ރާއްޖެއަށް އެތެރެކުރާ ތެލަށް ބަރޯސާވާ މިންވަރު ކުޑަ ކުރުމަށާއި ހަކަތައިގެ ރައްކާތެރިކަން އިތުރު ކުރުމަށް އަދި ކަރަންޓުގެ އަގު އަތްފޯރާ ފަށަށް ގެނައުމަށް މަސައްކަތް ކުރުމުގެ ގޮތުން މިިއަދު އައްޑޫ ސިޓީގެ ގުޅިފައިވާ ރަށްތަކުގައި 1 މެގަވޮޓުގެ ބެޓެރީ ސްޓޯރޭޖް ސިސްޓަމެއް އަދި އެނަރޖީ މެނޭޖްމަންޓް ސިސްޓަމެއް ޤާއިމުކުރުމުގެ މަޝްރޫއުގައި ސޮއިކޮށްފި އެވެ.
އެންވަޔަރުމެންޓް މިނިސްޓރީ އަދި ޖަޕާނުގ ކުންފުންޏެއްކަމަށްވާ ނިޝިޒަވާ ލިމިޓެޑާއެކީ ސޮއިކޮކުރި މި އެއްބަސްވުމުގެ ހުރިހާ ހަރަދުތަކެއް ނަގަން ހަމަޖެހިފައިވަނި، ޖަޕާނު ސަރުކާރުގެ ފަރާތުން ހިންގާ ޖަޕާން ފަންޑް ފޮރ ޖޮއިންޓް ކްރެޑިޓް މެކޭނިޒަމް (ޖޭއެފްޖޭސީއެމް) އިންނެވެ. އެއްބަސްވުމުގައި ދިވެހި ސަރުކާރުގެ ފަރާތުން ސޮއިކޮށްފައި ވަނީ، އެންވަޔަރުމެންޓް މިނިސްޓަރު ޑރ. ހުސެއިން ރަޝީދު ހަސަން، ނިޝިޒަވާ ކުންފުނީގެ ފަރާތުން މި އެއްބަސްވުމުގައި ސޮއިކުރެއްވީ އެ ކުންފުނީގެ އެކްޓިންގ ބްރާންޗް މެނޭޖަރ މިސްޓަރ ސުމިއޯ ފުޖިއޯކާ އެވެ.
އައްޑޫ ސިޓީގެ ގުޅިފައިވާ ރަށްތަކަށް ކަރަންޓު ފޯރުކޮށްދިނުމަށް އެކި ސައިޒުގެ 14 ޑީސަލް ޖަނެރޭޓަރު އަދި 1.6 މެގަވޮޓްގެ އިރުގެ އަލިން ކަރަންޓު އުފައްދާ ނިޒާމު ޤާއިމުކުރެވިެން ދާއިރު، މިހާރު އައްޑޫ ސިޓީގެ ގުޅިފައިވާ ރަށްތަކުގެ ޕީކް ލޯޑް އަކީ 5.8 މެގަވޮޓެ އެވެ.
މި ސޮއިކުރެވުނު އެއްބަސްވުމުގެ ދަށުން ޤާއިމުކުރެވޭ ބެޓެރީ ސްޓޯރޭޖް ސިސްޓަމާއި އެނަރޖީ މެނޭޖްމަންޓް ސިސްޓަމުގެ ސަބަބުން، އައްޑޫ ސިޓީގެ ޕަވަރ ސިސްޓަ އަދި ޖެނެރޭޓަރާއި އެކި ސައިޒުތަކުގެ ޑިސްޓްރިބިއުޝަން ކޭބަލް ބޭނުންކޮށްގެން ކަރަންޓު އުފައްދާ ފޯރުކޮށްދެމުންދާ ނިޒާމެއްކަމުން ދެމެހެއްޓެނިވި ގޮތެއްގައި ކަރަންޓު އުފެއްދުމަށް ދިމާވަމުންދާ ދަތިތަކަށް ހައްލު ލިބިގެންދާނެ އެވެ.4,075,016 ދިވެހި ރުފިޔާގެ މި މަޝްރޫއުގެ ދަށުން ދަށުން ބެޓެރީ ސްޓޯރޭޖް ޓެކްނޮލޮޖީ އާއި އެނަރޖީ މެނޭޖްމަންޓްގެ ދާއިރާއިން އައްޑޫ ސިޓީގެ އިންޖީނުގެތަކުގައި މަސައްކަތްކުރަމުންދާ މުވައްޒަފުންނަށް ތަމްރީނުވެސް ފޯރު ކޮށްދޭގޮތަށް ވަނީ ހަމަޖެހިފައެވެ.
ކުރިއަށްއޮތް އަހަރެއްހާ ދުވަހުގެ ތެރޭގައި މަސައްކަތް ނިމިގެންދާއިރު، އައްޑޫ ސިޓީގެ ރަށްތަކުގެ ޕަވަރ ސިސްޓަމަށް އެކަށީގެންވާ ޙައްލެއް ލިބި، ކަރަންޓު އުފެއްދުމަށް ޑީސަލް ބޭނުންކުރާ މިންވަރު 8 އިންސައްތަ ދަށްވެގެންދާނެއެވެ.