ރައީސް އިބްރާހިމް މުހައްމަދު ސޯލިހުގެ ފުރަތަމަ 100 ދުވަހުގެ ވައުދުތަކު ތެރެއިން ފޮރިން މިނިސްޓްރީގެ ދަށުން ކުރުމަށް ހަމަޖެހިފައިވާާ ހުރިހާ ވައުދެއް ފުއްދާފައިވާ ކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެ އެވެ.
އާ ސަރުކާރުގެ ފުރަތަމަ 100 ދުވަހުގެ ތެރޭގައި ފޮރިން މިނިސްޓްރީއާ ހަވާލުކޮށްފައި ވަނީ ދެ ވައުދެކެވެ. އެއް ވައުދަކީ ކޮމަންވެލްތްގައި ދިވެހިރާއްޖެ އަލުން ބައިވެރިވުމަށް ހުށަހެޅުމެވެ. އަނެއް ވައުދަކީ ޔޫއެންގެ UNWGEID އަދި UNHRC ގައިވާ ރާއްޖޭގެ މައްސަލަތައް ހުރި ހިސާބެއް ބަލައި މައްސަލަތައް އަވަހަށް ނިންމުމަށް ބާރު އެޅުމެވެ.
ޝާހިދު މިއަދު ކުރެއްވި ޓްވީޓެއްގައި ވިދާޅުވީ ފުރަތަމަ 100 ދުވަހުގެ ވައުދުތަކުގެ ތެރެއިން ފޮރިންއާ ހަވާާލުކޮށްފައިވާ ހުރިހާ މަސައްކަތެއް ނިންމާފައިވާ ކަން ފަހުރުވެރިކަމާއެކު އިއުލާން ކުރާ ކަމަށެވެ.
ރާއްޖެ ކޮމަންވެލްތާ ގުޅުމަށް ރައްޔިތުން މަޖިލީހުން ވަނީ ރުހުންދީފަ އެވެ. ސަރުކާރު ފަރާތުން ރަސްމީކޮށް ވަނީ ކޮމަންވެލްތަށް އަލުން ބައިވެރިވުމަށް ހުށަހަޅާފަ އެވެ. އަދި އދ. ގެ ވޯކިން ގްރޫޕްތަކުގައި ހުރި މައްސަލަތައް އަވަސް ކުރުމަށް ވެސް ފޮރިން އިން ވަނީ ބާރު އަޅާފަ އެވެ.