ޕީޕީއެމްގެ ނައިބު ރައީސް އަބްދުލްރަހީމް އަބްދުﷲ، އަދުރޭއަކީ ސޯޝަލް މީޑިއާގައި އެންމެ ގިނަ ބަޔަކު ފާޑުކިޔައި ފުރައްސާރަ ކުރާ އެއް ބޭފުޅާ އެވެ. އޭނާއަށް އަމާޒުކޮށް ތަފާތު ގިނަ ވާހަކަތައް ދައްކާއިރު ޓިނުގެ ވާހަކައަކީ އެންމެ އަޑުގަދަ އެއް ވާހަކަ އެވެ. އަހަރުތަކެއް ކުރިން އަދުރޭ އަރުވާލީ އެސްޓީއޯގެ ފިހާރައަކުން ޓިނުތަކެއް ވަގަށް ނަގައިގެން ކަމަށް ބުނަމުންދެ އެވެ.
އެކަމަކު، އެއީ ހަގީގަތެއް ނެތް ވާހަކައެއް ކަމަށް އަދުރޭ މިވަނީ ވިދާޅުވެފަ އެވެ. އޭނާ ވިދާޅުވި ގޮތުން 1987 ވަނަ އަހަރު އޭނާ އަރުވާލީ ޓިނާ ގުޅޭ އެއްވެސް މައްސަލައެއްގަ ނޫނެވެ. އެއީ ޒާތީ ގޮތުން އޭނާއަށް އަމާޒުކުރި ކަމެއްގެ ތެރެއިން ހިނގައިގެން ދިޔަ ކަމެއް ކަމަށެވެ.
"ޓިނުގެ ވާހަކަ ދައްކަވާ ބޭފުޅުންނާ އަޅުގަނޑު ވެސް ހަމަ ސުވާލުކޮށްލަން ބޭނުން، ކޮބައިތޯއޭ އެ ވިދާޅުވާ ޓިނާ އަޅުގަނޑާ އޮތް ގުޅުމަކީ، އަޅުގަނޑަށް އެއްގޮތަކަށް ވެސް ނޭނގޭ، އަޅުގަނޑަށް ހީވަނީ އެއީ ހަމަ ކިޔާނެ ނުކިޔާނެ އެއްޗެއް ނޭނގިގެންހެން،" "އަވަސް ހުކުރު"އަށް ދެއްވި އިންޓަވިއުގައި އަދުރޭ ވިދާޅުވި އެވެ.
"އަޅުގަނޑަކާއި ޓިނަކާ އެއްވެސް ގުޅުމެއް ނޯންނާނެ، އަޅުގަނޑު އަރުވާލި، އެކަމަކު އެއީ ޓިނަކާ ނޫނީ އެހެން އެއްޗެކާ ގުޅުމެއް އޮތް ކަމެއް ނޫން، މިއަދު އޮތީ އެ ބޭފުޅުންގެ ސަރުކާރެއް، އަޅުގަނޑު ހަމަ އެދެން އޭރުގެ ލިޔެކިޔުންތައް ހޯދައިގެން ބަލާލަން އަރުވާލީ ޓިނާ ގުޅުންހުރި ކަމެއްގަތޯ ނޫނީ އެހެން އެއްޗެކާ ގުޅުންހުރި ކަމެއްގަތޯ،"
އަދުރޭ ވިދާޅުވި ގޮތުގައި އޭނާއަކީ ކުރި ކަމެއް ނުކުރާނެ ކަމަށް ބުނާނެ މީހެއް ނޫންނެވެ. ހަގީގަތެއް ފޮރުވަން ވެސް އުޅޭ މީހެއް ނޫނެވެ. އޭނާ އަރުވާލި ސަބަބުގެ ތަފްސީލް ބޭނުންވާ މީހުން ބައްދަލުކުރުމުން ވަރަށް ތަފްސީލްކޮށް އެކަން ހިނގައިދިޔަ ގޮތް ކިޔައިދެއްވާނެ ކަމަށް ވެސް އަދުރޭ ވިދާޅުވި އެވެ.
"ވަރަށް ބޮޑަށް އޮޅިފަ އެ އޮތީ، އޭރުގަ އަޅުގަނޑު މަސައްކަތް ކުރީ އެސްޓީއޯ ޓިނު ވިއްކާ ފިހާރައެއްގަ ވެސް ނޫން، އަޅުގަނޑު މަސައްކަތް ކުރީ އެސްޓީއޯގަ، ހަވާލުވެ ހުރީ ރާއްޖޭގެ ހަމައެކަނި ޕެޓްރޯލް ވިއްކާ ފިހާރައާ، މި ދައްކަނީ ވަރަށް ކުރީގެ ވާހަކަ، މިހާރު ތި ޓިނޭ ކިޔާ ކުދިން އޭރު ދުނިޔެއަށް އުފަން ވެސް ނުވާނެ،" އަދުރޭ ވިދާޅުވި އެވެ.
"ޓިނާ އަޅުގަނޑާ އެއްވެސް ގުޅުމެއް ނޯންނާނެ، އެއަށްވުރެ ރަނގަޅު ވާނެ ޕެޓްރޯލޭ ކިޔައިގެން ވާހަކަ ދެއްކިޔަސް، އަޅުގަނޑަށް ހީވަނީ މި ޕްރޮގްރާމް ބަލާފައި ޓިނު، ޕެޓްރޯލަށް ބަދަލުކޮށްލަދާނެހެން،"