އެއްމިލިއަން ޑޮލަރަކި އެއް މިލިއަން ޑޮލަރު ކަމަށާއި، އެއީ ޖާޑި ޖާޑިއަށް ވަކިވަކިން އަޅާފައިހުންނަ އެއްޗެއް ނޫން ކަމަށް ކުރީގެ ރައީސް އަބުދުﷲ ޔާމީން އަބުދުލްގައްޔޫމް ވިދާޅުވެއްޖެ އެވެ.
ރައީސް އަބުދުﷲ ޔާމީންގެ އެކައުންޓަކަށް އެމްއެމްޕީއާރުސީގެ ހިޔާނާތުގައި ހިމެނޭ ކުންފުނި އެސްއޯއެފުން އެއްމިލިއަން ޑޮލަރު ޖަމާކުރި މައްސަލައާއި ގުޅުގެން މިއަދުވެސް އެމަނިކުފާނު ވަނީ ފުލުހުންގެ އިދާރާއަށް ހާޒިރުކޮށްފަ އެވެ. ފަސް ގަޑި އިރަށްވުރެ ގިނަ އިރު ފުލުހުންގެ މުއައްސަސާގައި ބަޔާނެއް ދެއްވުމަށް ހުންނެވުމަށްފަހު، ނިކުމެވަޑައިގެން ރައީސް ޔާމީން ވިދާޅުވީ، އެސްއޯއެފުގައި ހުރި ހުރިހާ ފައިސާއަކީ ކޮރަޕްޝަންގެ ފައިސާކަމެއް އެއްވެސް އިދާރާއަކުން ކަނޑައަޅާފައިނުވާ ކަމަށެވެ.
އަދި އެސްއޯއެފުގައި ހުރި ފައިސާއަކީ ކޮރަޕްޝަންގެ ފައިސާކަމަށް ދައުލަތުގެ އިދާރާތަކަށް ގަބޫލު ކުރެވޭނަމަ އެސްއޯއެފުން ލިބޭ ފައިސާ އެއްވެސް ފަރާތަކުން ގަބޫލު ނުކުރަން އަންމުކޮށް އަންގާ އިއުލާން ކުރަންވާނެ ކަމަށްވެސް ރައީސް ޔާމީން ވަނީ ވިދާޅުވެފަ އެވެ.
އެމަނިކުފާނު ވިދާޅުވީ އެސްއޯއެފުން ޖަމާކުރި އެއްމިލިއަން ޑޮލަރު އެމަނިކުފާނުގެ އިސްލާމިކް ބޭންކުގެ އެހެން އެކައުންޓަކަށް ޖަމާކޮށްފައިވާ ކަމަށާއި، އެފައިސާ ބީއެމްއެލްގައި އޭސީސީއާއެކު ހެދި އެކައުންޓަށް ޖަމާނުކުރީ އެފައިސާއާއި މެދު ތުހުމަތުތެއް ކުރަމުން ގެންދާތީ ކަމަށެވެ. އެއްމިލިއަން ޑޮލަރަކީ އެއްމިލިއަން ޑޮލަރު ކަމަށާއި، އެސްއޯއެފްގެ އެ ފައިސާ އެމަނިކުފާނު ބޭނުންކޮށްފި ކަމަށްވާނަމަ ބޮޑު ތުހުމަތެއް އެމަނިކުފާނު ބޮލުގައި އެޅުވުމުގެ ފުރުސަތު އޮތް ކަމަށެވެ.
ރައީސް ޔާމީން ވިދާޅުވީ މަނީ ލޯންޑްރިންގައި ފުރިހަމަ ވާންޖެހޭ ކަންކަން ހުންނަ ކަމަށާއި، އެ ފައިސާއަކީ އެމަނިކުފާނަށް ނޭގި ވަދެފައިވާ ފައިސާއެއް ކަމަށެވެ. މީގެ އިތުރުން މަނީ ލޯންޑްރިންއާއި ގުޅޭ ގޮތުން ފުލުހުން ސުވާލުކޮށްފައިނުވާ ކަމަށްވެސް އެމަނިކުފާނު ވަނީ ވިދާޅުވެފަ އެވެ.
ބީއެމްއެލް އެކައުންޓްގައި ހުރި އެމަނިކުފާނުގެ ފައިސާ ކަމަށާއި، އެއީ އެމަނިކުފާނު ދިވެހި ފައިސާއިން ގަނެފައިވާ ޑޮލަރު ކަމަށް ރައީސް ޔާމީން ވަނީ ވިދާޅުވެފަ އެވެ. އަދި ބީއެމްއެލްްގައި ހުރި ފައިސާއާއި، އިސްލާމިކު ބޭންކުގައި ހުރި ފައިސާއާއި އެއްވެސް ގުޅުމެއް ނޯންނާނެ ކަމަށް ރައީސް ޔާމީން ވަނީ ވިދާޅުވެފަ އެވެ.
"އޭސީސީން ހިތްހަމަ ނުޖެހޭ ކަމަށްވަންޏާ އަޅުގަނޑާ ވާހަކަ ދައްކަން އެގްރީމަންޓް ވަނީ ކުރެވިފައި. 8 މަސް ވެގެންދިޔަ އިރުވެސް އަޅުގަނޑަށް އަންގާފައެއް ނުވޭ. ހެޔޮ ނިޔަތުގައި މަސައްކަތް ކުރަންޖެހޭ ދައުލަތުގެ ހުރިޙާ އިދާރާއަކުންވެސް" ރައީސް ޔާމީން ވިދާޅުވި އެވެ.
މީގެ އިތުރުން ރައީސް ޔާމީން ވިދާޅުވީ، އެމައްސަލައާއި ގުޅިގެން ވަރަށް ތަފުސީލު ބަޔާނެއް ފުލުހުންނަށް ދީފައިވާނެ ކަމަށާއި،
އޭސީސީން އަމަލު ކުރަމުންދަނީ ހެޔޮނިޔަތެއްގައި ނޫން ކަމަށެވެ.