ޓެކްސީ އަގުތަށް ކަނޑަ އެޅުމުގެ ގޮތުން އާއްމުންގެ ހިޔާލު ހޯދަން ބާއްވާ ފޯރަމް މާދަމާ ރޭ ބާއްވަން ޓްރާންޕޯޓް މިނިސްޓިރީން ނިންމައިފި އެވެ.
ޓްރާންސްޕޯޓް މިނިސްޓްރީން ބުނީ، މީޓަރު ޓެކްސީ އަށް ބަދަލުކުރުމަށް މުއްދަތު ދިނުމާއި ބުރިޖު ހުރަސްކޮށް ކުރާ ދަތުރުތަކަށް އަގުތައް ކަނޑައެޅުމާ ގުޅޭގޮތުން މަޝްވަރާކުރުމަށް ބާއްވާ ފޯރަމް މާދަމާ ރޭ 8:00 ޖަހާއިރު ދަރުބާރު ގޭގަ ބޭއްވުމަށް ހަމަޖެހިފައިވާ ކަމަށެވެ. އަދި މިފޯރަމްގައި އެއާޕޯޓަށް ދިޔުމަށް ހާއްސަ ކޮށްގެން އާ ޓެކްސީ އެއް ތައާރަފް ކުރުމާ ގުޅޭ ގޮތުން މަޝްވަރާ ކުރުމުގެ އިތުރުން މާލޭގައި ދުއްވާ ޓެކްސީ ތަކުގެ ހާލަތާއި ގުޅޭގޮތުން މަޝްވަރާ ކުރާގޮތަށް ހަމަޖެހިފައިވާ ކަމަށްވެސް މިނިސްޓްރީން ބުންޏެވެ.
ޓެކްސީ ދަތުރުތަކުގެ އަގާ ގުޅިގެން މަޝްވަރާ ކުރަން ނިންމާފައި މިވަނީ ޓެކްސީ ޑްރައިވަރުންގެ އިތުރުން، ޓެކްސީ ބޭނުންކުރާ ޕަސެންޖަރުންވެސް އަގުތަކާ ގުޅިގެން ޝަކުވާ ކުރަމުން ދަނިކޮށެވެ. އެގޮތުން ބުރިޖު ހުރަސް ކޮށް ކުރާ ދަތުރުތަށް ޓެކްސީތަކުން ބޮޑު އަގުގައި ކުރަމުންދާ ކަމުގެ ޝަކުވާ ވަނީ ބޮޑުވެފަ އެވެ.
ބުރިޖު ހުރަސް ކޮށް ކުރާ ދަތުރުތަކަށް މިނިސްޓިރީން އަގު ކަނޑައެޅުމުން، އެ އަގުގައި ދަތުރު ކުރާއިރު ގެއްލުންވާ ކަމަށް ބުނެ ޓެކްސީ ޑްރައިވަރުން ވަނީީ މިނިސްޓިރީގެ ބޭރުގައި އިހްތިޖާޖު ކޮށްފަ އެވެ. އެ އިހްތިޖާޖަށް ފަހު މިނިސްްޓިރީން ވަނީ ކަނޑައެޅި އަގުތަށް އުވާލާ ޑްރައިވަރުން ބޭނުންވާ އަގެއް ނެގުމުގެ ފުރުސަތު ވަނީދީފަ އެވެ.