ތިމާވެއްޓާއި މޫސުމަށް އަންނަ ބަދަލުތަކާއި ގުޅުންހުރި ކަންކަމުގައި އދ. ރިފޯމް ކުރަންޖެހޭ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ނަޝީދުގެ އޮފީހާއި، ޔޫރަޕްގެ ބައެއް ޔުނިވަސިޓީތަކާއި، ބައެއް ޖަމިއްޔާތައް ގުޅިގެން ބ. އަތޮޅު ދިގުފަރު އައިލެންޑް ރިސޯޓްގައި ދެ ދުވަހުގެ މުއްދަތަކަށް ކުރިޔަށްގެންދާ "ވޯކްޝޮޕް އޮން ކްލައިމެޓް ޑިޕްލޮމަސީ އެންޑް ޖިއޯޕޮލިޓިކްސް" ގައި ވާހަކަފުޅު ދައްކަވަމުން ނަޝީދު ވިދާޅުވީ، މޫސުމީ ބަދަލުތަކުގެ ވާހަކަ ކުރީގެ ރައީސް މައުމޫން އަބުދުލް ގައްޔޫމް ދުނިޔޭގެ ސަމާލުކަމަށް ގެނައުމަށް މަސަައްކަތް ކުރެއްވިއިރު އެމަނިކުފާނު ހުންނެވީ ނޫސްވެރިއެއްގެ ގޮތުގައި ކަމަށާއި، މިހާރުގެ ފޮރިން މިނިސްޓަރު އަބުދުﷲ ޝާހިދުވެސް އޭރު ޖޫނިއާ ޑިޕްލޮމޭޓެއްގެ ގޮތުގައި މަސައްކަތް ކުރައްވާ ކަމަށެވެ.
ނަޝީދު ވިދާޅުވީވ އޭގެ ތެރެއިން ވަރަށް ގިނަ ކަންކަން ދަސްވެ ވަޑައިގެންނެވި ކަމަށާއި، ތިމާވެއްޓާ ގުޅޭ ގިނަ ލިޔުންތަކެއް ލިޔުއްވެވުނު ކަމަށެވެ.
އަދި ރާއްޖެގެ ވެރިކަމަށް 2009 ވަނަ އަހަރު ވަޑައިގެން ބައިނަލް އަގުވާމީ ދުނިޔޭގައި މޫސުމަށް އަންނަ ބަދަލްތަކާއި ގުޅޭގޮތުން ހުރި ކަންބޮޑުވުންތަކުގެ ވާހަކަ ވަރަށް ގަދައަށް ދެއްކެވި ކަމަށާއި، މިއަދު އޭގެ އެތައް އަހަރެެއް ފަހުންވެސް ދައްކަވަން އޮތީ އެވާހަކަ ކަމަށެވެ. ނަމަވެސް ވާހަކައިން އެކަނި ފުއްދެން ނެތްކަމަށާއި އިތުރު ގޮތްތަކެއް ހޯދަން ޖެހޭ ކަމަށެވެ.