ރައިސުލްޖުމްހޫރިއްޔާ ކަމުގެ މަގާމަށް އިންތިހާބީ ރައީސް އިބްރާޙިމް މުހައްމަދު ސޯލިހު (އިބޫ) ހުވާ ކުރެއްވުން އަންނަ މަހު 17 ގައި ބޭއްވުމަށް ރައްޔިތުން މަޖިލީހުގެ ކޮމިޓީ އިން މިއަދު ފާސްކޮށްފި އެވެ.
އަންނަ މަހު 17 ގައި އިބޫ ހުވާ ކުރެއްވުމަށް ފާސް ކުރީ އެކަމަށް މިއަދު ނެގި ހާއްސަ ވަގުތީ ކޮމިޓީއަކުންނެވެ. އެ ކޮމިޓީ ބައްދަލުވުމުގައި ބައިވެރިވެވަޑައިގަތް އައްޑޫ މީދޫ ދާއިރާގެ މެންބަރު ރޮޒެއިނާ އާދަމް ވިދާޅުވީ މަޖިލީހުގެ ރައީސް އާއި އުއްތަމަ ފަނޑިޔާރު އަދި ރައީސް ޔާމީން ސޮއި ކުރައްވާފައިވާ އިގުރާރުގައި ވަނީ 17 ނޮވެމްބަރުން ފެށިގެން ފަސް
އަހަރަށް ރިޔާސީ ދައުރަކަށް ކަމަށެވެ.
އެ ގަރާރުގައި އެހެން އޮތުމާއެކު 11 ނޮވެމްބަރުގައި ހުވާ ކުރެއްވުމަށް އިބޫ ބޭނުންފުޅެއް ނުވާ ކަމަށާއި އެމަނިކުފާނުގެ އެދުމަކީ ގައުމީ މަސްލަހަތު ކުރިޔަށް ނެރުއްވައިގެން މަސައްކަތް ކުރެއްވުން ކަމަށް ރޮޒެއިނާ ވިދާޅުވި އެވެ. އަދި އިބޫ ހުވާ ކުރައްވާ ތާރީހަކީ 17 ނޮވެމްބަރު ކަމުގައި އެ ކޮމިޓީ އިން ފާސް ކުރެއްވި ކަމަށް ރޮޒެއިނާ ވިދާޅުވި އެވެ.
އެ މައްސަލާގައި މަޖިލީހުގެ ތަޅުމުގައި ބަހުސް ކުރައްވަމުން އިބޫ ވިދާޅުވީ އެމަނިކުފާނު ފުރަތަމަ ކުރެއްވި ކަންތައް ކުރެއްވީ ގާނޫނުއަސާސީއާ ހިލާފަށް ކަމަށް އެއްވެސް އިރެއްގައި ބަޔަކު ބުނާކަށް ބޭނުންނުވާ ކަމަށެވެ. އެހެންކަމުން އިބޫ ބޭނުންފުޅު ވަނީ އެފަދަ ކަމެއް ނިންމަން ޖެހޭނީ އެންމެން އެއްބަސްވެވޭ ގޮތަކަށް ކަމަށް އެމަނިކުފާނު ވިދާޅުވި އެވެ.