އިންޑިއާއަށް ކްރިކެޓް ވޯލްޑްކަޕު ހޯދައިދިން ކުޅުންތެރިންނާ ދެކޮޅަށް، މިއަދު ކުޅުނު މެޗުން ރާއްޖޭގެ ޓީމަށް ލިބުނީ ބޮޑު ތަޖުރިބާއެއް ކަމަށް ގައުމީ ކްރިކެޓް ޓީމުގެ ކޯޗް އާސިފް ހާން ބުނެފި އެވެ.
ރާއްޖެ އާއި އިންޑިއާ އާ ދެމެދު އުފެދިފައިވާ ގާތް ގުޅުމުގެ ތެރެއިން، ކުޅިވަރުގެ ރޮނގުން އެ ގުޅުން އިތުރަށް ބަދަހި ކުރުމަށްޓަކައި، މާލޭގެ ކްރިކެޓް ދަނޑުގައި ރާއްޖެއާ ދެކޮޅަށް ކުޅުނު އިންޑިއާގެ ޓީމުގައި ވޯލްޑްކަޕު ހޯދާފައިވާ، ޔުވުރާޖް ސިންހްގެ އިތުރުން، ވޯލްޑްކަޕުގައި ކުޅެފައިވާ ފަސް ކުޅުންތެރިން ހިމެނެ އެވެ.
އިންޑިއާގައި 2011 ވަނަ އަހަރު ބޭއްވި، ކްރިކެޓް ވޯލްޑްކަޕު ޗެމްޕިއަންކަން ހޯދި ޓީމުގައި ޔުވްރާޖް ވަނީ ހިމެނިފަ އެވެ. އެ މުބާރާތް އިންޑިއާއަށް ކާމިޔާބު ކޮށްދިނުމަށްޓަކައި ޔުވްރާޖު ވަނީ މޮޅު ކުޅުމެއް ދައްކާފަ އެވެ.
ގައުމީ ކޯޗް، އާސިފް ހާން، ބުނީ، ރާއްޖޭގެ ކުޅުންތެރިންނަށް މެޗުން ވަރަށް ގިނަ ކަންކަން ދަސްވެފައި ވާނެ ކަމަށެވެ.
"އެންމެ ފުރަތަމަ ކަމަކީ އެ ޓީމުގައި އެބަހިމެނޭ ވަރަށް މޮޅަށް ކުޅޭ ދެތިން ކުޅުންތެރިޔެއް މިހާރުވެސް، އެ ކުޅުންތެރިންނާ ދެކޮޅަށް ކުޅޭއިރު އެންމެ މުހިންމު ކަމަކީ ޕްރެޝަރު ހޭންޑަލް ކުރުމާއި ހާސް ނުވުން އަދި މައިންޑް ސެޓް އެއްވަރެއްގައި ގެންގުޅުން، އެކަން ރާއްޖޭގެ ކުޅުންތެރިންނަށް ވަރަށް ބޮޑަށް ނަގައި ގަނެވޭނެ." ޕާކިސްތާނަށް އުފަން ދެކުނު އެފްރިކާގެ ތަޖުރިބާކާރު ބުންޏެވެ.
އެއާ އިންޑިއާގެ ޓީމުން މެޗު ކާމިޔާބު 130 ލަނޑުންނެވެ. ގައުމީ ޓީމުގެ ކެޕްޓަން ހަސަން އިބްރާހިމް ބުނީ، މެޗަށް ރާއްޖޭގެ ކުޅުންތެރިން ނިކުތީ މޮޅުވެގެން ފައިބަން ކަމަށާއި އެންމެ ފަހު ވަގުތާ ހަމައަށްވެސް ރާއްޖެއިން ވަރުގަދަ ފައިޓެއް ދިން ކަމަށެވެ.
"އެ ޓީމުން މެޗު ގެންދިޔައީ ބާކީ ތިން ބޯޅައަށް ވެފަ އިންދާ، އެ ކުޅުންތެރިން މިހާރު ގަވާއިދުން ކްރިކެޓް ނުކުޅޭތީ ފިޓްނަސް އެއްވަރެއްގައި ނުހިފެހެއްޓުނަސް، އެ ކުޅުންތެރިންގެ ތަޖުރިބާ ބޭނުންކޮށްގެން މެޗު އަނބުރާލަން އެމީހުންނަށް އެނގޭ،" ހަސަން ބުންޏެވެ "އަނެއް ކަމަކީ ތަޖުރިބާގެ ގޮތުންނާއި ކާމިޔާބަށް ބަލާއިރު މިހާ ހައިޕްރޮފައިލް ކުޅުންތެރިންނާ ދެކޮޅަށް ރާއްޖޭގެ އަމިއްލަ ދަނޑުގައި ކުޅުމުގެ ފުރުސަތު ލިބުން، މިފަހުގެ ތާރީހްގައި ނެތް މިހާ ބޮޑު މެޗެއް ރާއްޖޭގައި ކުޅެވިފައެއް މިއީ ރާއްޖޭގެ ކްރިކެޓަށް ވަރަށް ބޮޑު އެކްސްޕޮޝާ އެއް."
ގައުމީ ޓީމުގެ ޒުވާން ބެޓްސްމަން، އާދަމް ނާސިފް 'އާދަޅޭ' ބުނީ، ރާއްޖޭގެ ޓީމަކީ ނިސްބަތުން ޒުވާން ޓީމެއް ކަމަށާއި، މިކަހަލަ މެޗުތައް ގިނައިން ކުޅެން ފުރުސަތު ލިބޭނަމަ، ރާއްޖޭގެ ކްރިކެޓް ހުނަރު ވަރަށް ބޮޑަށް އުފެއްދޭނެ ކަމަށެވެ.
"މިއީ ރާއްޖޭއަށް ލިބުނު ވަރަށް ބޮޑު ފުރުސަތެއް، މިފަދަ ފުރުސަތުތަކުން އެނގޭނެ ރާއްޖޭގައި ކްރިކެޓްގެ ހުނަރު އޮތް ވަރު، މިފުރުސަތު ތަނަވަސްވީމަ ރައީސް [އިބްރާހިމް މުހައްމަދު ސޯލިހް] އާއި ނައިބުރައީސް [ފައިސަލް ނަސީމު]އަށް ޝުކުރު އަދާ ކުރަން ބޭނުން."
މެންދުރު ފަހުން އޮތީ އެއާ އިންޑިއާގެ ޓީމާ ދެކޮޅަށް ރައީސް އިބްރާހިމް މުހައްމަދު ސޯލިހްގެ ޓީމު ކުޅުއްވި މެޗެވެ.