ޕްރައިމަރީތަކުގައި ވާދަ ކުރުމަށްފަހު ބަލިވާ ކެންޑިޑޭޓުންނަށް ވެސް އިންތިހާބުގައި ވާދަ ކުރުމުގެ ފުރުސަތު ލިބިގެންދާނެ ކަމަށް ދިއްދޫ ދާއިރާގެ މެންބަރު އަބްދުލް ލަތީފް މުހައްމަދު މިއަދު ވިދާޅުވެއްޖެ އެވެ.
ލަތީފް މިހެން ވިދާޅުވިއިރު ދާދިފަހުން އެމްޑީޕީއިން ރައްޔިތުންގެ މަޖިލީހަށް ޕްރައިމަރީ ވަނީ ބާއްވާފަ އެވެ. އެ ޕްރައިމަރީއާ ގުޅިގެން އެ ޕާޓީގެ ތެރޭގައި ކޮންމެވެސް ވަރަކަށް ނުތަނަވަސްކަން އެބަ އޮތެވެ.
ޕްރައިމަރީތަކުގައި ވާދަކޮށް ބަލިވާ ކެންޑިޑޭޓުންނަށް ވާދަ ނުކުރެވޭ ގޮތް ހެދީ ޕީޕީއެމްއިންނެވެ. އެކަން 2016 ވަނަ އަހަރުގެ ތެރޭގައި ކުރީ ރައްޔިތުންގެ މަޖިލީހުން ސިޔާސީ ޕާޓީތަކުގެ ގާނޫނަށް އިސްލާހު ގެނެސްގެންނެވެ.
އެ އިސްލާހު އުވާލުމަށް މެންބަރު ލަތީފް ވަނީ މަޖިލީހަށް ހުށަހަޅުއްވާފަ އެވެ. އެ އިސްލާހު މިހާރު ވަނީ މަޖިލީހުން ބަލައިގަނެ، ކޮމެޓީ މަރުހަލާގަ އެވެ.
އެކަމަށް އިޝާރަތް ކުރައްވަމުން މިއަދު ލަތީފް ކުރެއްވި ޓްވީޓެއްގައި ވިދާޅުވީ ޕްރައިމަރީގައި ބަލިވުމަކުން އެއްވެސް ބޭފުޅަކު ކަންބޮޑުވާން ނުޖެހޭ ކަމަށެވެ. ސިޔާސީ ޕާޓީތަކުގެ ގާނޫނަށް އޭނާ ހުށަހަޅާފައިވާ އިސްލާހު ފާސްވުމުން އިންތިހާބުގައި ވާދަ ކުރެވޭނެ ކަމަށެވެ.
އެ އިސްލާހު ފާސްކުރުމަށް ހުރުހާ ބޭފުޅުންގެ އެހީތެރިކަން ބޭނުންވާ ކަމަށް ވެސް މެންބަރު ލަތީފް ވަނީ ވިދާޅުވެފައިވެ އެވެ.
އިލެކްޝަން ކޮމިޝަނުން ވަނީ މިއަދުގެ ނިޔަލަށް ޕާޓީތަކުގެ ޕްރައިމަރީތައް ބާއްވައި އޭގެ މައުލޫމާތު ދިނުމަށް އަންގާފަ އެވެ.
ޕްރައިމަރީއާ ގުޅޭ އިސްލާހެއް ހުށަހަޅާފައިވަނީ ލަތީފް ވަނޫ މަޖިލިސް މެންބަރު ކަމަށް ކުރީގެ ރައީސުންނަށް ވާދަ ނުކުރެވޭނެ އިސްލާހެއް ވެސް މަޖިލީހަށް ހުށަހަޅުއްވާފަ އެވެ.