މިފަހުން ރައްޔިތުން މަޖިލީހުގެ މަސައްކަތްތައް ކުރިޔަށްދާ ގޮތާ މެދު އެންމެންގެ ކަންބޮޑުވުން ވެސް އޮތެވެ. ގާތްގަނޑަކަށް އޮތީ މަޖިލީހުގެ ބާރުތައް ހިފަހައްޓައި އޮބިއަޅުވައިފަ އެވެ. މަޖިލީހުގައި ބިލްތައް ފާސްކުރަނީ ބަހުސްވެސް ނުކޮށް ސަރުކާރުން ފޮނުވާ ގޮތަށެވެ. ކިތަންމެ ގޯސްކަމެއް ނަމަވެސް، ހިޔާލެއް ފިކުރެއް ނެތި ވެރިކަން ކުރާ ޕީޕީއެމްގެ މެޖޯރިޓީއިން ދިޔައީ މަޖިލީހަށް ސަރުކާރުން ފޮނުވާހާ އެއްޗަކަށް "ރަބަރު ތައްގަނޑު" ޖަހަމުން އެވެ. އެކަންތައް ފާލުން ނެއްޓި އެހެން މަރުހަލާއަކަށް ދިޔައީ އެ ކަންކަމާ ދެކޮޅަށް ނިކުތް މެންބަރުންތަކެއްގެ މަސައްކަތުން ރައްޔިތުންގެ މަޖިލީހަށް އަތްގަަދަކޮށްފައިވާ ޕީޕީއެމްގެ ބިޔަ "ލަޝްކަރު" ފޫއަޅުވާލައި މިދިޔަ އަހަރުގެ ޖޫން މަހު އިދިކޮޅަށް މެޖޯރިޓީ އަނބުރާލުމާ އެކު އެވެ. ސަރުކާރުން އެ ހިސާބުން މަޖިލީހުގައި "ބޮޑު ތަޅު" އެޅުވި އެވެ.
އެހާ ހިސާބުން ފެށިގެން މިއަދާ ހަމަޔަށް ވެސް މަޖިލީހުގައި އޮތީ ތަޅު އަޅުވާފައޭ ބުނަނީ ސަބަބެއް ނެތި އެއް ނޫނެވެ. ސަރުކާާރުން އަލުން މެޖޯރިޓީ ހޯދަން 12 މެންބަރުންގެ ގޮނޑި ގެއްލުވާލައި މަޖިލީހަށް ނުވަދެވޭ ގޮތް ހެދި އެވެ. އިދިކޮޅުގެ ބަހެއް ނުވިކޭތީ އަދި ފުރުސަތު ވެސް ނުދޭތީ އެއްވެސް މެންބަރަކު މަޖިލީހުގެ ޖަލްސާއެއްގައި ބައިވެރިއެއް ނުވެ އެވެ. މުޅި ފްލޯ ކޮންޓްރޯލް ކުރަނީ ޕީޕީއެމް އިންނެވެ. އެވަރުން ނިމުނީއެއް ނޫނެވެ. ޕީޕީއެމްގެ ތެރެއިން ވެސް އިދިކޮޅު ހިޔާލެއް ނުވަތަ އިދިކޮޅަށް ވޯޓު ދިން މެންބަރަކަށް އޮތީ ގޮނޑި ގެއްލުވާލާނެ ކަމުގެ ބިރު ދައްކައިފަ އެވެ. މުޅި މަޖިލީހުގެ ބާރު އޮތީ ކަނޑުވާލައިފަ އެވެ.
ޒަމާންތަކަކަށް ފަހު މިއަދު ފެށިގެން މިދިޔަ ރައްޔިތުން މަޖިލީހުގެ ޖަލްސާއިން ފެނުނީ އެއާ ހިލާފަށް ވަރަށް ތަފާތު މަންޒަރުތަކެކެވެ. މިއީ މިއިން ދުވަހަކު ރައްޔިތުން މަޖިލީހުގެ ތެރެއިން ފެނުނުނު މަންޒަރެއް ނޫނެވެ. ސަރުކާރުން ފޮނުވިހާ ބިލަކަށް "އާނއެކޭ" ބުނުން ނިމުމަކަށް އައެވެ. އެއާ ހިލާފަށް ސަރުކާރުން ހުށަހެޅި ތިން ބިލަށް ވެސް ޕީޕީއެމްގެ ގިނަ މެންބަރުން ވެސް ބުނީ "ނޫނެކޭ" އެވެ. މިނިވަންކަމާއެކު ވޯޓު ދެމުން ދިޔައީ ގޮނޑި ގެއްލޭނެ ކަމުގެ އެއްވެސް ބިރެއް ނެތި އެވެ. ގޮނޑި ނުގެއްލޭ ކަމަށް ސުޕްރީމް ކޯޓުން ދާދި ފަހުން ކަނޑައެޅި ހަތަރު މެންބަރުން ވެސް މަޖިލީހަށް ވަދެވަޑައިގެން މަސައްކަތް ކުރެއްވި އެވެ. ރައްޔިތުން އިންތިހާބު ކުރި މަސައްކަތް ހަގީގީ މިނިވަން ކަމާއެކު ކުރިތަން މިއަދު ފެނިގެން ދިޔަ އެވެ.
