ރައީސް އިބްރާހީމް މުހައްމަދު ސޯލިހު، ޔުނައިޓެޑް އެރެބް އެމިރޭޓްސް، ޔޫއޭއީއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު މިއަދު ހެނދުނު ރާއްޖެ ވަޑައިގެންފި އެވެ.
ރައީސްގެ މިދަތުރުފުޅަކީ ޔޫއޭއީގެ ޑެޕިއުޓީ ސުޕްރީމް ކޮމާންޑަރު އޮފް އާމްޑް ފޯސަސް، ހިޒް ހައިނެސް މުހައްމަދު ބިން ޒާޔިދު އަލް ނަހުޔާންގެ ދައުވަތަކަށް، މި ޖެނުއަރީ މަހުގެ 14 ވަނަ ދުވަހު ބޭއްވި "ޒާޔިދު ސަސްޓެއިނަބިލިޓީ އެވޯޑްސް" އަދި "އިނޯގްރޭޝަން އޮފް ދަ އަބޫދާބީ ސަސްޓެއިނަބިލިޓީ ވީކް" ހަފްލާގައި ބައިވެރިވެވަޑައިގަތުމަށް ކުރެއްވި ދަތުރުފުޅެކެވެ.
މިދަތުރުފުޅުގައި ރައީސް ވަނީ ވަލީއަހުދާ ބައްދަލުކުރެއްވުމުގެ އިތުރަށް އެ ގައުމުގެ ފޮރިން މިިނިސްޓަރާ ވެސް ބައްދަލު ކުރައްވައިފަ އެވެ. އަދި އެ ދަތުރުފުޅުގެ ހަވާސާގެ ތެރެއިން ދެ ގައުމުގެ ދެމެދުގައި ގުޅުން ބަދަހި ކުރަން ޖޮއިންޓް ކޮމިޝަނެއް ވެސް ވަނީ އުފައްދައިފަ އެވެ. މީގެ އިތުރުން ރާއްޖޭގައި އިންވެސްޓް ކުރުމަށް، ޔޫއޭއީގެ ގައުމީ ތެޔޮ ކުންފުނިން ވަނީ ރައީސްގެ ވަފުދާ އެކު މަޝްވަރާތައް ވެސް ބާއްވައިފަ އެވެ.