ވިލީގައި ކުރިއަށްދާ ކޮޕާ އެމެރިކާގެ ގުރޫޕް ސީގައި ރޭ ޕެރޫ އަތުން 2-1 އިން ބްރެޒިލް މޮޅުވިއިރު، ވެނަޒުއޭލާ އަތުން 1-0 އިން ކޮލަމްބިއާ ބަލިވެއްޖެ އެވެ.
ބްރެޒިލް ސިއްސުވާލުމަށް ފަހު، ޕެރޫ އިން މެޗުގެ ތިން ވަނަ މިނިޓުގައި ލީޑު ނެގީ ކްރިސްޓިއަން ކުއޭވާ ޖެހި ލަނޑުންނެވެ. އެކަމަކު އޭގެ ދެ މިނިޓު ފަހުން ބްރެޒިލްގެ ފޯވަޑް ނޭމާ ވަނީ ލަނޑެއް ޖަހައި މެޗުގެ ނަތީޖާ އެއްވަރުކޮށްފަ އެވެ.
ދެ ޓީމު އެއްވަރުވެގެން މެޗު ނިމެން ދަނިކޮށް، މެޗުގެ އިތުރު ވަގުތުގެ ތެރޭގައި ނޭމާ ތަނަވަސްކޮށްދިން ފުރުސަތަކުން ބްރެޒިލްގެ ދެވަނަ ލަނޑު ޖެހީ ޑަގްލަސް ކޮސްޓާ އެވެ.
މިިދިޔަ އަހަރު އަމިއްލަ ގައުމުގައި އޮތް ވޯލްޑް ކަޕްގައި ކުރިމަތިވި ނާކާމިޔާބަށް ފަހު، ބްރެޒިލް ވަނީ އެންމެ ފަހުން ކުުޅުނު 11 މެޗުން ވެސް މޮޅުވެފަ އެވެ. ވޯލްޑް ކަޕަށް ފަހު ބްރެޒިލް ކުޅުނު މެޗުތަކުން އެ ޓީމު ކޮޅަށް ވަދެފައިވަނީ އެންމެ ތިން ލަނޑެވެ.
ގުރޫޕް ސީގައި ރޭ ކުޅުނު ފުރަތަމަ މެޗުގައި ވެނެޒުއޭލާ ވަނީ ވަރުގަދަ ކޮލަމްބިއާގެ މައްޗަށް ކުރި ހޯދައިފަ އެވެ. މިއީ މި މުބާރާތުގައި މިހާތަނަށް ނިކުތް އެންމެ ހައިރާންކުރެވުނު ނަތީޖާ އެވެ.
މެޗުގެ ދެވަނަ ހާފުގައި ވެނެޒުއޭލާ އަށް ލަނޑު ޖަހައިދިނީ ފޯވަޑް ހޯސޭ ސޮލަމަން ރޮންޑޮން އެވެ.
މެޗުގެ ނަތީޖާ އެއްވަރުކުރަން ކޮލަމްބިއާ އިން މަސައްކަތްކުރި ނަމަވެސް، ހަމޭސް ރޮޑްރިގޭޒް އާއި ހުއާން ކުއަރްޑާޑޯ އަދި އެޑްވިން ކަރްޑޯނާގެ ހަމަލާތައް ވެނެޒުއޭލާގެ ގޯލްކީޕަރު އަލެހަންދުރޯ ގުއޭރާ ވަނީ ދިފާއުކޮށްފަ އެވެ.
މި މުބާރާތުގައި މިރޭ ކުޅޭ ފުރަތަމަ މެޗުގައި ނުކުންނާނީ އިކުއެޑޯ އާއި ބޮލީވިއާ އެވެ. ދެވަނަ މެޗުގައި ބައްދަލުކުރާނީ ޗިލީ އާއި މެކްސިކޯ އެވެ. -- ބީބީސީ