ރައްޔިތުންގެ މަޖިލީހުގެ މައްޗަންގޯޅި އުތުރު ދާއިރާގެ މެންބަރު މާރިޔާ އަހުމަދު ދީދީ އިސްތިއުފާ ދެއްވައިފި އެވެ.
މާރިޔާ އިސްތިއުފާ ދެއްވީ އަލަށް ހުވާ ކުރެއްވި ރައީސް އިބްރާހިމް މުހައްމަދު ސޯލިހުގެ ކެބިނެޓަށް ވަޑައިގަންނަވާށެވެ. މާރިޔާ ވަޑައިގަންނަވަނީ ޑިފެންސް މިނިސްޓަރުގެ މަގާމަށެވެ.
ރާއްޖޭގެ ފުރަތަމަ އަންހެން ގާނޫނީ ވަކީލް މާރިޔާއަކީ އެމްޑީޕީގައި ގިނަ ހިދުމަތްތަކެއް ކުރައްވާފައިވާ ބޭފުޅެކެވެ. އޭނާ މިހާރު ވެސް ގެންދަވަނީ ރައީސް ސޯލިހުގެ ތަރުޖަމާނުގެ މަގާމު އަދާ ކުރައްވަމުންނެވެ.
މާރިޔާގެ އިތުރުން ގަލޮޅު ދެކުނު ދާއިރާގެ މެންބަރު އަހުމަދު މަހުލޫފާއި ރައީސް ސޯލިހާއި ނައިބު ރައީސް ފައިސަލް ނަސީމް އަދި މަޖިލީހުގެ ކުރީގެ ރައީސް އަބްދުﷲ ޝާހިދު ވެސް މެންބަރު ކަމުން އިސްތިއުފާ ދެއްވާފަ އެވެ.
އަބްދުﷲ ޝާހިދު ވެސް ވަނީ ރައީސް ސޯލިހުގެ ކެބިނެޓަށް ވަޑައިގަންނަވަން ނިންމަވާފަ އެވެ. ޝާހިދު ވަޑައިގަންނަވަނީ ފޮރިން މިނިސްޓަރުގެ މަގާމަށެވެ. ގަމު ދާއިރާގެ މެންބަރު ފައްޔާޒު ޔޫސުފް ވެސް ވަނީ ކެބިނެޓަށް ވަޑައިގަންނަވަން ނިންމަވާފަ އެވެ. އޭނާ ހަވާލުވަނީ އިކޮނޮމިކް މިނިސްޓަރުގެ މަގާމާ އެވެ.