ނ. ވެލިދޫ ދާއިރާއަށް އަމިއްލަ ގޮތުން ވާދަކުރަން ނިންމާ އިލެކްޝަން ކޮމިޝަން (އީސީ)އަށް ފޯމް ހުށަހެޅި ކުރީގެ ނޫސްވެރިޔާ އައިޝަތު ލީޒާ މަޖިލިސް އިންތިހާބުގައި ވާދަނުކުރަން ނިންމައިފި އެވެ.
ލީޒާ މިރޭ ނެރުނު ބަޔާނެއްގައި ވިދާޅުވީ، އޭނާ މަޖިލިސް އިންތިހާބުގައި ވާދަ ނުކުރަން ނިންމީ މި ވަގުތު ރާއްޖެ، ސިޔާސީ ގޮތުން އޮޅުން ބޮޅުމެއްގެ ތެރޭގައި އޮތުމުން ކަމަށެވެ. އަދި ސިޔާސީ ގޮތުން ހަލަބޮލިވެފައި މިހާރު ހިނގަމުންދާ ހަމަނުޖެހުންތަކުގެ ސަބަބުން ކަމަށެވެ.
ލީޒާ ވިދާޅުވީ އޭނާ ވެލިދޫ ދާއިރާއަށް އަމިއްލަގޮތުން ވާދަކުރަން ނިންމުމުން ދާއިރާގެ ރައްޔިތުން އޭނާއަށް ކުރި ތާއިދު ފެނުނު ކަމަށެވެ. އަދި އޭނާ މަޖިލިސް އިންތިހާބުގައި ވާދަނުކުރަން ނިންމީ ވެސް ދާއިރާގެ ރައްޔިތުންގެ ލަފަޔާއެކު އެކުގަައި ކަމަށް ވެސް ލީޒާ ވިދާޅުވެ އެވެ.
އިންތިހާބުގައި ވާދަ ނުކުރާކަން މިހާރު އީސީއަށް ވެސް އަންގާފައިވާނެ ކަމަށް ލީޒާ ވިދާޅުވި އެވެ. އިންތިހާބުގައި ވާދަ ނުކުރަން ނިންމުމުން ދާއިރާގެ ގިނަ ބަޔަކު މާޔޫސްވިކަން އެނގޭ ކަމަށާއި އެކަމަކު ވެސް އެދެނީ މާޔޫސްނުވުމަށް ކަމަށް އޭނާ ވިދާޅުވި އެވެ. އަބަދުވެސް ހުންނާނީ ރައްޔިތުންނާއެކު ކަމަށް ވިދާޅުވި އެވެ.
ނޫސްވެރިކަން ދޫކޮށްލައި، 2013 ވަނަ އަހަރުގެ ރިޔާސީ އިންތިހާބަށްފަހު ލީޒާ ސިޔާސީ ދާއިރާއަށް ނުކުތެވެ. އަދި 2014 ވަނަ އަހަރު ބޭއްވި މަޖިލިސް އިންތިހާބުގައި ޕީޕީއެމްގެ ޓިކެޓްގައި މަޖިލީހަށް ވާދަ ކުރި އެވެ. ނަމަވެސް އޭނާ އެ ފަހަރު އިންތިހާބުން ބަލިވި އެވެ.
އެއަށްފަހު ރައީސް އޮފީހުގައި މަސައްކަތް ކުރި އެވެ. ކުރީގެ ނައިބު ރައީސް އަހުމަދު އަދީބު ހައްޔަރުކުރުމަށްފަހު ހިނގައިދިޔަ ކަންތައްތަކާ ގުޅިގެން ލީޒާ ރާއްޖެއިން ބޭރަށް ދިރިއުޅުން ބަދަލުކުރި އެވެ. އެނބުރި ރާއްޖެ އައީ ރައީސް އަބްދުﷲ ޔާމީން އިންތިހާބުގައި ބަލިވުމަށްފަހު އެވެ.