އިންގިރޭސި ޕްރިމިއާ ލީގުން ކަންކުރާގޮތުން، ޔޫއެފާ ޗެމްޕިއަންސް ލީގްގައި ކުރިއެރުން ހޯދަން، އިނގިރޭސި ކުލަބުތަކަށް ވަރަށް ބޮޑަށް އުނދަގޫވާ ކަމަށް ބުނެ ޓޮޓެންހަމްހޮޓްސުޕާގެ ކޯޗް މައުރީޝިއޯ ޕޮޗެޓިނޯ ހިތްހަމަނުޖެހުން ފާޅުކޮށްފި އެވެ.
ޗެމްޕިއަންސް ލީގްގެ ދެ ވަނަ ބުރުގެ ދެ ވަނަ ލެގް މެޗުގައި މިރޭ ޖަރުމަންގެ ބުރޫޝިއާ ޑޯޓަމުންޑާ ދެކޮޅަށް ކުޅޭ މެޗުގެ ކުރިން ޕޮޗެޓިނޯ ބުނީ، ޓޮޓެންހަމްއަށް ވުރެ ބޮޑަށް، ޑޯޓަމުންޑަށް އަރާމު ކުރަން ވަގުތު ލިބުނު ކަމަށެވެ. އެެހެންނަމަވެސް، ޕްރިމިއާ ލީގް ޝެޑިއުލު އޮންނަ ގޮތުން އެ ފުރުސަތު ޓޮޓެންހަމްއަށް ނުލިބޭ ކަމަށް އޭނާ ބުންޏެވެ.
"އަހަރެމެން މެޗު މި ކުޅުނީ ހޮނިހިރު ދުވަހު، އަހަރެމެން ދަތުރު ކުރީ މިއަދު (ހޯމަ ދުވަހު) އެހެންވެ އެންމެ ބޭނުންވި ގޮތަށް ތައްޔާރުވާކަށް ވަގުތެއް ނުލިބުނު، ފުރަތަމަ ލެގް މެޗުގައިވެސް ބުރޫޝިއާ ޑޯޓަމުންޑަށް ތައްޔާރުވާން ވަގުތު ލިބުނު، މިފަހަރުވެސް އެ ޓީމަށް ވަގުތު ލިބުނު ސަބަބަކީ އެ ޓީމު ކުޅުނީ ހުކުރު ދުވަހު،" އަވޭ މެޗަށް ޓީމު ތައްޔާރު ކުރަނީ ކިހިނެއްތޯ ސުވާލު ކުރުމުން ޕޮޗެޓިނޯ ވާހަކަ ދެއްކި އެވެ. "އަހަރެމެންނަށް މެޗަށް ތައްޔާރުވެވެން އޮތްގޮތަކީ ވާހަކަ ދައްކުން، މާބައިވަރު ވާހަކަ ދައްކައިގެންވެސް ނުވާނެ، ސަބަބަކީ ހޮނިހިރު ދުވަހު އަހަރެމެން ކުޅުނީ ޑާބީ މެޗު، ކުޅުންތެރިންގެ ހަކަތަވެސް އެމެޗަށް ހޭދަވެއްޖެ، މެންޓަލީވެސް ވަރަށް ހަކަތަ ބޭރުވެއްޖެ."
އޭނާ ބުނީ، ޕްރިމިއާ ލީގް ޝެޑިއުލް އޮތްގޮތުން، މިރޭގެ މެޗަށް ތައްޔާރުވާން 24 ގަޑިއރުވެސް އޭނާގެ ޓީމަށް ނުލިބޭ ކަމަށެވެ. ޗެމްޕިއަންސް ލީގް ފަދަ މުހިންމު މުބާރާތަކަށް ތައްޔާރުވުމަށް ޓިމުތަކަށްވެސް ފުރުސަތު ދޭންޖެހޭކަން ޕޮޗެޓިނޯ ވަނީ ބުނެފަ އެވެ.
ފްރާންސް ލީގްގައި ވާދަ ކުރާ ރަނެއިސްއިން، ޔޫރޮޕާ ލީގްގައި ކުޅެން ހަމަޖެހިފައިވާ މެޗު ކުރިމަތީގައި އޮތުމުން، އެ ޓީމުން ފްރާންސް ލީގްގައި ކުޅެން އޮތް މެޗު ފްރާންސްގެ ފެޑްރޭޝަނުން ފަސްކޮށްދީފައިވާކަން ޕޮޗެޓިނޯ ފާހަގަ ކުރި އެވެ.
"ބަލާ އެހެން ގައުމުތަކުން އެ ގައުމުގެ ކުލަބުތަކަށް އެހީވާން ބޭނުންވާ މިންވަރު، އަހަރެމެންނަށް ކުރިމަތިވެފައިވާ ހާލަތުގައި އަހަންނަކަށް ނޭންގެ ކުށްވެރި ކުރާނީ، ޕްރިމިއާ ލީގް ކަމެއް، ނުވަތަ އިނިގިރޭސި އެފްއޭ ކަމެއް ނުވަތަ އަހަރެމެންގެ ކުލަބު ކަމެއް،" ޕޮޗެޓިނޯ ވާހަކަ ދެއްކި އެވެ. "ޔޫރަޕްގައި ކުރިއަށްދާން އަހަރެމެން ބޭނުންވޭ ޕްރިމިއާ ލީގްގެ އެހީ، ޔޫރަޕްގެ މުބާރާތްތަކުގައި ކުރިއަށްދާން ކުލަބުތަކަށް ފަސޭހަވާނެ ގޮތަކަށް ޕްރިމިއާ ލީގުން ކަންކަން ކުރަން ޖެހޭ."
ފުރަތަމަ ލެގް މެޗުގައި ހޯމް ދަނޑުގައި ކުޅުނު މެޗު ޓޮޓެންހަމް ކާމިޔާބު ކުރީ 3-0 ންނެވެ. ޓޮޓެންހަމް އަތުގައި ލިޑް އޮތަސް، ޕޮޗެޓިނޯ ބުނީ، މެޗު ފަށާ މުޅިން އާ މެޗެއްގެ ގޮތުގައި ކަމަށާއި ނަތީޖާ ކޮންމެ ގޮތަކަށްވެސް ބަދަލުވެދާނެ ކަމަށެވެ.