ކުރީގެ ރައީސް އަދި ޕީޕީއެމްގެ ކުރީގެ ރައީސް މައުމޫން އަބްދުލްގައްޔޫމް، އާ ސިޔާސީ ޕާޓީއެއް އުފައްދަން ނިންމަވައިފި އެވެ. އެ ޕާޓީގެ ނަމަކީ، މޯލްޑިވްސް ރިފޯމް މޫވްމަންޓް، އެމްއާރުއެމް އެވެ.
އެމަނިކުފާނު އެކަން މިއަދު އިއުލާން ކުރެއްވީ މިހާރު ސޯލްޓް ކެފޭގައި ކުރިއަށްދާ ބައްދަލުވުމަށް ފަހު މީޑިއާތަކާ ވާހަކަފުޅު ދައްކަވަމުންނެވެ.
މައުމޫން އާ ސިޔާސީ ޕާޓީއެއް އުފައްދަވާއިރު މިއީ އެމަނިކުފާނު އުފައްދަވާ ތިންވަނަ ޕާޓީ އެވެ. މީގެކުރިން ޑީއާރްޕީ އާއި ޕީޕީއެމްއަކީ ވެސް މައުމޫން އިސްކޮށް ހުންނަވާ އުފެއްދެވި ދެ ޕާޓީ އެވެ. ޑީއާރްޕީގައި މައްސަލަ ޖެހިގެން ޕީޕީއެމް އުފެއްދެވިއިރު ޕީޕީއެމްއިން އެމަނިކުފާނު ވަނީ ވަކިކޮށްފަ އެވެ.
މައުމޫން އާ ޕާޓީ އުފައްދަވަން ނިންމެވިއިރު ޕީޕީއެމްގެ މިލްކުވެރިކަމާ މެދު ސުވާލު އުފައްދައި ހުށަހެޅި މައްސަލަ އަދިވެސް އޮތީ ސުޕްރީމް ކޯޓްގަ އެވެ. އެހެން ނަމަވެސް ޕީޕީއެމްގެ ކޮންގްރެސް ސައްހަ ނޫން ކަމަށް ބުނެ ހުށަހެޅި މައްސަލައިގައި ސުޕްރީމް ކޯޓުން ވަނީ އެ ކޮންގްރެސް ސައްހަ ކަމަށް ހުކުމްކޮށްފަ އެވެ.
ރައީސް މައުމޫން މިއަދު ނޫސްވެރިންގެ ބައްދަލުވުމުގައި ވިދާޅުވި ގޮތުން އެމަނިކުފާނު މިހާރު ސިޔާސީ ހަރަކާތް ހިންގަވައި މައުމޫން ރިފޯމް މޫވްމަންޓް، އެމްއާރްއެމް ޕާޓީއަކަށް ހެދުމަށް ނިންމެވީ އިއްޔެ ސުޕްރީމް ކޯޓުގެ ހުކުމް އައި ގޮތުންނެެވެ. އިއްޔެގެ ހުކުމާއެކު އެމަނިކުފާނު ވަނީ "މި އަޒުމެއް ނުގުޑާނެ، މި ހިތްވަރެއް ނޭލޭނެ" ކަމަށް ވިދާޅުވެފަ އެވެ. އާ ޕާޓީގެ މޮޓޯއަކީ ވެސް އެއީ އެވެ.
ރާއްޖޭގައި 30 އަހަރު ވެރިކަން ކުރެއްވި ރައީސް މައުމޫން ވިދާޅުވީ އިއްޔެ އެމަނިކުފާނު އެމްއާރްއެމްގެ ކޯ ގުރޫޕާ ބައްދަލު ކުރައްވައި އެމްއާރްއެމްގެ ކުރިމަގާ ގުޅޭ ގޮތުން އެ ފަރާތްތަކުގެ ވިސްނުން އޮޅުންފިލުވި ކަމަށެވެ. އެއިން އެއްވެސް ބޭފުޅަކު ތިއްބެވީ އެ މަސައްކަތް ހުއްޓާލައްވައި ގެއަށް ވަދެވަޑައިގަންނަވާ ގޮތަށް ނޫން ކަމަށް ވިދާޅުވި އެވެ.
"އިއްޔެ ވަރަށް ބޮޑު ހިތާމައަކާ އަޅުގަނޑުމެންނާ ކުރިމަތިލާން ޖެހުނީ، އަޅުގަނޑުމެން އެންމެ އެދުނު ގޮތަކަށް ނޫން ކަންތައް ވެގެން ދިޔައީއެއް، އެހެންވެ އެ ހިސާބުން އަޅުގަނޑުމެންވީ އެ ކަންތައްތައް ހުއްޓާލަންތޯ؟ އެ ސުވާލު، އަޅުގަނޑުމެންނަށް ގެއަށް ވަންނަންވީތޯ؟ ފިލަންވީތޯ؟ ރޯން ތިބެންވީތޯ؟ އަޅުގަނޑު އެ ވާހަކަ ރޭ ކޯ ގުރޫޕާ ދެއްކިން، އެއްވެސް ބޭފުޅަކަށް ގެއަށް ދާން ބޭނުމެއް ނުވި، ބޭނުންވީ ތެދުވެ މަސައްކަތް ކުރަން،" ރައީސް މައުމޫން ވިދާޅުވި އެވެ.
