މިދިޔަ ހޫނު މޫސުމުގައި އިތުރު ކުޅުންތެރިން ނުހޯދުމަށް ކްލަބުގެ ވެރިންނަށް އެންގުމަކީ އޭނާއަށް ހެދުނު ގޯހެއް ކަމަށް މެންޗެސްޓާ ސިޓީގެ ކޯޗު ޕެޕް ގަޑިއޯލާ ބުނެފި އެވެ.
ބްރެންޓްފޯޑާ ދެކޮޅަށް ކުޅޭ މެޗުގެ ކުރިން ނޫސްވެރިންނާ ވާހަކަދައްކަމުން ގަޑިއޯލާ ބުނީ ކްލަބަށް ކުޅުންތެރިން ހޯދުމުގެ މަސައްކަތް ވެރިން ކުރަމުންދިޔަ ނަމަވެސް އޭނާ އިތުރު ކުޅުންތެރިން ބޭނުން ނުވާ ކަމަށް ބުނުމާ ގުޅިގެން އެ މަސައްކަތް ހުއްޓާލީ ކަމަށެވެ.
"އޭރު އަހަރެން ގަބޫލުކުރީ މިހާރު އޮތް ސްކޮޑަށް އިތުބާރު ކުރެވޭނެ ކަމަށް. އަދި ކުރިން ހޯދި ކާމިޔާބީތައް ދެމެހެއްޓޭނެ ކަމަށް. އެކަމަކު އަނިޔާގެ މައްސަލަތަކާއެކު ހުރިހާ ކަމެއް ބަދަލުވެއްޖެ،" ގާޑިއޯލާ ބުންޏެވެ.
މިވަގުތު ޕްރިމިއާ ލީގުގެ ހަވަނައިގައި އޮތް ސިޓީ ވަނީ ފާއިތުވި ގިނަ މެޗުތަކެއްގައި ވިދިވިދިގެން ބަލިވެފަ އެވެ.
މީގެއިތުރުން ޗެމްޕިއަންސް ލީގުގެ ދެވަނަ ބުރަށް ދިއުމަކީވެސް މިހާރު ސިޓީއަށް ގޮންޖެހުމަކަށް ވެފައިވާއިރު، ސިޓީ އޮތީވެސް އެ މުބާރާތުގެ 22 ވަނައިގައެވެ.
އަނިޔާގެ މައްސަލަތަކާ ކުރިމަތިލާން ޖެހުމާ ގުޅިގެން ސިޓީން ވަނީ ލެންސްގެ އުޒްބެކިސްތާނު ކުޅުންތެރިޔާ އަބްދުކާދީ ކުސަނޯވް 33.6 މިލިއަން ޕައުންޑަށް ގަތުމަށް އެއްބަސްވެފަ އެވެ. މީޑިއާ ރިޕޯޓުތައް ބުނާގޮތުން އޭނާ ވަރަށް އަވަހަށް ސިޓީއާ ގުޅޭނެ އެވެ.