މުޅި ރާއްޖޭގައި ގަސް އިންދުމުގެ ޕްރޮގްރާމް، "ރަށްފެހި" ރައީސް އިބްރާހިމް މުހައްމަދު ސޯލިހު މިއަދު އިފްތިތާހްކޮށް ދެއްވައިފި އެވެ. މި ޕްރޮގްރާމަކީ އެމަނިކުފާނުގެ 100 ދުވަހުގެ ވައުދުތަކުގައި ހިމެނޭ ކަމެކެވެ.
މި ޕްރޮގްރާމްގެ މައިގަނޑު މަގުސަދަކީ ރާއްޖޭގެ ނާޒުކު ތިމާވެށި ރައްކާތެރި ކުރުމާއި، މޫސުމަށް އަންނަ ނޭދެވޭ ބަދަލުތައް ކުޑަ ކުރުމުގައި ގަސްތަކުގެ ދައުރު އަންގައިދިނުމާއި، ގަސް އިންދައި ބެލެހެއްުޓމަށް ރައްޔިތުން އަހުލުވެރިކޮށް ޒިންމާދާރުކުރުވުމެވެ. އަދި ހަމަ މިއާއިއެކު، ރާއްޖެއިން ނެތެމުންދާ ގަސްތައް ފާހަގަކޮށް، އެފަދަ ގަސްތައް ނެތެމުންދާ ނެތިދިއުން ހުއްޓުވުމާއި، ރާއްޖޭގައި އަލަށް ފެންނަމުންދާ ގަސްތައް ފާހަގަކުރުންވެސް މި ޕްރޮގްރާމްގެ މަގުސަދުތަކުގެ ތެރޭގައި ހިމެނެއެވެ.
މި ޕްރޮގްރާމްގެ ދަށުން މުޅި ރާއްޖޭގައި ގަސް އިންދުމުގެ މަސައްކަތް މިނިސްޓްރީ އޮފް އެންވަޔަރަންމަންޓްއިން އިންތިޒާމްކޮށްގެން ކުރިއަށްގެންދިއުމަށް ވެސް ވަނީ ހަމަޖެހިފައެވެ. މިގޮތުން ރަށްރަށުގެ ހުސް ބިމާއި މަގުތަކުގައި 4000 އަށްވުރެ ގިނަ ގަސް އިންދުމަށް ވަނީ ނިންމާފަ އެވެ.
ޕްރޮގްރާމް ފެށުމަށް ހުޅުމާލެ ދެވަނަ ފިޔަވަހީގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވި ގޮތުގައި، މިފަށާ ޕްރޮގްރާމަކީ، ރާއްޖެއަށް ވަރަށް މުހިންމު އަދި އެހާމެ ބޭނުންތެރި ޕްރޮގްރާމެއް ކަމަށާއި، މުޅި ރާއްޖޭގައި ގަސް އިންދުމުގެ ޕްރޮގްރާމެއް ފެށުމަކީ، މިވެރިކަމުގެ ފުރަތަމަ 30 ދުވަހުގެ ތެރޭގައި ކުރުމަށް ކަނޑައަޅާފައިވާ މުހިންމު އެއް ކަންތައްކަން ފާހަގަކުރެއްވިއެވެ.
"މިއީ ތިމާވެށި ހިމާޔަތް ކުރުމުގެ ގޮތުން، ސަރުކާރުގެ ފުރަތަމަ 100 ދުވަހުގެ ތެރޭގައި ފެށުމަށް ނިންމާފައިވާ ކަންތަކުގެ ތެރެއިން، ފުރަތަމަ 30 ދުވަހުގެ ތެރޭގައި ތަންފީޒުކުރެވޭ ދެވަނަ ކަންތައް. މީހުން ދިރިއުޅޭ ހުރިހާ ރަށެއްގައި، ފުރަތަމަ 100 ދުވަހުގެ ތެރޭގައި، ގަސް އިންދަން ފެށުމުގެ ތައްޔާރީތައް އެންވަޔަރްމެންޓް މިނިސްޓްރީން މިހާރު އެ ގެންދަވަނީ ކުރައްވަމުން" ރައީސް ވިދާޅުވިއެވެ.
