ގާނޫނު އަސާސީގެ ދަށުން ހުށަހަޅަން ޖެހޭ މާލީ ބަޔާން ރައީސް އަބްދުﷲ ޔާމީން އޮޑިޓާ ޖެނެރަލްގެ އޮފީހަށް ހުށަހަޅުއްވާފައި ނުވާތީ އެ މައްސަލަ ރައްޔިތުން މަޖިލީހުގެ މާލިއްޔަތު ކޮމިޓީއިން ބެލުމަށް އެންޓި ކޮރަޕްޝަން ކޮމިޝަން، އޭސީސީއިން ލަފާދީފި އެވެ.
ގާނޫނު އަސާސީގެ 120 ވަނަ މާއްދާގެ ދަށުން ރައީސުލްޖުމްހޫރިއްޔާ ހުށަހަޅަން ޖެހޭ މާލީ ބަޔާން ރައީސް އަބްދުﷲ ޔާމީން އޮޑިޓާ ޖެނެރަލަށް ހުށަހަޅުއްވާފައި ނުވި ނަމަވެސް އޮޑިޓް އޮފީހުން އެމަނިކުފާނުގެ މައްޗަށް ފިޔަވަޅެއް ނޭޅީ، ރައީސް ޔާމީން މަގާމުގެ ނުފޫޒު ބޭނުން ކުރައްވައިގެން ކަމަށް ތުހުމަތުކޮށް އޭސީސީއަށް އަމިއްލަ ފަރާތަކުން ހުށަހެޅި މައްސަލަ ބަލައި ނިންމައި އެ ކޮމިޝަނުން އެ ފަރާތަށް ފޮނުވި ލިޔުމުގައި ބުނީ، މާލީ ބަޔާން ހުށަނާޅައިގެން އެޅޭނެ ފިޔަވަޅެއް އެއްވެސް ގާނޫނެއްގައި ބަޔާން ކޮށްފައި ނުވާ ކަމަށެވެ. އެހެންކަމުން އޮޑިޓް އޮފީހުން ފިޔަވަޅު އަޅާފައި ނުވުމަކީ ކޮރަޕްޝަންގެ އަމަލެއްގެ ތުހުމަތު އެ އޮފީހުގެ މައްޗަށް ކުރެވޭނެ ކަމެއް ނޫން ކަމަށް ވެސް އޭސީސީގެ ލިޔުމުގައިވެ އެވެ. އެހެން ނަމަވެސް މާލީ ބަޔާން ހުށަނާޅުއްވާ ރައީސް ޔާމީން ހުންނެވި މައްސަލަ ކަމާ ގުޅޭ އިދާރާތަކުން ބަލަން ޖެހޭ ކަމަށް ދެކޭ ކަމަށް ވެސް އެލިޔުމުގައިވެ އެވެ.
"ރައީސުލްޖުމްހޫރިއްޔާ އަބްދުﷲ ޔާމީން ޢަބްދުއްގައްޔޫމް ދިވެހިރާއްޖޭގެ ގާނޫނު އަސާސީގެ 120 ވަނަ މާއްދާގެ ދަށުން ހުށަހަޅުއްވަންޖެހޭ މާލީ ބަޔާން ހުށަހަޅުއްވާފައިނުވާ މައްސަލަ ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ހުށަހަޅުއްވައިގެން ކުރިއަށް ދިޔުން ރަނގަޅު ކަމުގައި މިކޮމިޝަނުން ދެކޭތީ އެވާހަކަ ދެންނެވީމެވެ،" އެ ކޮމިޝަނުން ފޮނުވި ލިޔުމުގައިވެ އެވެ.
ގާނޫނު އަސާސީގެ ހަތަރު ވަނަ ބާބުގެ 120 ވަނަ މާއްދާގައި ބުނެފައި ވަނީ ރައީސުލްޖުމްހޫރިއްޔާގެ މުދަލާއި ފައިސާގެ ބަޔާނެއް ކޮންމެ އަހަރަކު ވެސް އޮޑިޓާ ޖެނެރަލަށް ހުށަހަޅަން ޖެހޭނެ ކަމަށެވެ.
ރައީސް ޔާމީން މާލީ ބަޔާން ހުށަނާޅުއްވާ ހުންނެވި މައްސަލަ މިއަހަރުގެ ރިޔާސީ ކެމްޕޭންގެ ތެރެއިން ފެންމަތިވުމާ އެކު، ރައީސް އޮފީހުގެ ސްޕޯކްސްޕާސަން އިބްރާހިމް މުއާޒު އަލީ ވިދާޅުވެފައި ވަނީ، ރައީސް ޔާމީން މަގާމާ ހަވާލުވެ ވަޑައިގަތުމަށް ފަހު މާލީ ބަޔާން ހުށަހެޅުއްވި ކަމަށާއި އެ ބަޔާން އޮޑިޓް އޮފީހުން ބަލައިގަތް ކަމަށެވެ. އެހެން ނަމަވެސް އޭގެ ފަހުން މާލީ ބަޔާނުގެ ފޯމެޓަށް އޮޑިޓް އޮފީހުން ބަދަލުތަކެއް ގެނެސް ރައީސްއާ ހިއްސާކުރެއްވި ކަމަށާއި އެ ބަދަލުތަކާ އެކު ރައީސް އަލުން މާލީ ބަޔާން ހުށަހަޅުއްވާނެ ކަމަށެވެ. އެހެން ނަމަވެސް، އޭގެ ފަހުން އޮޑިޓް އޮފީހުގެ ބައެއް އޮފިޝަލުން ވަނީ އެ ވާހަކަތައް ދޮގު ކުރައްވައިފަ އެވެ.