"ހުރިހާ ބޭފުޅުންނަށް ވެސް އެއްބަސްވެވުނީ އެމްއާރްއެމް ހަރަކާތަކީ ސިޔާސީ ޕާޓީއަކަށް ހެދުމަށް، ގާނޫނީ ގޮތުން ހުރިހާ ކަމެއް ކޮށް ރަޖިސްޓާވީމަ ދެން އަޅުގަނޑުމެންނަށް ޕާޓީއެއްގެ ގޮތުގައި ހަރަކާތްތެރިވެވޭނެ، މިއަދު ފަށައިފިން ޕާޓީ ރަޖިސްޓްރީކުރުމުގެ މަސައްކަތް، ފޯމް ނަގައިފިން، އިރާދަކުރެއްވިއްޔާ ވަރަށް އަވަހަށް ގާނޫނުގައި ބުނާ އަދަދަށް މެންބަރުންގެ ފޯމް ހުށަހަޅާނަން،"
ރައީސް މައުމޫން އިތުރަށް ވިދާޅުވީ އެމްއާރްއެމް ޕާޓީއަކަށް ހެދުމުގެ ކުރިން ގާނޫނީ ލަފާ ވެސް ހޯއްދެވި ކަމަށެވެ. އެގޮތުން އިއްޔެ ސުޕްރީމް ކޯޓުން ކުރި ހުކުމާއި މިހާރު އެ ކޯޓުގައި އޮތް މައްސަލައަކީ އެއް ބާވަތެއްގެ މައްސަލައަކަށްވާތީ ބައެއް ގާނޫނީ ބޭފުޅުން ލަފާ ދެއްވަނީ އެއް ބާވަތެއްގެ ދެ މައްސަލަ ކޯޓުގައި ކުރިއަށް ނުގެންދާނެ ކަމަށް ކަމަށެވެ.
މިހާރު އޮތް މައްސަލަ ސުޕްރީމް ކޯޓުން ބެލި ނަމަވެސް، އެއީ ކިހާ ދިގުލައިގެން ދާނެ މައްސަލައެއް ކަމެއް ނޭނގޭ ކަމަށާއި އެހެންވެ، އެ މައްސަލައަށް ބަލައިގެން ތިބުމުގެ ބަދަލުގައި އެހެން ގޮތެއް ހޯދުމުގެ މަސައްކަތް ފެއްޓެވީ ކަމަށް ރައީސް މައުމޫން ވިދާޅުވި އެވެ.
އާ ޕާޓީގެ ރަސްމީ މަގާމަކަށް ވަޑައިގަންނަވާނަންތޯ ސުވާލު ކުރުމުން ރައީސް މައުމޫން ވިދާޅުވީ އެމަނިކުފާނު ސިޔާސީ މަސައްކަތްޕުޅު ކުރެއްވުމުގައި ދެމިހުންނަވާނެ ކަމަށެވެ.
"އަޅުގަނޑު އެއް ވާހަކައެއް ދަންނަވާލާނަން، ގައުމު ދެކެ ލޯބިވުމަކީ ގައުމަށް ހެޔޮ އެދުމަކީ ހިދުމަތް ކުރުމަކީ ވަކި އުމުރަކަށް އޮތް ކަމެއް ނޫން، ހިދުމަތުގައި ދެމިހުރުމަކީ އެމީހެއްގެ ހައްގެއް، ކުރިއަށް އޮތްތަނުގައި ވެސް އަޅުގަނޑަށް އެފަދަ ފުރުސަތެއް ލިބި، އެފަދަ ސިއްހަތެއްގައި ހުރިއްޔާ އަޅުގަނޑު އެ މަސައްކަތެއްގައި އުޅޭނަން، ފެށުނީންސުރެ ނިމެންދެން ގައުމަށް ހިދުމަތް ކުރަން ނިންމާފަ އަޅުގަނޑު ހުރީ،" ރައީސް މައުމޫން ވިދާޅުވި އެވެ.
ރައީސް މައުމޫން ވިދާޅުވީ ރައްޔިތުންގެ މަޖިލީހަށް އިންތިހާބަށް އެމްއާރްއެމްގެ ނަމުގައި ކެންޑިޑޭޓުން ނެރެވޭވަރު ނުވާނެ ކަމަށާއި ނަމަވެސް އެމަނިކުފާނުގެ ތާއިދުގައި އަމިއްލަ ގޮތުން ވާދަ ކުރާނެ ކެންޑިޑޭޓުންތަކެއް ނުކުންނާނެ ކަމަށެވެ. އެކަމަށް އެދި ހުޅުވާލުމުން 108 ފަރާތަކުން ޝައުގުވެރިކަން ފާޅުކޮށްފައިވާކަން ފާހަގަ ކުރެއްވި އެވެ. އޭގެން ވެސް އެނގިގެން ދަނީ އެމްއާރްއެމްއަށް އޮތް ތާއިދު ކަމަށް ރައީސް މައުމޫން ވިދާޅުވި އެވެ. ޖުމްހޫރީ ޕާޓީއިން އެ ފުރުސަތު ހުޅުވާލުމުން ވެސް ކުރިމަތިލީ 97 މީހެކެވެ.
"ދައްކުވައިދޭ ކަމަކީ އެމްއާރްއެމްގެ ފިކުރަކީ ރާއްޖޭގެ ވަރަށް ގިނަ ބަޔަކު ބަލައިގަންނަ ފިކުރެއްކަން، އެއަށް ތާއިދު ކުރާ ރައްޔިތުން ގިނަކަން އޭގެން އެނގެނީ،" ރައީސް މައުމޫން ވިދާޅުވި އެވެ.
ރައީސް މައުމޫން ވިދާޅުވީ ކެންޑިޑޭޓުން ނެރޭނީ އެންމެ ތާއިދު ބޮޑު ދާއިރާތައް ބެލުމަށްފަހު ކަމަށެވެ. ވަރަށް އަވަހަށް ކެންޑިޑޭޓުން ހޮވައި ކުރިމަތިލާނެ ދާއިރާތައް ކަނޑައަޅުއްވާނެ ކަމަށް ވެސް އެމަނިކުފާނު ވިދާޅުވި އެވެ.