ޖަވާބުދާރީވުމުގެ ފުރުސަތު ނުދީ ތާއީދު އަނބުރާ ގެންދަން އެމްޑީޕީން ނިންމި ނިންމުމާމެދު ހިތާމަ ކުރާ ކަމަށާއި، އެމްޑީޕީން ތާއީދު އަނބުރާ ގެންދިޔަ ނަމަވެސް، ކެނޑިޑެސީ އަނބުރާ ނުގެންދާނެ ކަމަށް އެމްޑީޕީގެ ޓިކެޓްގައި ތިނަދޫ އުތުރު ދާއިރާ ކުރިމަތިލާފައިވާ އަބުދުލް މުޣުނީ ވިދާޅުވެއްޖެ އެވެ.
އެމްޑީޕީން ކުރި ތާއީދު އަނބުރާ ގެންދިއުމާއި ގުޅިގެން މުޣުނީ ނެރުނު ބަޔާނެއްގައި ބުނެފައިވަނީ ތިނަދޫ އުތުރު ދާއިރާއަށް ކެމްޕޭން ކުރަމުން ދަނިކޮށް، ސޯޝަލް މީޑިއާގައި ފަތުރަމުންދާ ހަގީގަތާއި ހިލާފު ވާހަކަތަކަށް ބުރަވެ އެމްޑީޕީން އޭނާއަށް ޖަވާބުދާރީވާނެ ފުރުސަތު ނުދީ، ޕާޓީގެ ތާއީދު ގެންދަން ނިންމާ އެކަން އިއުލާން ކުރުމަކީ ހަރުދަނާ ކަމެއްނެތި ނިންމަވާފައިވާ ނިންމުމެއް ކަމަށެވެ. އެކަމާ ހިތާމަ ކުރާ ކަމަށެވެ.
އޭނާ ވިދާޅުވީ ސޯޝަލް މީޑިޔާގައި ބަޔަކު ފަތުރާ ހަގީގަތާއި ހިލާފު ވާހަކަތަކަކާއި ގުޅިގެން އެފަދަ ފިޔަވަޅެއް އެޅިދާނެ ކަމަށް ގަބޫލު ނުކުރާ ކަމަށާއި، ފިޔަވަޅެއް އަޅަންވާނީ ހަގީގަތެއްގެ މައްޗަށް ބުރަވެ ހަރުދަނާ ކަމާއެކު އެމްޑީޕީގެ އެތެރޭގެގައި އުފެދިފައި އޮންނަ ކަމާ ގުޅުންހުރި ގުނަވަންތަކަށް ހުށަހަޅާ އެ މައްސަލައެއް ބެލުމަށްފަހު ހަމަޖެހިފައިވާ ގަވާޢިދުތަކާއި، އުސޫލްތަކާއި، ހަމައާއި އިންސާފުން ކަމަށް ދެކެވަޑައިގަންނަވާ ކަމަށެވެ.
އިންތިހާބު ކުޑަތަންވެފައި ވަނިކޮށް އެފަދަ ނިންމުމެއް ނިންމަންވާނީ ޕާޓީގެ ގައުމީ މަޖިލީހުގެ ބަހެއްވެސް ހޯދުމަށް ފަހުގައި ކަމަށް ދެކެ ވަޑައިގަންނަވާ ކަމަށާއި، އަގުވައްޓާލައި އަބުރު ކަތިލުމަށާއި ދާއިރާގެ ރައްޔިތުން ކުރަމުންދާ ސަޕޯޓް ކުޑަކުރުމަށްޓަކައި ބަޔަކު ކުރަމުންދާ އެ ނާތަހުޒީބު އަމަލު ހަރުކަށި އިބާރާތުން ކުށްވެރިކުރާ ކަމަށް ވެސް އޭނާގެ ބަޔާނުގައި ވެއެވެ.
އަދި ބުނެފައި ވަނީ އޭނާއާ ގުޅުވައި ބަޔަކު ފަތުރަމުންދާ އެ ވާހަކަތަކަކީ އެއްވެސް ހަގީގަތެއްނެތް ދޮގު ތުހުމަތުތަކެއް ކަމަށާއި، އެފަދަ އަމަލެއް ހިންގާފައި ނުވާނެ ކަމުގެ ޔަގީންކަން ދާއިރާގެ ރައްޔިތުންނަށް އަރުވާ ކަަމަށެވެ.
މީގެ އިތުރުން، އެމްޑީޕީގެ ނިންމުމާއި ގުޅިގެން ކެނޑިޑެންސީ އަނބުރާ ގެންދިއުމުގެ އެއްވެސް ވިސްނުމެއް ނުގެންގުޅޭ ކަމުގެ ޔަގީންކަން ދާއިރާގެ ރައްޔިތުންނަށް އަރުވާ ކަމަށް ވެސް އެ ބަޔާނުގައި ވެއެވެ.