ސްޕެއިންގެ ބާސެލޯނާ އަށް ކުޅެމުންދާ ބްރެޒިލްގެ ފޯވަޑް ނޭމާ އެ ކްލަބުގެ ކޮންޓުރެކްޓް 2020 ވަނަ އަހަރާ ހަމައަށް އާ ކުރަން އެއްބަސްވެފައިވާ ކަމަށް މީޑިއާ ރިޕޯޓްތަކުން ބުނެފި އެވެ.
ސްޕެއިންގެ މީޑިއާ ރިޕޯޓްތަކުން ބުނާގޮތުގައި އަހަރަކު 12 މިލިއަން ޔޫރޯ ލިބޭ ގޮތަށް، ބާސާގެ ކޮންޓުރެކްޓް 2020 ވަނަ އަހަރާ ހަމައަށް އާކުރަން ނޭމާ އަނގަބަހުން މިހާރު އެއްބަސްވެފައިވާ ކަމަށެވެ. އަދި ރަސްމީކޮށް ކޮންޓުރެކްޓެއްގައި ސޮއިކުރުން ފަސްވެފައި އޮތީ ބާސާ އިން މި ސީޒަންގައި ހޯދި ބޮޑު ކާމިޔާބީ އާއި އެ ކްލަބުގެ އިންތިހާބާ ގުޅިގެން ކަމަށް ރިޕޯޓްތަކުން ބުނެ އެވެ.
ރިޕޯޓްތަކުން ބުނާ ގޮތުގައި ނޭމާ ރަސްމީކޮށް ކޮންޓުރެކްޓް އާކުރާނީ އޯގަސްޓް މަހު އެވެ. އަދި އާ ކޮންޓުރެކްޓްގެ ދަށުން ނޭމާވެގެންދާނީ ބާސާގެ ދެވަނަ އަށް އެންމެ މުސާރަ ބޮޑު ކުޅުންތެރިއާއަށެވެ. މިހާރު އެ ކްލަބުން އެންމެ ބޮޑު މުސާރަ އަށް ދެނީ އާޖެންޓީނާގެ ފޯވަޑް ލިއޮނެލް މެސީއަށެވެ.
މިދިޔަ ސީޒަންގައި ބާސާ އިން ސްޕެއިން ލީގާއި ސްޕެނިޝް ކަޕް އަދި ޗެމްޕިއަންސް ލީގު ކާމިޔާބުކުރިއިރު، ނޭމާ ވަނީ 43 ލަނޑު ޖަހައިފަ އެވެ.