އައްޑޫ ސިޓީގެ ހިތަދޫގެ ފުއްޓަރު ފަރާތު މޫދަށް ކްލޮރިން އެޅުމުން އެ ސަރަހައްދުގައި ދިރިއުޅޭ މަސްތައް މަރުވާން ފަށައިފި އެވެ.
އައްޑޫ ނޭޗާ ޕާކު ބެލެހެއްޓުމުގައި އުޅޭ އޮފިޝަލަކު އަވަސް އަށް ވިދާޅުވީ ކްލޮރިން އަޅާފައި ހުރި ކަމަށް ބެލެވެނީ ހިތަދޫ ކިނބިވައު ކިޔާ ސަރަހައްދަށް ކަމަށެވެ.
ކްލޮރިންގެ އަސަރުކޮށްގެން އެ ސަރަހައްދުގައި ދިރިއުޅޭ މަސްތައް އެއްގަމަށް ލައްގަމުންދާ ކަމަށްވެސް އޭނާ ވިދާޅުވި އެވެ.
ކްލޮރިންގެ ސަބަބުން އެ ސަރަހައްދުގެ ފަރުގައިވެސް މުރަކައާއި އެހެން ދިރުންތަކަށްވެސް ގެއްލުންތަކެއް ލިބިފައިވާ ކަމަށްވެ އެވެ.
އޮފިޝަލް ވިދާޅުވީ މަސްތައް ލައްގަމުންދާ ސަރަހައްދުން 25 ކިލޯގެ ކްލޮރިން ހުސްކުރި 15 ވަރަކަށް ފާޓާ ފެނިފައިވާ ކަމަށެވެ.
ފުލުހުންނާއި އީޕީއޭގެ ސަމާލުކަމަށް މިމައްސަލަ ގެނެސްފައިވާތީ އެ އިދާރާތަކުންވެސް މިހާރު ވަނީ މައްސަލަ ބަލަން ފަށާފަ އެވެ.