މިއަންނަށް އެޕްރީލް މަހު ބާއްވާ މަޖިލިސް އިންތިހާބުގެ ވޯޓު ކަރުދާހުގައި ކެންޑިޑޭޓުންގެ ފުރިހަމަ ނަމާއެކު އާއްމު ނަން ޖެހުމުގެ ހުއްދަ ދިނުމަށް ނިންމާފައިވާ ކަމަށް އިލެކްޝަން ކޮމިޝަން (އީސީ) އިން ބުނެފި އެވެ.
އީސީއިން މިކަން ހާމަ ކޮށްފައިވަނީ ރޭގެ ވަގުތެއްގައި ކުރި ޓުވީޓެއްގަ އެވެ. މިއީ އީސީ އިން މިގޮތަށް ކެންޑިޑޭޓެއްގެ އާއްމު ނަން ވޯޓު ކަރުދާހުގައި ބޭނުންކުރުމަށް ހުއްދަ ދިން ފުރަތަމަ ފަހަރެވެ. މީގެ ކުރިން ވޯޓު ލުމަށް ބޭނުންކުރާ ވޯޓު ކަރުދާހުގައި ހަމައެކަނި ހިމަނަނީ ކެންޑިޑޭޓުގެ ފުރިހަމަ ނަމާއި ކެންޑިޑޭޓް ނަމްބަރެވެ.
އިލެކްޝަން ކޮމިޝަނުން ކެންޑިޑޭޓުންގެ ނަމްބަރު ތަރުތީބު ކުރުމުގެ ގޮތުން ގުރުއަތު ނަގާފައިވަނީ މީގެ ދެ ދުވަސް ކުރިންނެވެ. މިފަހަރު ބާއްވާ މަޖިލިސް އިންތިހާބުގައި 264،589 ފަރާތަކަށް ވޯޓު ދިނުމުގެ ހައްގު ލިބިގެންވެ އެވެ. ކެންޑިޑޭޓުންގެ ގޮތުގައި 87 ދާއިރާއަކަށް 393 ކެންޑިޑޭޓުން ވާދަ ކުރާނެ އެވެ.