ދެކުނު އެމެރިކާ ބައްރުގެ ފީފާ ވޯލްޑް ކަޕް ކޮލިފައިން މެޗުގައި ބްރެޒިލް އާއި ޗިލީ ބައްދަލުކުރި މެޗުން ބްރެޒިލް މޮޅުވެއްޖެ އެވެ. އެ ޓީމު މޮޅުވީ 2-1 ގެ ނަތީޖާއަކުންނެވެ.
މި މޮޅު ބްރެޒިލަށް ހޯދައިދިނީ މެޗުގެ 89 ވަނަ މިނެޓުގައި ލުއިޒް ހެންރިކް ވައްދާލި ލަނޑުންނެވެ.
ޗިލީގެ ދަނޑުގައި ކުޅުނު މި މެޗުގައި ކުރިން ލީޑު ނެގީ ޗިލީ އެވެ. މެޗު ފެށިގެން ދެވަނަ މިނެޓުގައި އެޑުއާޑޯ ވާގަސް ވަނީ ބޮލުން ލަނޑެއް ޖަހާފަ އެވެ. ނަމަވެސް ފުރަތަމަ ހާފުގެ އިތުރު ވަގުތުގައި ބްރެޒިލްގެ އީގޯ ޖީސަސް ވަނީ މެޗު އެއްވަރުކޮށްދީފަ އެވެ.
މި މޮޅާއެކު ބްރެޒިލް ވަނީ ނުވަ މެޗުން 13 ޕޮއިންޓް ހޯދައި، ތާވަލުގެ ހަތަރުވަނައަށް އަރާފަ އެވެ. އެހެންނަމަވެސް އެއްވަނައިގައިވާ އާޖެންޓީނާއާ ދެމެދު އަދިވެސް 6 ޕޮއިންޓުގެ ފަރަގެއް އެބައޮތެވެ. ޗިލީ މިހާރު އޮތީ ތާވަލުގެ އެންމެ ތިރީގައެވެ.
މި މެޗުގައި ބްރެޒިލް ކުޅުނީ ބައެއް މުހިންމު ކުޅުންތެރިން ނެތި އެވެ. މީގެތެރޭގައި ނޭމާ، އެލިސަން ބެކާ އަދި ވިނީޝިއުސް ޖޫނިއާ ހިމެނެ އެވެ.
ބްރެޒިލްގެ ދެން އޮތް މެޗަކީ އަންނަ ބުދަ ދުވަހު އަމިއްލަ ދަނޑުގައި ޕެރޫއާ ދެކޮޅަށް ކުޅޭ މެޗެވެ.