ރައްޔިތުންގެ ބާރު ރައްޔިތުންގެ އަތުގައި ބާއްވާނެ ކަމުގެ ޔަގީންކަން އަރުވާ ކަމަށާއި އެމަނިކުފާނު ފުރިހަމަ ކުރައްވާނީ ރައްޔިތުންގެ ހަވާލުކުރި ޒިންމާ ކަމަަށް އިންތިހާބީ ރައީސް އިބްރާހިމް މުހައްމަދު ސޯލިހު، އިބޫ މިއަދު ވިދާޅުވެއްޖެ އެވެ.
ފަންސާސް ވަނަ ޖުމުހޫރީ ދުވަހުގެ މުނާސަބަތުގައި އިބޫ ނެރުއްވި ބަޔާނުގައި ވިދާޅުވެފައިވަނީ ޖުމްހޫރީ ވެރިކަމަކީ ރައްޔިތުންގެ ފަރާތުން ރައްޔިތުންނަށްޓަކައި އުފައްދާ ރައްޔިތުންގެ ވެރިކަމެއް ކަމަށެވެ. މަޝްވަރާގެ ރީތި އުސޫލުން ރައްޔިތުންގެ ކަންކަން ހިންގުމަށް ގާއިމްކުރެވޭ ވެރިކަމެއް ކަމަށެވެ.
"މި ނިޒާމުގައި ވެރީންނަކީ ރައްޔިތުންގެ ހާދިމުން، އެމީހުންގެ އެންމެ ބޮޑު ވާޖިބަކަށް ވާނީ ރައްޔިތުންނަށް ޖަވާބުދާރީވުން، އެމަގަށް ކަންކަން ނުދާނަމަ އެކަމުގައި ބަސްބުނެ، އެ ނޫން މަގަކަށް ގައުމުގެ ހުންގާނު އަނބުރާލުމަކީވެސް ޖުމްހޫރީ ވެރިކަމެއްގައި ރައްޔިތުންނަށް ލިބިފައި އޮންނަ ހައްގެއް، ވެރިންގެ ގޮތުގައި އިސްކުރެވޭ ހާދިމުންނަށް ހުރީ ރައްޔިތުންގެ ނިންމުމާ ރުހި ކިޔަމަންވުންކަމީ ޖުމްހޫރީ ވެރިކަމުގެ އެންމެ އަސާސީ އެއް ފަލްސަފާ،" އިބޫ ވިދާޅުވި އެވެ.
އިބޫ ވިދާޅުވި ގޮތުގައި ވެރިއެއްގެ އެންމެ ބޮޑު މަސްއޫލިއްޔަތަކަށް ވާން ވާނީ އެތަނެއްގައި އަދުލު އިންސާފު ގާއިމު ކޮށްދިނުމެވެ. ރާއްޖޭގެ ވެރިކަން ޖުމްހޫރިއްޔަކަށް ބަދަލުވުމަށްފަހު ވެއަތުވެ ދިޔަ 10 ދައުރުގައި މިކަން ކުރެވިފައި ވަނީ ކިހައި މިންވަރަކަށް ކަމާއި، އެ ދައުރުތަކުގައި ވެރިން ކުރެއްވި މަސައްކަތަކުގެ ފޮނިކަން ނުވަތަ ހިތިކަން ލިބިވަޑައިގެންފައި ވަނީ ކިހައި މިންވަރަކަށްކަން ނިންމަވާނީ ދިވެހި ރައްޔިތުން ކަމަށް އިބޫ ވިދާޅުވި އެވެ.
ރާއްޖޭގެ ވެރިކަން ޖުމްހޫރިއްޔަތަކަށް ބަދަލުވެ، ފެށެން މިއުޅޭ 11 ވަނަ ދައުރުގެ ރައީސުލްޖުމްހޫރިއްޔާކަމަށް އިންތިހާބުވެފައިވާ ރައީސްގެ ހައިސިއްޔަތުން އެންމެ އިސް ވާޖިބެއްކަމުގައި ދެކެނީ ރައްޔިތުންގެ ވެރިކަން ރައްޔިތުންގެ ކިބައިގައި ދެމިއޮތުން ކަށަވަރުކުރުން ކަމަށް އިބޫ ވިދާޅުވި އެވެ.
"ދައުލަތެއްގެ ހަގީގީ ވެރިންނަކީ ރައްޔިތުންކަމާއި، މަގާމުތަކަށް އިންތިހާބުވުމަކީ ރައްޔިތުން ހަވާލުކުރާ ޒިންމާއެއްކަމާއި، އެއީ އެރުވޭ ޝަރަފެއް ނޫންކަން އަބަދުމެ ހަނދާނުގައި ބެހެއްޓުމާއި، ހަނދާންކޮށްދިނުމަކީވެސް އަޅުގަނޑުގެ ވާޖިބެއްކަމުގައި ދެކޭނަން،" އިބޫ ވިދާޅުވި އެވެ.
މިފެށޭ ރިޔާސީ ވެރިކަމުގައި ދިވެހި ރައްޖެއަށް އަމާންކަމާއި ސުލްހަވެރިކަމާއި ކުރިއެރުން މިންވަރު ކުރެއްވުމަކީ ކުރައްވާ ދުއާ ކަމަށް އިބޫ ވިދާޅުވި އެވެ.
އާންމު ގޮތެއްގައި ޖުމްހޫރީ ދުވަހު އާ ރައީސް ހުވާ ކުރެއްވި ނަމަވެސް އިބޫ ރައީސް ކަމުގެ ހުވާ ކުރަން ހަމަޖެހިފައިވަނީ މި މަހުގެ 17 ވަނަ ދުވަހު އެވެ. އެއީ ރައީސް އަބްދުﷲ ޔާމީންގެ ރިޔާސީ ދައުރު ފެށިފައިވަނީ 2013 ވަނަ އަހަރުގެ ނޮވެމްބަރު މަހުގެ 17 ވަނަ ދުވަހު ކަމަށްވާތީ އެވެ.