ރައީސް އިބްރާހިމް މުހައްމަދު ސޯލިހުގެ 100 ދުވަހުގެ ވައުދުތަކުގެ ތެރޭގައި ހިމެނޭ ކަންކަން ހާސިލް ކުރުމަށް ޖުމްލަ 16 ބިލެއް ހަދަންޖެހޭ ކަމަށް ބަންޑާރަ ނައިބުގެ އޮފީހުން ބުނެފި އެވެ.
ރައީސްގެ 100 ދުވަހުގެ ވައުދުތައް ފުއްދުމަށްޓަކައި ބަންޑާރަ ނައިބުގެ އޮފީހުން ކުރަމުންދާ މަސައްކަތްތަކާ ގުޅޭ ގޮތުން ނެރުނު ނޫސް ބަޔާނެއްގައި ބުނީ، 100 ދުވަހުގެ ވައުދުތައް ފުއްދެވުމަށް މަގުފަހިކޮށްދިނުމަށްޓަކައި ބަންޑާރަ ނައިބުގެ
އޮފީހުން ކުރަންޖެހޭ މަސައްކަތްތައް ފަށައި، އޭގެ ތެރެއިން ބައެއް މަސައްކަތްތައް މިހާރު ނިމިފައިވާ ކަމަށެވެ.
ވައުދުތަކާ ގުޅިގެން އަލަށް އެކުލަވާލަންޖެހޭ ގާނޫނުތަކާއި، އަމަލުކުރަމުންދާ ގާނޫނުތަކުގެ ތެރެއިން އިސްލާހު ގެންނަންޖެހޭ ގާނޫނުތައް ފާހަގަކޮށް، އެކަންކަން، އެ ވައުދުތައް ފުރިހަމަކުރުމަށް ކަނޑައަޅުއްވާފައިވާ މުއްދަތުގެ ތެރޭގައި ފުރިހަމަކުރެއްވުމަށް މަގުފަހިކޮށްދިނުމަށްޓަކައި ކަމާގުޅޭ ބިލުތައް އެކުލަވާލައި، ރައްޔިތުންގެ މަޖިލީހަށް ހުށަހެޅުމުގެ މަސައްކަތް، ސަރުކާރުގެ ކަމާބެހޭ ވުޒާރާތަކުގެ މަޝްވަރާއާއެކު ބަންޑާރަ އޮފީހުން ކުރަމުންދާ ކަމަށް ނޫސް ބަޔާނުގައިވެ އެވެ.
"...އެގޮތުން، މުޅިން އަލަށް އެކުލަވާލަންޖެހޭ ފަސް ބިލަކާއި، އަމަލުކުރަމުންދާ ގާނޫނުތަކަށް އިސްލާހު ގެނައުމަށްޓަކައި އެކުލަވާލަންޖެހޭ 11 ބިލާއެކު ޖުމްލަ 16 ބިލު ރައްޔިތުންގެ މަޖިލީހަށް ހުށަހަޅަންޖެހޭ ކަމަށް ފާހަގަކުރެވިފައިވޭ، އޭގެ ތެރެއިން ހަ ބިލެއް މިހާރު ވާނީ ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފަ، ދެންހުރި ބިލުތައް އެކުލަވާލުމުގެ މަސައްކަތްވެސް ކަމާބެހޭ ވުޒާރާތަކުގެ މަޝްވަރާއާއެކު ކުރިއަށްދާކަން ފާހަގަކުރަން،" ބަޔާނުގައިވެ އެވެ.
ކަމާބެހޭ ގާނޫނުތައް އެކުލަވާލުމުގެ އިތުރުން، ދިވެހި ދައުލަތް ދަރަނިވެރިވާ ގޮތަށް ނުވަތަ ގައުމުގެ ސިޔާދަތަށް ގެއްލުންވާ ގޮތަށް ނަގާފައިވާ ލޯނުތަކާއި ކޮންޓްރެކްޓްތައް މުރާޖައާކޮށް، އަލުން ރީނެގޯޝިއޭޓްކުރެވޭނެ ތަނެއް އޮތްތޯ ބެލުމަކީވެސް ސަރުކާރުގެ 100 ދުވަހުގެ ތެރޭގައި ކުރުމަށް ކަނޑައަޅާފައިވާ މުހިންމު މަސައްކަތެކެވެ.
އެ މަސައްކަތް، ކަމާބެހޭ އެހެން ވުޒާރާތަކުގެ ބައިވެރިވުމާއެކު ކުރުމަށްޓަކައި ކަމާގުޅޭ ކޮމިޓީއެއް ބަންޑާރަ ނައިބު އޮފީހުގައި އެކުލަވާލައި، އެ މަސައްކަތް އެ ކޮމިޓީއާ މިހާރު ހަވާލުކޮށްފައިވާ ކަމަށް ބަޔާނުގައިވެ އެވެ.
