އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިހާބުގައި އަދާލަތު ޕާޓީން ވާދަ ކުރާނީ ކޯލިޝަންގެ ތެރެއިން ކަމަށް އެޕާޓީގެ ރައީސް އިމްރާން އަބުދުﷲ ވިދާޅުއްޖެ އެވެ.
ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަ ދައްކަވަމުން އިމްރާން ވިދާޅުވީ، ވޭތުވެދިޔަ ދުވަސްތަކުގައި ދިޔައީ ވަރަށް ބޮޑެތި ގޮންޖެހުންތަކަކާއެކު ކަމަށާއި އެހެން ނަމަވެސް އެގޮންޖެހުންތަކުގެ ކުރިމަތީގައި ސާބިތުވެ ތިބެ މިއަދު ޕާޓީ ކުރިއަށް ގެންދެވިފައިވާ ކަމަށެވެ. ޕާޓީގެ ކުރިމަގު ވަރަށް އުޖާލާކޮށް ފާގަތިކޮށް ފެންނަމުންދާ ކަމަށްވެސް މިނިސްޓަރު ވިދާޅުވި އެވެ.
"ރައްޔިތުން މަޖިލީހާމެދު އުންމީދު ބޮޑު، އަޅުގަނޑުމެން ރައްްޔިތުން މަޖިލީހުން އެކަށީގެންވާ މިންވަރެއްގެ ގޮނޑިތަކެއް ކާމިޔާބު ކުރުމަށް އަޅުގަނޑުމެން މިދަނީ މަސައްކަތް ކުރަމުން، އަޅުގަނޑުމެން މަސައްކަތް ކުރާނީ ކޯލިޝަންގެ ބައިވެރިންނާއި އެކުގައި، އަޅުގަނޑުމެންނަށް ވެވެން އޮތް އެންމެ ބޮޑު އެއްބާރުލުމަކާއި އެހީތެރިކަމެއް ދީގެން އަޅުގަނޑުމެން ކާމިޔާބު ކުރުމަށް،" އިމްރާން ވިދާޅުވި އެވެ.
އަދާލަތު ޕާޓީ އިންވެސް އެކަށީގެންވާ ގޮނޑިތަކެއް ކާމިޔާބު ކުރުމަކީ ކޯލިޝަން ސަރުކާރު ރަނގަޅު ގޮތެއްގައި ދެމިއޮތުމަށްޓަކައި ކޮންމެހެން ކުރަންޖެހޭ ކަމެއް ކަމަށްވެސް އިމްރާން ވިދާޅުވި އެވެ.
އަދާލަތު ޕާޓީ އިން ކޯލިޝަންގެ ތެރެއިން މަޖިލިސް އިންތިހާބަށް ނިކުންނަން ނިންމާފައިވާއިރު، ސަރުކާރު ހިންގާ ޕާޓީ، އެމްޑީޕީއިން ވާދަ ކުރާނެ ދާއިރާތައް މި މަހުގެ 30 ވަނަ ދުވަހު އިއުލާން ކުރާނެ ކަމަށް އެ ޕާޓީއިން ވަނީ ބުނެފަ އެވެ.
ވާދަ ކުރާނެ ދާއިރާތައް މި މަހުގެ 30 ވަނަ ދުވަހު އިއުލާން ކުރާނެ ކަމަށް ބުނެފައިވަނީ އެމްޑީޕީއިން މިދިޔަ ބުރާސްފަތި ދުވަހު ބޭއްވި އެ ޕާޓީގެ ގައުމީ މަޖިލީހުގެ ނުރަސްމީ ބައްދަލުވުމުގައި އެކުލަވާލި ޓައިމްލައިންގަ އެެވެ. ރައްޔިތުންގެ މަޖިލީހުގެ ޕްރައިމަރީގެ ޓައިމްލައިންގައިވާ ގޮތުން މި މަހުގެ 30 ވަނަ ދުވަހު ވާދަ ކުރާނެ ދާއިރާތައް އިއުލާން ކުރުމަށްފަހު، އަންނަ ޑިސެމްބަރު މަހުގެ ހަތްވަނަ ދުވަހު ޕްރައިމަރީގައި ވާދަ ކުރަން ފުރުސަތު ހުޅުވާލާނެ އެވެ. ޕްރައިމަރީގައި ވާދަކުރަން ކުރިމަތިލާއިރު ކުރިމަތިލާ ދާއިރާގެ 200 މީހުންގެ ތާއިދު ސޮއި ހުށަހަޅަންޖެހެ އެވެ.
ވޯޓާސް ލިސްޓް އާންމުކުރުމާއި ޝަކުވާ ހުށަހަޅަން ފުރުސަތު ޑިސެމްބަރު މަހު ދިނުމަށްފަހު ޕްރައިމަރީތައް ބޭއްވުމަށް ނިންމާފައިވަނީ އަންނަ އަހަރުގެ ޖެނުއަރީ މަހުގެ 18 ވަނަ ދުވަހު ކަމަށް އެމްޑީޕީގެ ގައުމީ މަޖިލީހުން އެކުލަވާލި ޓައިމްލައިންގައިވެ އެވެ. ރައްޔިތުންގެ މަޖިލީހުގެ އިންތިހާބު ބޭއްވުމަށް ނިންމާފައިވަނީ މާޗް މަހުގެ ތެރޭގަ އެވެ.
މީގެ އިތުރުން ޖުމްހޫރީ ޕާޓީ އިންވެސް ވަނީ ވަކިން މަޖިލިސް އިންތިހާބްގައި ވާދަކުރަން ނިންމާފައިވާ ކަމަށްބުނެ ފެތުރެމުންދާ ވާހަކަތައް ދޮގުކޮށްފަ އެވެ.
އެމްޑީޕީ އާއި ޖުމްހޫރީ ޕާޓީ އާއި އަދާލަތު ޕާޓީ އާއި ރައީސް މައުމޫން އަބްދުލްގައްޔޫމް ދެމެދު ވެފައިވާ ކޯލިޝަން އެއްބަސްވުމުގައި ރައްޔިތުންގެ މަޖިލީހުގެ އިންތިހާބުގައި ކަން ކުރާނެ ގޮތް ބުނެފައިނުވާ ކަމަށްވެ އެވެ. ނަމަވެސް އެ އިންތިހާބުގައި ވެސް އެކުގައި މަސައްކަތް ކުރަން ވަނީ އެއްބަސްވެފަ އެވެ. އެހެންވެ ކޯލިޝަންގެ މަޝްވަރާ ކޮމެޓީ، 1819 ކޮމެޓީގައި ކޯލިޝަންގެ މެދުގައި ދާއިރާތައް ބަހާނެ ގޮތާމެދު މަޝްވަރާތައް ކޮށްފައިވެ އެވެ. ޕާޓީތަކުން ހިޔާލުތައް ވެސް ހުށަހަޅާފައިވެ އެވެ. ނަމަވެސް މިހާތަނަށް ވަކި ގޮތެއް ނިންމިފައެއް ނުވެ އެވެ.
މަޖިލީހުގައި މިހާރު 87 ދާއިރާ ހިމެނެ އެވެ. މަޖިލީހަށް ދެ ދާއިރާ އިތުރުކޮށްފައިވާއިރު، ދެ ދާއިރާ އިތުރުކޮށްފައިވަނީ މައްޗަންގޮޅި އަށާއި ހެންވޭރަށެވެ. މަޖިލިސް އިންތިހާބު ބޭއްވުމަށް ހަމަޖެހިފައިވަނީ އަންނަ މާޗް މަހުގަ އެވެ.