މެންބަރުންގެ ބަހުސް މަރުހަލާ ވެސް ކުރިޔަށް ދިޔައީ އެފަދަ ގޮތަކަށެވެ. ރައީސް އަބްދުﷲ ޔާމީންއަށް ވަފާތެރި ޕީޕީއެމްގެ މެންބަރުން އެ މެންބަރެއްގެ ހިޔާލު ފާޅު ކުރަމުން ދިޔަ ނަމަވެސް އެމަނިކުފާނަށް ތާއީދު ކުރާ ބައެއް އެހެން މެންބަރުން މިނިވަން ހިޔާލުތަކެއް ފާޅު ކުރެއްވި އެވެ. އޭގެ ތެރޭގައި ވިލުފުށީ ދާއިރާގެ މެންބަރު ރިޔާޒް ރަޝީދު އާއި ކަނޑިތީމު ދާއިރާގެ މެންބަރު މުހައްމަދު ހުސެއިން ހިމެނެ އެވެ. ފަހަކަށް އައިސް އެންމެ ބިނާ ކުރެނިވި ވާހަކަތައް މެންބަރުންގެ ފަރާތުން އިވިގެން ދިޔަ ޖަލްސާއަކަށް ވެސް މިއަދު ބޭއްވި ޖަލްސާ ވެގެން ދާނެ އެވެ. މީގެ ކުރިން މަޖިލީހުން ވެސް އިވެނީ ރައީސް ޔާމީން އަށް ތައުރީފު ކުރާ އަޑެވެ.
ޕީޕީއެމްގެ މެންބަރުން އަމިއްލަ ހިޔާލުތައް ފާޅުކުރިޔަސް އެ ޕާޓީގެ ތެރޭގައި އޮތް ބަދަހި ކަމަކަށް ވެސް އެއްވެސް ބަދަލެއް ނާދެ އެވެ. މެންބަރުން މަޖިލީހުގެ މަސައްކަތަށް ފަހު ނިކުމެވަޑައިގެން ބޭރުގައި އުޅުއްވި އިރު ވެސް މެންބަރުންގެ މޫނު މަތިން ފެނިގެން ދަނީ ހިތް ހަމަޖެހުމާއި މިނިވަން ކަމެވެ. ސިޔާސީ ފިކުރު ތަފާތުވިޔަސް ގުޅިގެން މަސައްކަތް ކުރެވޭނެ ފަދަ މަންޒަރުތަކެވެ. އެއް މެންބަރެއް އަނެއް މެންބަރަކާ ސަލާންކޮށް ބައްދާ، އުފާފާޅު ކުރި އެވެ.
ރައްޔިތުން މަޖިލީހުގެ ތަޅު ނައްޓުވާލުމަކީ އިންތިހާބީ ރައީސް އިބްރާހިިމް މުހައްމަދު ސޯލިހު ވެވަޑައިގެންފައިވާ ވައުދެކެވެ. އެމަނިކުފާނު ވިދާޅުވެފައި ވަނީ އެމަނިކުފާނު އިންތިހާބުވެ، މަގާމާ ހަވާލުވާތާ ފުރަތަމަ ދުވަހު ވެސް އެކަން ކުރައްވާނެ ކަމަށެވެ. ނަމަަވެސް އިބޫ އިންތިހާބުވި ހިސާބުން ފެށިގެން ވެސް ކަންކަން ރަނގަޅުވުމުގެ ކޮޅުމަތިއެބަ ފެނެ އެވެ. އިސްލާހު ކުރަންވީ އެތަށް ކަމެއް މަޖިލީހުގައި އަދިވެސް އެބަހުއްޓެވެ. ނަމަވެސް މަޖިލީހުގައި މިނިވަން ކަމުގެ ކުލަ ޖެހެން ވަނީ ފަށައިފަ އެވެ.