މި ޕްރޮގްރާމް މި ފަށަނީ، ރާއްޖޭގެ އެކި ރަށްރަށުން ގިނަ އަދަދަކަށް ރުއްގަސް ކެނޑުމުގެ މައްސަލަތަކެއް ކުރިމަތިވެފައިވާ ދުވަސްވަރެއްގައިކަން ފާހަގަކުރައްވަމުން ރައީސް ވިދާޅުވިގޮތުގައި ގަސް ކެނޑުމާއި ރަށްތައް ހަނަފަސްކުރުމުގެ މައްސަލައަށް ދާއިމީ ހައްލެއް ގެނެވޭނީ، ތިމާވެއްޓާ ގުޅޭ ގާނޫނުތައް ފުރިހަމައަށް ތަންފީޒުކޮށްގެން ކަމަށާއި، ތިމާވެށީގެ ހިމާޔަތުގައި އުފައްދާފައި ހުރި މުއައްސަސާތައް، މިހާރަށް ވުރެ ބާރުވެރިކުރުވައި މިނިވަންކަމާ އެކު މަސައްކަތް ކުރުމުގެ ފުރުސަތު ދީގެންކަން ފާހަގަކުރެއްވިއެވެ.
"މި ހިނގާ 100 ދުވަހުގެ ތެރޭގައި، އެންވަޔަރްމެންޓަލް ޕްރޮޓެކްޝަން އޭޖެންސީ ބާރުވެރިކުރުވައި، މިނިވަންކަމާ އެކު ހިންގުމުގެ ފުރުސަތު ތަނަވަސްވެގެން ދާނެ. މި ކަމުގެ ފުރަތަމަ ފިޔަވަޅެއްގެ ގޮތުން، އީއައިއޭ ހެދުމުގެ ޒިންމާތައް، ޓޫރިޒަމް މިނިސްޓްރީން ވަކިކޮށް، ތިމާވެއްޓާ ބެހޭ މިނިސްޓްރީއަށް ބަދަލުކުރެވޭނެ" ރައީސް ވިދާޅުވިއެވެ.
ރައީސް އިތުރަށް ވިދާޅުވިގޮތުގައި އެއް ރަށް ފެހި ކުރުމަށްޓަކައި، އަނެއް ރަށް ހަނަފަސްކޮށްލުމަކީ، މި ސަރުކާރުން ގަބޫލުކުރާ ހަމައެއް ނޫން ކަމަށާއި، މިއަދު ހުޅުމާލޭގައި މި އިންދާ 100 ރުކާއި، 150 ގަހަކީ، އެއްވެސް ރަށަކުން ނަގައިގެން ގެނައި ރުއްގަހެއް ނޫންކަމުގައި ހާމަކުރެއްވިއެވެ. އަދި، މިއަދު މިއިންދަނީ، ހުޅުމާލޭ ނާސަރީގައި މުޑުވައްކޮށް ހައްދާފައިވާ ރުއްގަސްކަން އެމަނިކުފާނު ވަނީ ފާހަގަކުރައްވާފައެވެ.
މިމޭރުމުން ވާހަކަފުޅު ދައްކަވަމުން، ރައީސް އިބްރާހީމް މުހައްމަދު ސޯލިހް ވިދާޅުވި ގޮތުގައި ސަރުކާރުގެ ފުރަތަމަ 100 ދުވަހުގެ ތެރޭގައި، ތިމާވެއްޓާ ގުޅޭ އިތުރު އެތައް ހަރަކާތެއް ހިންގާނެ ކަމަށާއި ކޮންމެ އަތޮޅަކުން ވެސް، ބައިނަލްއަގުވާމީ މިންގަނޑުތަކަށް ފެތޭ ގޮތަށް، އެއް ރަށާއި އެއް ފަރު ހިމާޔަތް ކުރައްވާނެ ކަމަށެވެ.