ކ. ދިއްފުށީގައި ހަނީމޫން ހޭދަ ކުރަން އައިސް އުޅެނިކޮށް ގެންބިގެން މަރުވި ފިލިޕީންސްގެ ދެމަފިރިންގެ ހަށިގަނޑު ގައުމަށް ފޮނުވާލަން ލަސްވީ އެ މައްސަލަ ރިޕޯޓް ކުރުން ލަސްވުމުން ކަމަށް ޓޫރިޒަމް މިނިސްޓްރީން ބުނެފި އެވެ.
ދިއްފުށީގައި ހަނީމޫން ހޭދަ ކުރުމަށް އައިސް އުޅެނިކޮށް މަރުވެފައިވަނީ ލިއޮމާ އަދި އެރިކާ އެވެ. މަރުވީ ކ. ދިއްފުއްޓާއި މީރު ފެންފުންޓާ ދެމެދަށް މޫދަށް އެރި އުޅެނިކޮށެވެ. އަދި ދެމަފިރިންގެ ހަށިގަނޑު ފިލިޕީންސްއަށް ނުގެންގޮސް ދެ ދުވަސްވި އެވެ. އަދި ހަށިގަނޑު ވައިގެ މަގުން އުފުލޭނެ ފައިސާ ނެތިގެން މި ދެމަފިރިންގެ އާއިލާއިން ފިލިޕީންސްގައި ފައިސާ ހޯދަން ކެމްޕޭން ވެސް ކުރި އެވެ. އަދި އެ ގައުމުގެ ސަރުކާރުން ދެމަފިރިންގެ ހަށިގަނޑު ގެންދާނެ ކަމަށް ބުންޏެވެ.
ނަމަވެސް، ފަހުން ދިވެހި ސަރުކާރުގެ ހަރަދުގައި ދެމަފިރިންގެ ހަށިގަނޑު ވަނީ ފިލިޕީންސްއަށް ފޮނުވާލާފަ އެވެ. ސްރީލަންކަން އެއާލައިންސްއިން ފޮނުވާލިއިރު ސަރުކާރުގެ ބަޖެޓުން ގާތްގަނޑަކަށް 30،000 ޑޮލަރު (462،600ރ.) ވަނީ ހޭދަކޮށްފަ އެވެ.
ޓޫރިޒަމް މިނިސްޓްރީގައި މިއަދު ބޭއްވި ނޫސްވެރިންގެ ބައްދަލުވުމުގައި "އަވަސް" އިން ކުރި ސުވާލަކަށް ޖަވާބު ދެއްވަމުން މިނިސްޓަރު އަލީ ވަހީދު ވިދާޅުވީ ފިލިޕީންސް ދެމަފިރިންގެ ހަށިގަނޑު ގައުމަށް ގެންދިއުމުގައި ލަސްވެގެން ދިޔައީ އެ މައްސަލަ ރިޕޯޓް ކުރުން ލަސްވުމުން ކަމަށެވެ.
"އިންސިޑެންޓް [ހާދިސާ] ތައް ރިޕޯޓް ކުރުމުގައި ލަސް ތަކެއް އެބަހުރި. އެކަން މިހާރު ވާނީ ރަނގަޅުކޮށްފައި ޓޫރިޒަމް މިނިސްޓްރީ އާއި އަދި މިނިސްޓަރަށްވެސް އަންގަން ޖެހޭ ގޮތަށް ހަދާފަ. އަޅުގަނޑުމެންގެ ޒިންމާއެއް ރާއްޖޭގެ ބްރޭންޑް ޕްރޮޓެކްޓް ކުރުމާއި އިންސާނީ ކަރާމާތް ރައްކާތެރި ކުރުން. އެހެންވެ އަޅުގަނޑުމެން އެ ފިޔަވަޅު އެޅީ،" އަލީ ވިދާޅުވި އެވެ.
މިނިސްޓަރު ވިދާޅުވީ ދެމަފިރިންގެ ހަށިގަނޑު ގައުމަށް ފޮނުވާލުމުގައި އަމަލުކޮށްފައިވާނީ ރާއްޖޭގެ މާލިއްޔަރު ގާނޫނާ އެއްގޮތަށް ކަމަށެވެ.
"ޓޫރިޒަމް މިނިސްޓްރީގެ ކުރީގައި ކަންތައް ކުރި ގޮތަށް ބަލާފައި މާލިއްޔަތު ގާނޫނާ އެއްގޮތަށް އެޅި ފިޔަވަޅެއް އެއީ. އެ ބޮޑީ ގެންދިއުމުގައި ސަރުކާރުން ހަރަދު ކުރީ. އެއީ ރާއްޖޭގައި ދޭ ހިދުމަތަކީ އެންމެ ރަނގަޅު ހިދުމަތް ގޮތުގައި އޮންނާނީ. މިއީ ޓޫރިޒަމް މިނިސްޓަރެއްގެ ހައިސިއްޔަތުން އެޅި ފިޔަވަޅެއް އެއީ،" އަލީ ވިދާޅުވި އެވެ.