އެންމެ ފަހު މެޗުގައި، ބޮޑު ތަފާތަކުން ޖިބްލީ ސްޕޯޓްސް ކުލަބު ބަލިކޮށް، ގައުމީ ބާސްކެޓް ބޯޅަ ލީގްގެ އަންހެން ޑިވިޝަންގެ ޗެމްޕިއަންކަން ސައިކްލޯން ދިފާއު ކޮށްފި އެވެ.
މިއީ، ގައުމީ ލީގް ޗެމްޕިިއަންކަން، ސައިކްލޯން ހޯދި ޖެހިޖެހިގެން ދެ ވަނަ ފަހަރެވެ. ސޯޝަލް ސެންޓަރުގެ އިންޑޯ ހޯލްގައި ކުޅުނު މެޗު، ސައިކްލޯން މެޗު ކާމިޔާބު ކުރީ، 32 ޕޮއިންޓްގެ ތަފާތަކުންނެވެ. އެއީ 65-33 ންނެވެ.
މެޗުގެ މޮޅު ކުޅުންތެރިޔަކަށް ހޮވުނީ، ސައިކްލޯންގެ ބިދޭސީ ކުޅުންތެރިޔާ ޖެލީނާ ބަލްޑަމިރު އެވެ. އޭނާ އަކީ މުބާރާތުގެ އެންމެ މޮޅު ކުޅުންތެރިޔާ އެވެ. އަންހެން ބާސްކެޓަށް ހާއްސަކޮށް އޮންނަ ސައިކްލޯންގެ ކޯޗް އަހްމަދު ނަޒީފް ބުނީ އޭނާގެ ކުޅުންތެރިން ދެއްކި ހިތްވަރަށް ތައުރީފް ކުރަން ޖެހޭ ކަމަށެވެ.
"މިހާރު ސައިކްލޯއަކީ އަންހެން ބާސްކެޓްގައި އެންމެ ގިނަ ކާމިޔާބު ހޯދާ ޓީމު ހާއްސަކޮށް މިދިޔަ ދެ އަހަރު އަޅުގަނޑުމެންނަށް ލިބުނު ކާމިޔާބު ހަމަ ވަރަށް ރަނގަޅު." މިއީ ނަޒީފް މިއަހަރު ކުރީ ކޮޅު ބުނި ވާހަކަ އެކެވެ.
މިހާރު އޭނާ ބުނަނީ، ޓީމު ވަރުގަދަ ވިޔަސް ކުޅުންތެރިން އޮވާ ކޮންފިޑެންސް ނުވާނެ ކަމަށާއި، އެއްވެސް މެޗެއް ފަސޭހަ ކޮށްލާނެ ހާލަތަކަށް އެ ޓީމުން ކުރިމަތި ނުލާ ކަމަށެވެ.
ސައިކްލޯން އަކީ މިހާރު ރާއްޖޭގައި އޮތް އެންމެ އޮގަނައިޒް ކުލަބެވެ. މުބާރާތްތަކަށް ތައްޔާރު ވުމުގެ ގޮތުން، ކޮންމެ އަހަރަކުވެސް ޓްރެއިނިން ޓްއާއެއްގައި ރާއްޖެއިން ބޭރަށް ދިއުމަކީ އެ ޓީމު ތާވަލުގައި ހިމަނައި ލިޔެވިފައި އޮންނަ ކަމެކެވެ.