ޕެރިސް (ޖެނުއަރީ 20) - މީގެ 10 ދުވަސް ކުރިން، ފްރެންޗް ކަޕުގެ ސެމީ ފައިނަލުގައި 2-1 ގެ ނަތީޖާއަކުން ޕީއެސްޖީގެ މައްޗަށް ގެންގޮމް އިން ކުރި ހޯދައި، ފްރާންސްގެ ޗެމްޕިއަން ޓީމު ސިއްސުވާލި އެވެ.
ނަމަވެސް، އިއްޔެ ލީގުގައި ދެ ޓީމު ބައްދަލުކުރި މެޗުގައި، ޕީއެސްޖީ އިން ވަނީ އެކަމުގެ ބަދަލު ރަނގަޅަށް ހިފައިފަ އެވެ. ގެންގޮމް ކޮޅަށް ނުވަ ލަނޑުޖަހާ، އަމިއްލަ ދަނޑުގައި ޕީއެސްޖީ އިން ވަނީ ރެކޯޑު މޮޅެއް ހޯދައިފަ އެވެ.
ގެންގޮމް ކޮޅަށް ލަނޑު ގޯންޏެއް އޮއްސާލި، ތަފާތު ބޮޑު މެޗުގައި، ފްރާންސްގެ ޒުވާން ފޯވަޑް ކިލިއަން އެމްބާޕޭ އާއި އެޑިންސަން ކަވާނީ ވަނީ ހެޓްރިކު ހަދާފަ އެވެ.
އެ މެޗުގައި ބްރެޒިލްގެ ފޯވަޑް ނޭމާ ދެ ލަނޑު ޖެހި އިރު، ނުވަ ވަނަ ލަނޑު ކާމިޔާބުކޮށްދިނީ މެޗުގެ 83 ވަނަ މިނެޓުގައި މުނިއޭ އެވެ.
ފުރަތަމަ ހާފު ނިމުނުއިރު، ޕީއެސްޖީ ތިން ލަނޑު ޖަހާފައިވާއިރު، އެފަދަ ބޮޑު ނަތީޖާއެއް ނެރެވޭނެ ކަމަށް އޭރު ނުބެލެވުނު ނަމަވެސް، ފަހު ހާފުގައި ޕީއެސްޖީން އިން ވަނީ ހަ ލަނޑު ކާމިޔާބުކޮށްފަ އެވެ.