ޖަރުމަން ބުންޑަސް ލީގާގެ ހޯފެންހެއިމް އަށް ކުޅެމުންދާ ބްރެޒިލްގެ ގައުމީ ޓީމުގެ މިޑްފީލްޑަރު ފިރްމީނިއޯ އަންނަ ސީޒަންގައި ފެންނާނީ އިންގްލެންޑްގެ ކްލަބަކުން ކަމަށް އޭނާގެ އޭޖެންޓް ބުނެފި އެވެ.
އިންގްލެންޑްގެ ކްލަބަކަށް ފިރްމީނިއޯ ބަދަލުވާނެ ކަމަށް އޭނާ އޭޖެންޓް ބުނެފައިވާއިރު، މެންޗެސްޓާ ޔުނައިޓެޑް އިން ފިރްމީނިއޯ ގެންދަން މަސައްކަތްކުރަމުންދާ ކަމަށް މީޑިއާ ރިޕޯޓްތަކުން ވަނީ މީގެ ކުރިން ވެސް ބުނެފަ އެވެ.
ޖަރުމަންގެ މީޑިއާއާ ވާހަކަދައްކަމުން ފިރްމީނިއޯގެ އޭޖެންޓްް ރޮޖާ ވިޓްމަން ބުނީ އަންނަ ސީޒަންގައި ފިރްމީނިއޯ ފެންނާނީ އިންގްލެންޑްގެ ކްލަބަކުން ކަމަށެވެ. އެކަމަކު ވަކި ކްލަބެއްގެ ނަމެއް ރޮޖާ ނުބުނެ އެވެ.
"އަހަންނަށް މި ވަގުތު ބުނެވެން އޮތީ އަންނަ ސީޒަންގައި ފިރްމީނިއޯ ފެންނާނީ އިންގްލެންޑްގެ ކްލަބަކުންކަން،" ރޮޖާ ބުންޏެވެ.
މިހާރު ކުރިއަށްދާ ކޮޕާ އެމެރިކާގައި ވާދަކުރާ ބްރެޒިލްގެ ގައުމީ ޓީމުގައި ފިރްމީނިއޯ ހިމެނޭތީ، އޭނާގެ ޓްރާންސްފާގެ އިތުރު ތަފްސީލުތަައް އެނގޭނީ އެ މުބާރާތް ފަހުން ކަަމަށް ވަނީ ބެލެވިފަ އެވެ.
މިދިޔަ ސީޒަންގެ ޖަރުމަން ލީގުގައި ހަތް ލަނޑު ޖަހާފައިވާ ފިރްމީނިއޯ 25 މިލިއަން ޔޫރޯ އަށްވުރެ ކުޑަ އަގެއްގައި ހޯފެންހެއިމް އިން ދޫކުރާނެ ކަމަކަށް ނުބެލެވެ އެވެ. -- އީއެސްޕީއެން