ރާއްޖޭގައި މަސައްކަތް ކުރަން ގެންނަަ ބިދޭސީންގެ އެމްޕްލޯއިމެންޓް އެޕްރޫވަލްއަށް ދެން ނަގާނީ ދެ ދުވަސް ކަމަށް އިމިގްރޭޝަން ޑިޕާޓްމަންޓުން މިއަދު ބުނެފި އެވެ.
އިމިގްރޭޝަން އިން މިއަދު ނެރުނު އިއުލާނެއްގައި ބުނީ، އެމްޕްލޯއިމެންޓް އެޕްރޫވަލް އަށް ހުށަހަޅާއިރު، އެކަމަށް ބޭނުންވާ ލިޔެކިޔުން ހަމަޔަށް ހުރި ނަމަ، އެ އެޕްރުވަލް ދެ ދުވަސް ތެެރޭގައި ދޫކުރާނެ ކަމަށެވެ. އަދި ލިޔެކިޔުންތައް ހަމަނުވާ ނަމަވެސް އެފަރާތްތައް ގުޅައި އެކަން އަންގާނެ ކަމަށް ވެސް އިމިގްރޭޝަނުން ބުންޏެވެ.
އިމްގްރޭޝަން އިން އެ ބަދަލު ގެނައި ސަބަބަކީ، އިމިގްރޭޝަނުން ބުނި ގޮތުގައި ރައްޔިތުންނަށް ފޯރުކޮށްދޭ ހިދުމަތްތައް ރައްޔިތުން ގަބޫލުކުރާ މިންގަޑަކަށް ގެނައުމުގެ ގޮތުން އެވެ. އަދި ބިދޭސީންގެ ކަންކަމާއި ގުޅުން ހުރި ފަރާތްތަކުގެ މަސައްކަތަށް ފަސޭހަ ކޮށްދިނުމަކީ ވެސް އޭގެ ބޭނުމެއް ކަމަށް އިމިގްރޭޝަނުން ބުންޏެވެ.
އިމިގްރޭޝަން ކޮންޓްރޯލާ މުހައްމަދު އަހްމަދު ވިދާޅުވެފައިވާ ގޮތުގައި، ރާއްޖޭގައި ވޯކް ވިސާގައި ރާއްޖެއަށް 144،607 ބިދޭސީން ރާއްޖެ ގެނެސްފައިވެ އެވެ. އަދި 63،000 ބިދޭސީން ގަވާއިދާ ހިލާފަށް އުޅެމުންދާކަން އެއިދާރާއަށް ފާހަގަ ކުރެވިފައިވާ ކަމަށެވެ.