އިންޓަ މިލާން އާއި ބްރެޒިލްގެ ކުރީގެ ޑިފެންޑަރު މައިކޮން، ރިޓާޔާމެންޓް އުވާލުމަށް ފަހު އަލުން ދަނޑަށް ނިކުންނަން ތައްޔާރު ވެއްޖެ އެވެ.
އިންޓަ މިލާންއަށް 2009 ވަނަ އަހަރުގެ ސީޒަންގެ ތިން ތަށި ހޯދައި ދިނުމުގައި އެންމެ މުހިންމު ދައުރެއް އަދާ ކުރި ކަނާތު ބެކް މައިކޮން ކުޅުން ހުއްޓާލީ ޑިސެމްބަރު 2017 އިގަ އެވެ. އަލުން ދަނޑަށް ނިކުންނަން ތައްޔާރުވެ މައިކޮށް ވަނީ ބްރެޒިލްގެ ދެ ވަނަ ޑިވިޝަންގައި ކުޅެމުންދާ ކްރިސިއުމާ ސްޕޯޓްސް ކުލަބަށް ސޮއި ކޮށްފަ އެވެ.
އެ ކުލަބަކީ، މޮއިކޮށްގެ ޔޫތު ކެރިއާގެ ދުވަސްތައް އޭނާ ހޭދަ ކުރި ޓީމެވެ. އޭނާގެ ޔޫތު ކެރިއަރުގެ ޓީމެއްގައި ކުޅެ ކުޅުން ހުއްޓާލުމަކީ މައިކޮންގެ ހުވަފެނެކެވެ. އިންޓަގެ އިތުރުން އޭއެސް ރޯމާ އާއި މެންޗެސްޓާ ސިޓީއަށްވެސް ކުޅުނު މައިކޮން އެންމެ ފަހުން ކުޅުނީ ބްރެޒިލްގެ އަވައި އެފްސީއަށެވެ. ކްރިސިއުމާ އާއެކު މައިކޮން ސޮއި ކުރީ އެއް އަހަރު ދުވަހުގެ އެއްބަސްވުމެއްގަ އެވެ.
ކްރިސިއުމާގެ ރައީސް ޖައިމީ ޑަލް ފާރާ ބުނީ، އެ ޓީމަށް ކުޅޭ ހިތުން އެކަމަށް އެދުނީ ސީދާ މައިކޮން އަމިއްލައަށް ކަމަށެވެ. މައިކޮންގެ މިހާރުގެ އުމުރަކީ 37 އަހަރެވެ. އޭނާ ވަނީ 2003 ން 2014 ވަނަ އަހަރާ ހަމައަށް ބްރެޒިލްގެ ގައުމީ ޓީމަށް ކުޅެފަ އެވެ.
"މައިކޮންއަކީ އަހަރެންގެވެސް އައިޑޮލް،" ޑަލް ފަރާ ބުންޏެވެ. "އޭނާ އުންމިދު އެބައޮތް މި ޓީމުގައި ހުރެގެން އޭނާގެ ކެރިއާ ނިންމާލުން، މުޅި މެޗުގެ 90 މިނެޓް ކުޅެވޭ ވަރަށް އެއް މަސްދުވަސްތެރޭގައި ފިޓްވާނެ ކަމަށް އޭނާ ގަބޫލު ކުރޭ."