"ކަމާގުޅޭ އެއްބަސްވުންތައް މުރާޖައާކުރުމަށްފަހު، އެ އެއްބަސްވުންތަކަށް ވާސިލުވުމުގައި ގާނޫނުތަކާއި ގަވާއިދުތަކުގައި ކަނޑައަޅާފައިވާ އިޖުރާއަތުތައް ފުރިހަމަކޮށްފައިވޭތޯ ބެލުމަށް ނިންމާފައިވާނެ، އަދި އޭގެ ތެރެއިން ގައުމުގެ ސިޔާދަތަށް ގެއްލުންވާ ގޮތަށް އެކުލަވާލައި ސޮއިކޮށްފައިވާ އެއްބަސްވުންތަކެއްވާނަމަ އަލުން އެ އެއްބަސްވުންތައް ރީ ނެގޯޝިއޭޓްކުރުމުގެ ފުރުސަތު އޮތް މިންވަރެއް ދެނެގަނެ، އެ ފުރުސަތު އޮތް އެއްބަސްވުންތައް އިސްލާހުކުރެވޭނެ،" ބަޔާނުގައިވެ އެވެ.
ބަޔާނުގައި ބުނި ގޮތުގައި ކޮމިޓީން އެ މަސައްކަތް ކުރުމުގައި މުރާޖައާކުރަންޖެހޭ ކަމަށް މިހާތަނަށް ފާހަގަކުރެވިފައިވާ އެއްބަސްވުންތަކުގެ ތެރޭގައި، ލޯނުގެ އެއްބަސްވުންތަކާއި، ސޮވްރިން ގެރެންޓީގެ އެއްބަސްވުންތަކާއި، ހައުސިން އަދި އިންފްރާސްޓްރަކްޗާ ޑިވެލޮޕްމަންޓް ޕްރޮޖެކްޓުތަކާ ގުޅޭ އެއްބަސްވުންތަކާއި، އާންމު ހިދުމަތްތަކާއި އާންމު ބޭނުންތަކުގެ ހިދުމަތްތަކާ ގުޅޭ އެއްބަސްވުންތަކާއި، ޓޫރިޒަމް ދާއިރާގެ އިންވެސްޓްމަންޓްތަކާ ގުޅޭ އެގްރީމަންޓުތައް ހިމެނެ އެވެ.
އޭގެ އިތުރުން، ވަކި މީހަކަށް ނުވަތަ ވަކި ބަޔަކަށް ގެއްލުމެއް ދިނުމަށް ނުވަތަ ވަކި މީހަކަށް މަންފާއެއް ހޯދައިދިނުމަށް، ފާސްކޮށްފައިވާ ގާނޫނުތައް ބަލައި މުރާޖައާކުރުމަކީ ވެސް، ރައީސް ވަރަށް އިސްކަމެއް ދެއްވައިގެން ކުރައްވާނެ ކަމަށް ވައުދުވެވަޑައިގެންފައިވާ ކަމަކެވެ.
އެ މަސައްކަތް ކުރުމަށްޓަކައި ބަންޑާރަ ނައިބުގެ އޮފީހުގައި ކޮމިޓީއެއް އެކުލަވާލައި، އެ ކޮމިޓީގެ މަސައްކަތް މިހާރު ވަނީ ފަށާފަ ކަމަށެވެ. އެ ކޮމިޓީގެ މަސައްކަތްތަކުގެ ތެރޭގައި އެކުލަވާލާފައިވާ ގާނޫނުތައް މުރާޖައާކުރުމުގެ އިތުރުން، ރާއްޖޭގައި އަމަލުކުރެވޭ އިންސާނީ ހައްގުތަކާބެހޭ ގާނޫނުތައް، ބައިނަލްއަގްވާމީ އިންސާނީ ހައްގުތަކާބެހޭ މުއާހަދާތަކާ އެއްގޮތް ކުރުމަށްޓަކައި އެ ގާނޫނުތައް މުރާޖައާކޮށް، އިސްލާމް ދީނުގެ އަސްލުތަކާ ހިލާފުނުވާ ގޮތެއްގެ މަތިން އެ ގާނޫނުތަކަށް ގެންނަންޖެހޭ އިސްލާހުތައް ފާހަގަކޮށް، ކަމާގުޅޭ ބިލުތައް އެކުލަވާލުންވެސް ހިމެނޭ ކަމަށް ބަޔާނުގައިވެ އެވެ.