ބްރެޒިލްގެ ގައުމީ ޓީމާއެކު 1958 ވަނަ އަހަރާއި 1962 ވަނަ އަހަރުގެ ވޯލްޑް ކަޕް ކާމިޔާބުކުރި ޒީޓޯ މަރުވެއްޖެ އެވެ.
ޒީޓޯ ،82، އާދިއްތަ ދުވަހު މަރުވެފައިވާ ކަން އޭނާ ކުރިން ކުޅުނު ސަންތޯސް އިން ވަނީ އިއްޔެ އިއުލާންކޮށްފަ އެވެ.
ހުނަރުވެރި މިޑްފީލްޑަރެއްގެ ގޮތުގައި ފާހަގަކުރެވިފައިވާ ޒީޓޯ ވަނީ 1958 ވަނަ އަހަރާއި 1962 ވަނަ އަހަރު ވޯލްޑް ކަޕް ކާމިޔާބުކުރި ޓީމުގައި ކުޅެފަ އެވެ. އެ ދެ އަހަރު ވޯލްޑް ކަޕް ކާމިޔާބުކުރި ބްރެޒިލް ޓީމުގައި ބްރެޒިލްގެ ލެޖެންޑް ޕެލޭ ވެސް ހިމެނެ އެވެ. ޒީޓޯ ވަނީ 1962 ވަނަ އަހަރުގެ ވޯލްޑް ކަޕް ފައިނަލްގައި ޗެކޮސޮލޮވާކިއާ ކޮޅަށް ލަނޑު ވެސް ޖަހައިފަ އެވެ.
ޒީޓޯ ވަނީ ބްރެޒިލްގެ ސަންތޯސް އަށް 15 އަހަރު ކުޅެފަ އެވެ. ސަންތޯސްއާއެކު ޒީޓޯ ވަނީ ކޮޕާ ލިބަޓަޑޯރަސް ދެ ފަހަރު ހޯދައިފަ އެވެ.
އޭގެ ފަހުން ޒީޓޯ ވަނީ ސަންތޯސްގެ އެކި މަގާމުތައް އަދާކޮށްފަ އެވެ. ރޮބީނިއޯ އާއި ނޭމަ އަށް ސަންތޯސްގެ ސީނިއާ ޓީމުން ޖާގަ ހޯދައިދިނުމުގައި ޒީޓޯ ވަނީ މުހިންމު ރޯލެއް އަދާކޮށްފަ އެވެ.
"އަހަންނަށް ކޮށްދިން ހުރިހާ ކަމަކަށް ޝުކުރު އަދާކުރަން،" ނޭމާ ކުރި ޓުވީޓެއްގައި ބުނެފައިވެ އެވެ.
ޒީޓޯ މަރުވުމުން، 1958 ވަނަ އަހަރު ވޯލްޑް ކަޕް ކާމިޔާބުކުރި ބްރެޒިލްގެ ޓީމުގައި ހިމެނޭ ކުޅުންތެރިންގެ ތެރެއިން މިހާރު ދުނިޔޭގައި ތިބީ ޕެލޭ އާއި މާރިއޯ ޒަގާލޯ އެވެ. -- ބީބީސީ