އަހަރު ނިމެން ކައިރިވެފައިވާއިރު ރާއްޖޭގައި ޓޫރިސްޓުންނަށް ހިދުމަތް ދޭ ތަންތަނުގެ އޮކިއުޕެންސީ ހުރީ 63 ޕަސެންޓުގަ އެވެ.
ޓޫރިޒަމް މިނިސްޓްރީން އާއްމު ކުރި ތަފާސްހިސާބުތައް ދައްކާ ގޮތުން މި އަހަރުގެ ރާއްޖޭގެ އޮކިއުޕެންސީ ހުރީ 74 ޕަސެންޓުގަ އެވެ. އަދި މި އަހަރު އޮކިއުޕެންސީ އެންމެ މަތިވެފައިވަނީ 81 ޕަސެންޓުގަ އެވެ. އަދި މި އަހަރު އޮކިއުޕެންސީ އެންމެ ދަށްވެފައިވަނީ 44 ޕަސެންޓަށެވެ.
މި ހިސާބުތައް ދައްކާ ގޮތުން އޮގަސްޓް މަހާ ހަމައަށް ޓޫރިސްޓުން ރާއްޖޭގައި ހޭދަކޮށްފައިވަނީ 6،270،308 ދުވަހެވެ. މިއީ މިދިޔަ އަހަރުގެ މި މުއްދަތާ އަޅާ ބަލާނަމަ 12 ޕަސެންޓް އިތުރުވުމެކެވެ. އަދި ޓޫރިސްޓުން އެވްރެޖު ގޮތެއްގައި ހޭދަކޮށްފައިވަނީ 6.4 ދުވަހެވެ.
ޓޫރިޒަމް މިނިސްޓްރީން އާއްމުކުރި ތަފާސް ހިސާބުތައް ދައްކާ ގޮތުން މި އަހަރުގެ އޮގަސްޓް މަހުގެ ނިޔަލަށް 972,839 މީހުން އައިސްފައިވެ އެވެ. މިއީ މިދިޔަ އަހަރު އައި 892,025 މީހުންނާ އަޅާ ބަލާއިރު 9.1 ޕަސެންޓް އިތުރުވެފައިވެ އެވެ. އަދި މިދިޔަ އޮގަސްޓް މަހު 123,992 މީހުން އައިސްފައިވެ އެވެ. މިއީ މިދިޔަ އަހަރުގެ އޮގަސްޓް މަހު އައި 121,310 މީހުންނާ އަޅާ ބަލާއިރު 2.2 ޕަސެންޓުގެ އިތުރު ވުމެކެވެ.