ސްރީލަންކާ އާއި ރާއްޖޭގެ ކަނޑު ސަރަހައްދު ދެގައުމަށް ބޭނުން ކުރެވޭނެ ގޮތްތަކެއް ހޯދަންޖެހޭ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ލަންކާގެ 71 ވަނަ މިނިވަން ދުވަސް ފާހަގަ ކުރުމަށް ރޭ ޗަމްޕާ ސެންޓްރަލް ހޮޓެލްގައި ބޭއްވި ރަސްމިއްޔާތު ޝަރަފްވެރިކޮށްދެއްވައި ރައީސް ނަޝީދު ވިދާޅުވީ، ރާއްޖޭގެ ރައްޔިތުންނަށް ލަންކާގެ ވަރަށް ރަނގަޅަށް އެނގި ދަސްވެފައިވާ ކަމަށެވެ. އަދި އެގައުމުގެ ގުޅުން އިތުރަށް ބަދަހި ކުރުމަށް ދެގައުމުގެ ކަނޑުގެ ސަރަހައްދު ބޭނުން ކުރެވޭނެ ގޮތްތަކެއް ހޯދަންޖެހޭ ކަމަށް ނަޝީދު ވިދާޅުވި އެވެ.
"އަހަރުމެން އެބަޖެހޭ ސްރީލަންކާ އާއި ރާއްޖޭގެ ކަނޑުގެ ސަރަހައްދު ދެ ގައުމަށްވެސް ބޭނުން ކުރެވޭ ގޮތެއް ހޯދަން އެބަ ޖެހޭ. ދެ ގައުމުގެ މަސްވެރިންނަށް ވެސް ރަނގަޅު މާކެޓެއް ހޯދަން، އެމީހުން ވެސް ބާނާ މަސް މިތާގައި ވިއްކޭ ގޮތްވާން ޖެހޭ، އަހަރުމެން ވެސް އެބަޖެހޭ ބާނާ މަސް ވިއްކޭ ގޮތް ހަދަން، ވެއްލަވައްތާގައި ނޫނީ ކޮލަމްބޯގައި ވެސް،" ނަޝީދު ވިދާޅުވި އެވެ.
ނަޝީދު ވިދާޅުވީ، ދެގައުމުގެ ދޭތެރޭގައި ގިނަ ހުރަސްތަކެއް އެބަހުރި ކަމަށާއި ނަމަވެސް ދެގައުމުން މަސައްކަތް ކުރަން ޖެހޭނީ އެކަތިގަނޑަކަށް ވެގެން ކަމަށެވެ.
"އެއީ ވޯކް ޕާމިޓް، ވަޒީފާގެ ފުރުސަތު ނޫނީ ވިސާގެ މައްސަލަތަކަކަށް ވިޔަސް އެ ހުރިހާ ކަމެއްވެސް ހައްލުކޮށް، އަމާޒަކަށް ވާންވާނީ އެކަތިގަނޑަކަށްވެ މަސައްކަތް ކުރުން،" ނަޝީދު ވިދާޅުވި އެވެ.
ނަޝީދު ވިދާޅުވީ، ރާއްޖޭގެ ތައުލީމީ ދާއިރާގެ އިތުރުން އެހެނިހެން ދާއިރާތަކަށް ލަންކާގެ ހިއްސާ ބޮޑު ކަމަށެވެ. އެގޮތުން މަޖީދީއްޔާ ސްކޫލުގެ ފުރަތަމަ ޕްރިންސިޕަލަކީ ވެސް ލަންކާ އަށް ނިސްބަތްވާ ބޭފުޅެއް ކަމަށް ނަޝީދު ވިދާޅުވި އެވެ. އަދި ރާއްޖޭގެ ސިއްހީ ދާއިރާ އަށްވެސް ލަންކާއިން އެހީތެރިކަން ފޯރުކޮށްދެމުންދާ ކަމަށާއި ރާއްޖޭގެ ޓޫރިޒަމްގައި ލަންކާގެ ހިއްސާ ބޮޑުކަމަށްވެސް ނަޝީދު ވިދާޅުވި އެވެ.
"ރާއްޖޭގެ ރިސޯޓުތަކުގެ 15 ޕަސެންޓް ހިއްސާ ކުރަނީ ލަންކާގެ ކުންފުނިތަކުން، ރާއްޖެއިން އެކަމަށް މަރުހަބާ ކިޔަން، އަހަރުމެން ބޭނުން އެމީހުން ރާއްޖޭގައި ރަނގަޅު ވިޔަފާރި ކުރުން،'' ނަޝީދު ވިދާޅުވި އެވެ.
ރަސްމިއްޔާތުގައި ލަންކާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު، މޭޖާ ޖެނެރަލް ބީއާރުޑަބްލިއުއެމްއާރުއޭބީ ތޮރަޑެނިޔަ ވިދާޅުވީ، ލަންކާގެ މީހުން ރާއްޖޭގައި މަސައްކަތް ކުރަނީ ވަރަށް ހިތްހަމަ ޖެހިގެން ކަމަށެވެ. އަދި ދިވެހިންގެ ފަރާތުން ލިބެމުންދަނީ ވަރަށްވެސް ރަނގަޅު މެހްމާންދާރީއެއް ކަމަށެވެ.
އޭނާ ވިދާޅުވީ، ރާއްޖޭގައި މަސައްކަތް ކުރާ ލަންކާގެ މީހުންގެ އަދަދު އިތުރުވަމުންދާ ކަން ކަމަށާއި ލަންކާ މީހުން ރާއްޖޭގައި އިތުރުވެފައިވަނީ ރާއްޖޭގައި މަސައްކަތްކުރަން ފަސޭހަވުމުން ކަމަށެވެ. އަދި ވިދާޅުވީ، ލަންކާގައި ރާއްޖޭގެ އެތައް ބަޔަކު އުޅެމުންދާ ކަމަށެވެ. ދެ ގައުމުގެ ގުޅުން ދަނީ ދުވަހެއް ދުވަހަކަށް ބަދަހިވަމުން ކަމަށްވެސް ތޮރަޑެނިޔަ ވިދާޅުވި އެވެ.