ފައިނަލުގައި އެފްސީ ގޯއާ އާދެކޮޅަށް އެކްސްޓްރާ ޓައިމުގައި ކާމިޔާބު ކުރި ލަނޑުން 1-0 ން މޮޅުވެ، އިންޑިއާގެ އެންމެ ބޮޑު ފުޓްބޯޅަ މުބާރާތް، އިންޑިއަން ސުޕަލީގްގެ ޗެމްޕިއަންކަން ބެންގަލޫރު އެފްސީ ހޯދައިފި އެވެ.
ނަތީޖާ ނުނެރެވި މެޗުގެ 90 މިނެޓް ހަމަވުމުން ކުޅުނު އެކްސްޓްރާ ޓައިމްގެ ފުރަތަމަ ހާފުވެސް ނިމުނި ލަނޑެއް ނުޖެހި އެވެ. އެކްސްޓްރާ ޓައިމްގެ ދެ ވަނަ ހާފުގެ ބޮޑުބައެއް ނިމުނު އިރުވެސް ލަނޑެއް ނުޖެހި އޮތުމުން ބެލެވުނީ ޕެނަލްޓީން ނަތީޖާ ނެރެން ޖެހޭނެ ކަމަށެވެ. މެޗުގެ ބަދަލުވީ އެކްސްޓްރާ ޓައިމްގެ ފުރަތަމަ ހަފުގެ އެންމެ ފަހު މިނެޓްގައި، ގޯއާގެ މޮރޮކޯ ޑިފެންޑަރު އަހްމަދު ޖޮހުއާ އަށް ދެ ވަނަ ރީނދޫ ކާޑާއެކު ރަތް ކާޑު ދެއްކުމުންނެވެ.
އެކްސްޓްރާ ޓައިމްގެ ދެ ވަނަ ހާފާ ގޯއާ ކުރިމަތިލީ 10 ކުޅުންތެރިންނާއެކު އެވެ. އޭގެ ފައިދާ ބެންގަލޫރުން ނެގި އެވެ. ދެ ވަނަ ހާފު ނިމެން ތިން މިނެޓަށް ވެފައި ވަނިކޮށް ބެންގަލޫރުގެ ރާހުލް ބެކޭ ވަނީ ލަނޑު ކާމިޔާބު ކޮށްފަ އެވެ. ބެންގަލޫރުގެ މިޑްފީލްޑާ ސްޕެއިންގެ ޑިމާސް ޑެލްގާޑޯ ކޯނަރު ނަގިއިރު، ގޯއާގެ ޕެނަލްޓީ އޭރިއާ ތެރޭގައި ރާހުލް ބެކާ ހުރީ ހުސްކޮށެވެ. އޭނާ މާކުނުކޮށް ހުރުމުގެ ފައިދާ ނަގައި، ކޯނަރުން ތަނަވަސްވި ބޯޅަ ބޮލުން ގޯލްގެ މަތީ ކަނަށް އޮއްސާލި އެވެ.
އެ ބޯޅަ ދިފާއު ކުރަން، ގޯއާގެ ކީޕަރު ނަވީން ކުމާރު ބޯޅަ ޕަންޗުކޮށްލަން މަސައްކަތް ކުރި ނަމަވެސް ބޯޅަ ގޯލަށް ވަނީ، އޭނާގެ އިނގިލިތަކުގެ ކުރީގައި ޖެހިފަ އެވެ.
މިއީ އައި އެއެސްއެލްގެ ކުރު ތާރީހްގައި 90 މިނެޓުން ބޭރުން ނަތީޖާ ނެރެން ޖެހުނު ދެ ވަނަ ފައިނަލެވެ. މިއީ އިންޑިއަން ސުޕަ ލީގްގެ ޗެމްޕިއަންކަން ބެންގަލޫރު އެފްސީ ހޯދި ފުރަތަމަ ފަހަރެވެ. މި ކާމިޔާބާ އެކު އަންނަ އަހަރު ބާއްވާ އޭއެފްސީ ކަޕުގެ ކޮލިފައިން ބުރުން ބެންގަލޫރަށް ޖާގަ ލިބެނޭ އެވެ.