޯޓުލުމުގެ ހައްގު ލިބިފައިވާ 262135 މީހުންގެ ތެރެއިން ވޯޓު ލި 89.22 ޕަސެންޓް މީހުންގެ 58 އިންސައްތައާއެކު ޖުމްލަ 134,616 ވޯޓު ކާމިޔާބުކޮށްގެންނެވެ. މި ވޯޓުގައި މިހާރު ވެރިކަމުގައި ހުންނެވި ޕީޕީއެމްގެ ކެންޑިޑޭޓް ރައީސް އަބްދުﷲ ޔާމީން އަބްދުލްގައްޔޫމަށް ލިބިވަޑައިގެންފައިވަނީ 96،132 ވޯޓެވެ. އެމަނިކުފާނު މިހާރު ވަނީ ބަލި ގަބޫލު ކުރައްވާފަ އެވެ.
އިދިކޮޅު އެއް ލީޑަރު ކަމަށްވާ ރައީސް ނަޝީދު މިނިވަން ކުރައްވާނެ ކަމަށް އިބޫ ވަނީ ކެމްޕެއިންގައި ތަކުރާރުކޮށް ވިދާޅުވެފަ އެވެ. އެމަނިކުފާނުގެ އިތުރުން ވެސް ދެން ބަންދުގައި ތިއްބެވި ސިޔާސީ ބޭފުޅުންނާއި ނުހައްގުން އަނިޔާ ލިބެމުންދާ މީހުން މިނިވަން ކުރާނެ ކަމަށް އިބޫ ވައުދުވެވަޑައިގެންފައިވެ އެވެ.
